Read Quechua Bolivia DC Bible JUDIT 13 Bible Online

JUDIT 13 - Quechua Bolivia DC Bible bible

JUDIT 13

¹Chaupi tuta Holofernespa generalesnin riporqanku. Bagoas wasi toldoj punkunta jawamanta wisq'aykorqa, ñaupajta llojsichispa ukhupi kashajkunata. Tukuyninku puñukoj rerqanku sayk'usqas tardeña kasqanrayku.

²Judit sapitallan chay ukhupi qhepakorqa. Holofernesqa, phiri machasqa, puñunan patapi wijch'ukusharqa.

³Judit nisqa warmi kamachinman jawallapi kakunanta, suyanantataj llojsinanta, rinankupaj sapa día jina Diosmanta mañakoj. Bagoasman kikillantataj nisqa.

⁴Tukuyninku ripusqankuña. Mana ni pi toldo ukhupi qhepakusqachu. Chaypacha, Judit, sayaspa Holofernespa puñunampa ladompi, nisqa sonqompi: Tukuy Atiyniyoj Señor: Ruwasqay allin kachun ñaupaqeykipi, Jerusalén jatunchasqa kanampaj.

⁵Kunampuni aylluykita yanapanayki tiyan. Kunanqa junt'akunan tiyan unanchakusqay chinkachisqas kanankupaj noqaykuta chejnikojkuna, noqaykoj contrampi oqharikojkuna.

⁶Chayta nispa qayllarqa catreman. Warkhunamanta orqhorqa Holofernespa espadanta.

⁷Espadata jap'ispataj puñunaman chimparqa. Holofernespa umanta chujchasninmanta jap'erqa, kay jinata nispa: Kallpachaway, Señor, Israelpa Diosnin, kunanqa!

⁸Chantá, iskay kutita wajtarqa Holofernespa umanta, qholuykuspa.

⁹Puñunamanta urmaykucherqa cuerpota. Warkhunasta sik'irparerqa sayanasninmanta. Chaymantataj, llojsispa, warmi kamachinman Holofernespa ujmanta jaywarqa.

¹⁰Payrí Holofernespa umanta costalnimpi churaykorqa, maypichus jallch'aj mikhunata chaypi. Chantaqa, iskayninku riporqanku Diosmanta mañakoj yachasqankuman jina. Jaranta rerqanku. Pampaman chayarqanku, wicharerqankutaj Betulia orqoman, chayarqankutaj llajta punkuman.

¹¹Karumanta Juditqa qhaparerqa punkupi sayashaj soldadosman: Punkuta kichariychej!, nispa. Diosninchej noqanchejwan kashan. Rikuchishanraj Israel ukhupi kallpanta, enemigosninchej ukhupitaj atiyninta. Ajinata kunan ruwarqa!

¹²Uyarispataj qhaparikusqanta, runasqa usqhayta uraykorqanku llajta punkuman, wajyarqankutaj kurajkunata.

¹³Tukuyninku thaskispa llajta punkuman chayarqanku. Mana creesharqankuchu Judit jampusqantaña. Punkuta kicharerqanku. Paykunata yaykucherqanku. Chantaqa, rikuyta atinankupaj ninata jap'icherqanku. Muyuyninkupitaj tiyakorqanku uyarinankupaj.

¹⁴Juditqa qhaparispa nerqa: Diosta yupaychaychej! Diosta yupaychaychej! Payqa khuyakuyninta Israel ayllunman rikucherqa. Makiynejta qayna ch'isi enemigosninta chinkacherqa.

¹⁵Costalmanta orqhospataj Holofernespa umanta nerqa: Rikuychej Holofernespa umanta. Rikuychej Asiria ejércitoj jatun kamachejpa umanta! Kayqa puñunampa aysanan maypichus siriykoj machasqa kashajtin. Señorqa wañuchin uj warmej makinnejta.

¹⁶Diospa sutimpi juraspa niykichej pay yanapawasqanta tukuy ruwasqaypi Holofernesqa k'acha kayniyta qhawarqa. Jinapis, mana ni ima sajra kajtaqa ruwawanchu, p'enqaypi rikhurinaypaj jina.

¹⁷Tukuyninku t'ukorqanku, k'umuykukuspataj uj similla nerqanku: Yupaychasqa kay, Señor Diosniyku. Qanqa kunan día aylluykita chejnikojkunata pampaman k'umuykucherqanki.

¹⁸Oziastaj nerqa Juditman: Wawáy, patapi kaj Diosninchej qanta bendicisuchun, tukuy warmista bendicisqanmanta aswan jatun bendicionwan, mundontimpi. Yupaychasqa kachun janaj pachata kay pachatataj ruwaj Señorqa. Pay pusasorqa qholumunaykipaj enemigosninchejpa kamachejninkuta.

¹⁹Runasqa yuyarikonqankupuni ima sonqowanchus rerqanki Holofernespa jaranman. Diospa atiyninmanta manapuni qonqaponqankuchu.

²⁰Diosninchej munachun kaywanqa jatunyachisqa kanaykita wiñaypaj. Tukuy laya sumajkunata qosuchun, imaraykuchus paypa yanapayninwan wañuy patapi churarqanki kausayniykita, ayllunchejta kacharichiyta munaspa llakiymanta. Paypa yanapayninwan tukuy imapi allin risorqa, nispa. Tukuyninkutaj nerqanku: Amén. Amén.