Read Quechua Bolivia DC Bible JUDIT 14 Bible Online

JUDIT 14 - Quechua Bolivia DC Bible bible

JUDIT 14

¹Juditqa nerqa: Uyariwaychej, hermanosníy. Kay umata churaykuychej aswan jatun perqa patapi.

²Chhapu chhaputa, inti llojsimojtin, sapa ujniykichej maqanasniykichejwan sayarinkichej. Tukuy qharis maqanakuyta atejkuna, llojsimuychej llajtamanta maqanakoj. Uj kamachejta ajllakuychej. Creechiychej pampaman risqaykichejta tinkoj chaypi sayashaj asirio soldadoswan. Amataj uraykamuychejchu.

³Asiriosqa wakichikonqanku maqanakupaj. Jaraman renqanku wajyaj generalesninkuta. Tukuy correnqanku Holofernespa toldonman, manataj tarenqankuchu. Manchachikuywan ñaupaqeykichejmanta ayqerparikaponqanku.

⁴Qankunaqa, qhepankupi rinkichej. Qankunawan khuska rillanqankutaj Israel orqospi tiyakojkuna. Ima ñanllapipis rishajtinku atinkichej wañuchiyta paykunataqa.

⁵Ñaupajtaraj wajyaripuwaychej Aquiorta, Amón llajtayoj chayta, rikunampaj Holofernespa umanchus manachus kay uma kasqanta. Ninampaj sichus pay Israel aylluta chejnikojqa, pichus payta kayman kachamorqa wañuchisqa kananta munaspa.

⁶Oziaspa wasinmanta pusamorqanku Aquiorta. Chayaspataj, rikuytawan Holofernespa umanta uj runaj makisnimpi, runas chaupipi, chay pachallapi wañusqa jina urmarqa.

⁷Yuyayninman kutirichejtinku, Juditpa chakisninman qonqorikorqa respetowan, nerqataj: Bendicisuchunku Judá jaraspi tukuy nacionespipis. Qanmanta parlayta uyarejkuna manchachikuywan qharkatitenqanku.

⁸Kunanqa willaway imatachus ruwarqanki kunankama. Chantaqa, Judit, runas chaupipi willarqa imatachus ruwasqanta llajtamanta llojsisqanmantapacha chay horakama.

⁹Parlayta tukuytawankamataj, llajtapi kasharqanku tukuy runasqa, qhapariyta qallarerqanku rikuchispa may kusisqas kasqankuta.

¹⁰Rikuspa Aquiorqa imatachus Israelpa Diosnin ruwasqanta, Diospi creerqa tukuy sonqonwan. Circuncisión señalta ruwachikorqa, ujchakorqataj Israel aylluwan wiñaypaj.

¹¹Sut'iyayta, israelitasqa warqhorqanku perqa patapi Holofernespa umanta. Tukuy runas jap'erqanku maqanasninkuta, llojserqankutaj sinrupi orqo cheqanchanasman.

¹²Asiriosqa rikuytawanqa, capitanesninkuman willacherqanku. Capitanestaj mask'arqanku generalesta tukuy kamachejkunatawan.

¹³Tukuyninku rerqanku Holofernespa wasi toldonman, nerqankutaj yanapajninman: Rijch'arichiychej kamachejninchejta. Chay hebreo wata runasqa uraykamushanku noqanchejwan tinkuyta munaspa. Ujllata wiñaypaj paykunata chinkachinanchejta mask'ashanku.

¹⁴Bagoasqa ukhuman yaykorqa. Cortina wasallamanta qhaparerqa yuyaspa Juditwan khuska puñukushasqanta.

¹⁵Mana ni pi uyarikojtintaj yaykorqa. Rikorqataj Holofernesta pampapi wijch'usqata. Wañusqa kasharqa, mana umayoj.

¹⁶Sinch'ita qhaparispa waqarqa, p'achantataj llik'ikorqa.

¹⁷Chantaqa, rerqa Juditpa toldonman. Mana tarispataj, runasman nerqa: Burlachikunchej chay wata runaswan. Uj warmi, sapallan, p'enqaypi rikhurichin Nabucodonosorpa reinonta. Chaypi kashan Holofernes, pampapi wijch'usqa, mana umayoj.

¹⁹Chayta uyarispa, asirio ejercitomanta generalesqa mancharikorqanku, p'achasninkutataj llik'ikorqanku. Waqayta qallarerqanku qhaparispa jaran chaupipi.