Read Quechua Bolivia DC Bible JUDIT 15 Bible Online

JUDIT 15 - Quechua Bolivia DC Bible bible

JUDIT 15

¹Toldospi kajkuna, uyarispa imachus pasasqanta mancharikorqanku.

²Manchachikuywan, kayman jaqayman ayqerqanku. Correspa rerqanku pampaman, ñankunata mask'aspa. Orqosmampis wicharerqanku. Mana karqachu ni iskay runapis khuskata rejkuna.

³Orqospi sayajkuna, Betulia chaynejpi, ayqerparikapullarqankutaj. Chantaqa, tukuy israelitas, maqanakupaj jina watasniyojña kajkuna, paykunata qhaterqanku.

⁴Oziasqa runasninta kacharqa Betomestaimman, Bebaimman, Cobaman, Colaman, tukuy Israel orqo cheqasmampis, imachus pasasqanta willanankupaj, tukuy llojsinankupajtaj enemigospa qhepankupi, chinkachinankupaj.

⁵Chayta yachaspa israelitasqa ujllapi tukuyninku kachaykukorqanku enemigosninkuta mask'aj. Asirioswan tinkuspa israelitasqa atiparqanku. Chaymantataj, qhepankupi rerqanku Hobakama. Jerusalempi tiyakojkunapis, orqospi tiyakojkunapis, yachaytawan imachus pasasqanta enemigosninkoj jarankupi, llojserqanku enemigosninkuta mask'aj. Galaad llajtayojkuna, Galilea llajtayojkunataj Damascoman, qaylla ranchosmampis chayarqanku. Asiriosta ñauparqanku. Chaypitaj ashkha asiriosta wañucherqanku.

⁶Betuliamanta runasqa uraykamorqanku asiriospa jarankuman. Yaykuspataj, qhapaj imasta apakaporqanku.

⁷Maqanakuymanta kutimuspa israelitasqa jarapi puchusqanta apakapullarqankutaj. Orqospi tiyakojkunapis, pampapi tiyakojkunapis, yaykullarqankutaj jaramanqa chajmaj jina, junt'a kasqanrayku tukuy ima laya imaswan.

⁸Kuraj sacerdote Joaquinwan, Israelmanta kurajkunawan, Jerusalempi tiyakunku chaykuna, jamorqanku Betuliaman, rikuyta munaspa kikin cheqata maypichus chay jina t'ukuna imasta ruwasqa Señorqa Israelpaj. Munarqankutaj Juditta rejsiyta ninankupaj ancha kusisqas kasqankuta ruwasqanmanta.

⁹Wasinman chayaspa, tukuyninku payta alabaykorqanku, nispa: Qanrayku Jerusalén umanta oqharin. Israel ayllu ukhupi mana ni pi aswan rejsisqachu kanqa qanmantaqa. Ayllunchej ukhupi jatunyachisqa kanki tukuykunamanta astawan.

¹⁰Makiykiwan kayta ruwarqanki. Israelman jatun favorta ruwanki. Señorqa yanapasorqa. Tukuy Atiyniyoj Señor wiñaypaj bendicisuchun, nispa. Tukuy runastaj nerqanku: Amén.

¹¹Kinsa chunka día junt'ata israelitasqa rej kanku jaraman, tukuy imata apakapoj. Juditman qorqanku Holofernespa wasi toldonta, qolqe vasosninta, puñunasninta, tukuy imasnintawan. Payqa wakinta churaykorqa mulanman, wakintataj wakaswan aysasqa carretasman.

¹²Israelita warmisqa llojserqanku payta rikoj, alabaspa tususpataj. Juditqa jaywaj sach'a ramasta paywan rejkunaman.

¹³Umasninkuman churakorqanku olivosmanta pillusta. Chantaqa, Judit ñaupaqenkuta rispa tususarqa. Qhepapi qharis rerqanku, maqanakunasninkuwan, pilluchasqas, takispa.

¹⁴Juditqa, Israel chaupipi, takiyta qallarerqa. Paywan tanta, tukuyninku takillarqankutaj kay jinata: