Read Quechua Bolivia DC Bible JUDIT 16 Bible Online

JUDIT 16 - Quechua Bolivia DC Bible bible

JUDIT 16

¹Diosniyman takiychej bombota tocaspa. Señorman takiychej sonachispa. Yupaychana takiyta takipuychej. Sutinta qhapariychej alabaspa.

²Señorqa atin maqanakuykunata tukuchiyta. Payqa librawarqa qhatiykachawajkunamanta. Pusawarqataj maypichus ayllun kasharqa chayman.

³Asiriosqa jamorqanku patanejpi kaj orqosmanta. Waranqa waranqa soldados jamorqanku. Pampastaqa junt'aykorqanku. Caballosninku tukuy lomaspi kasharqanku.

⁴Nerqanku ruphaykuchinankuta noqaj jallp'ayta. Nerqanku espadawan wañuchinankuta llajta masisniy waynasta. Nerqanku ch'allpanankuta ñuñojkunata. Nerqanku presochasqasta apakapunankuta lloqhallastawan imillastawan.

⁵Tukuy Atiyniyoj Señortaj mana munarqachu munayninku ruwasqa kananta. Uj warminejta paykunata atipaykun.

⁶Asiriospa kamachejninta mana waynaschu urmacherqanku. Mana kallpayojkunachu payta atiparqanku. Mana jatuchej runaschu umanman urmarqankuchu. Merarej wawan Judit payta atiparqa k'acha kayninwan.

⁷Payqa luto p'achasninta lluch'ukorqa. Perfumewan uyanta jawikorqa, sarusqa israelitasta salvananrayku.

⁸Sumajta umanta k'achancharqa. Ch'aukiyanampaj mosoj p'achata churakorqa.

⁹Juditpa juk'utasnin gustarqa Holofernesman. Juditpa k'acha kayninta munakorqa Holofernesqa. Espadataj kunkanta k'utorqa.

¹⁰Persasqa manchachikorqanku ruwasqanta yachaspa. Medospis manchachikullarqankutaj jina wapu warmi kasqanmanta.

¹¹Chaypacha, sarusqa aylluy sinch'ita qhaparerqa. Paykunataj manchachikorqanku. Aylluy qhaparerqa. Paykunarí ayqerqanku.

¹²Mana kallpayoj lloqhallasta jina paykunata wañucherqanku. Wajtarqanku k'ita kamachista jina. Señorniypa ejérciton paykunata chinkacherqa!

¹³Diosman takisaj mosoj takiyta. Señor, qan jatun kanki, gloriayoj kanki. Yupaychanapaj jina kanki, ni pejpa atipanan.

¹⁴Tukuy ruwasqasniyki qanta sirvisuchun. Qan simiykita kicharerqanki. Qhajpacha tukuy ima rikhurimorqa. Phukuykorqanki, tukuy imataj kayta qallarerqa. Tukuy uyarisunku qhaparejtiyki.

¹⁵Orqosqa kuyurinkupacha, qochaswantaj chajrukunku, qaqas unuyanku ñaupaqeykipi. Yupaychasojkunata allin ñawiwan qhawanki.

¹⁶Q'apaj rikuchikusqa mana ni ima qampajqa. Ruphaykuchisqa wirapis mana ni ima. Señorta yupaychajqa jatunmin kanqa.

¹⁷Aylluyta chejnikojkuna castigasqas kanqanku. Tukuy Atiyniyoj Señor, paykunata castiganqa juicio p'unchaypi. Paykunataqa jaywanqa nina larwayman, khurusmampis. Paykunaqa nanayta waqanqanku wiñaypaj.

¹⁸Jerusalenman chayaspa, Diosta yupaycharqanku. Runas llimphuyachikusqankumantawan, jaywarqanku ruphana jaywanasta rikuchikustawan.

¹⁹Juditqa qorqa Diospaj Holofernespa vasosninta, israelitas payman regalasqanku chayta. Ajinallatataj, catre warkhunatapis, wasi toldomanta apakapusqan chayta.

²⁰Kinsa killa junt'ata runasqa fiestata ruwarqanku Jerusalempi, templo plazapi. Judittaj paykunawan qhepakorqa.

²¹Fiesta tukukapusqanmantataj, sapa uj kutimporqa llajtanman. Juditqa kutimporqa Betuliaman, jallp'asninta llank'achinampaj. Kausakusqampi sutenqa may rejsisqa karqa tukuynejpi.

²²Ashkha qharis munarqanku paywan casarakuyta. Manasés qosan wañupusqanmantapacha, ñaupa tatasnimpaman ripuspa, Juditqa mana watejmanta casarakorqachu.

²³Sutin rejsisqapuni karqa. Qosampa wasimpi tiyakorqa pachaj phishqa watayoj kanankama. Warmi kamachinta libreman tukucherqa. Betuliapi wañuporqa. Payta p'amparqanku qosampa ladompi, qaqapi ruwasqa sepulturapi.

²⁴Israel ayllu waqarqa qanchis día junt'ata. Judit manaraj wañushaspa, kapuyninta saqesqa Manasespa familianman, kikin paypa familianmampis.

²⁵Judit kausakushajtin mana ni pi rerqachu israelitaswan maqanakoj. Ajinallataj wañupusqanmanta qhepamampis.