Read Quechua Bolivia DC Bible JUDIT 2 Bible Online

JUDIT 2 - Quechua Bolivia DC Bible bible

JUDIT 2

¹Chunka pusajniyoj kaj watapiña kashajtin Nabucodonosorpa kamachikusqanmanta, ñaupaj killapi, iskay chunka iskayniyoj kaj diapi, reypa wasimpi, reypa kuraj kaj runasnin tantakorqanku parlanankupaj imatachus ruwanankumanta llakichinankupaj reypa contrasninta, reypa nisqanman jina.

²Rey Nabucodonosorqa wajyacherqa tukuy kamachejkunata, paykunamantaj willarqa munasqanta pakayllamanta wañuchiyta tukuy chay karu llajtaspi tiyakojkunata.

³Paykunaqa nerqanku allinmin kasqanta reyta mana kasukojkunata wañuracheyqa.

⁴Parlayta tukusqankumantataj, Asiriaj reynin Nabucodonosor wajyacherqa Holofernesta. Chay Holofernesqa reypa qhepampi jamoj, jatun kamachejtaj karqa reypa ejercitonmanta.

⁵Nichimorqataj Holofernesman: Kayta nisunki jatun rey, tukuy pachapi kamachej: Mask'anayki tiyan pachaj iskay chunka waranqa wapu runasta, chakipi purejkunata. Chantaqa, chunka iskayniyoj waranqa wapu runastapis, caballopi rejkunata.

⁶Paykunawan khuska kachaykukunki inti yaykuynejpi kaj llajtasman. Chaypi tiyakojkuna runasta llakichinki, noqaj nisqayta mana uyarikusqankurayku.

⁷Ninkitaj noqaman k'umuykukunankuta, ancha phiña kasqayrayku. Paykunata ñak'arichej risaj. Runasniy paykunaj jallp'asninkuta junt'aykonqanku, tukuy imata apakaponqankutaj.

⁸Pampasqa wañusqaswan junt'a kanqa. Wayq'ospis mayuspis ayaswan junt'anqanku wasarinankukama.

⁹Ashkha runasta presochaspa, mundoj k'uchusninman pusaykuchisaj.

¹⁰Qanqa ñaupakuy, jap'imuytaj chay jallp'asta noqaj sutiypi. Kasukojkunata waqaychallanki noqa jamunaykama, noqapuni castiganaypaj.

¹¹Mana kasukojkunatarí, ama khuyankichu. Mayllapipis chay laya runastaqa wañuchinki, imasninkutataj apakapullanki.

¹²Noqaqa niyki, kausayniyrayku atiyniyraykutaj. Noqa kikiy junt'asaj chay nisqaytaqa.

¹³Imatachus nerqayki ruwankipuni. Rillayña kamachisusqayta junt'aj, mana ni imata qonqaspa.

¹⁴Holofernesqa chay kikimpacha wajyacherqa Asiria ejercitomanta generalestawan capitanestawan.

¹⁵Paykunawan ajllarqa pachaj iskay chunka waranqa chakipi rej soldadosta, chunka iskayniyoj waranqa caballopi rej wach'ina soldadostawan.

¹⁶Tukuy paykunataqa maqanakuman rinankupaj wakicherqa.

¹⁷Chaymantataj, tantaykorqa may chhika camellosta, burrosta, mulasta ima, q'epista apanankupaj. Tantaykorqataj ovejasta, wakasta, cabrastawan mikhuyninkupaj.

¹⁸Wakicherqataj mikhunata sapa runapaj. Chantapis, qoritawan qolqetawan.

¹⁹Ajinamanta ari, Holofernesqa ñaupaykorqa Nabucodonosorta. Llojserqa carroswan, caballoswan, chakipi rej runaswampis, castigayta munaspa inti yaykuynejpi kaj llajtasta.

²⁰Soldadoswan khuska, runasqa junt'ita rillankutaj, langostas jina, t'iyu jina, mana yupanapaj jina.

²¹Tukuy paykunaqa Ninivemanta llojserqanku. Kinsa diata purispa chayarqanku Bectilet pampaman. Bectiletmantataj rillarqankupuni. Pata Cilicianejpi orqospi jarakorqanku.

²²Chaymanta orqospi kaj llajtasman kachaykukorqa Holofernesqa chakipi rej soldadosninwan, caballoswan, carroswan ima.

²³Fun llajtata Lud llajtatawan t'unarparicherqa. Rasis llajtatataj chinkacherqa. Chinkacherqataj ismaelitasta, Queleón urapi, ch'in pampa qayllapi tiyakojkunata.

²⁴Eufrates mayunta pasarqa. Mesopotamiantataj rispa t'unaykucherqa q'ala perqachasqa llajtasta Abrona mayumantapacha jatun qochakama.

²⁵Tukuy payman oqharikojkunata Ciliciapi atiparqa. Chaypitaj sayarqa. Chaymanta Jafet cheqaman chayarqa, urapi kajman, Arabiaj qayllampi.

²⁶Tukuy madianitasta muyuykorqa. Jarasninkuta ruphaykucherqa. Uywasninkutataj jap'ikaporqa.

²⁷Chantaqa, Damasco pampaman uraykamorqa trigo oqharina tiempopi. Tukuy chajrasta ruphaykucherqa. Ovejastawan wakastawan wañuracherqa. Llajtaspi suwakorqa. Tukuy waynastapis espadawan t'ojsispa wañuracherqa.

²⁸Mar qayllapi tiyakojkuna, Sidompi, Tiropi, Surpi, Ocinapi ima, anchatapuni manchachikorqanku Holofernesmanta. Ajinallatataj Jabniapi tiyakojkuna, Asdodpi tiyakojkuna, Ascalompi tiyakojkuna ima.