Read Quechua Bolivia DC Bible JUDIT 3 Bible Online

JUDIT 3 - Quechua Bolivia DC Bible bible

JUDIT 3

¹Tukuy chaykunaqa Holofernespaman kachasta kacharqanku paywan allimpi kausakunankupaj. Paykunaqa, paypaman chayaspa, kay jinata nerqanku: Noqaykoqa, jatun rey Nabucodonosorpa kamachisnin kayku. Qanman k'umuykukuyku. Munasqaykiman jina imallatapis noqaykuwan ruwallay.

³Jap'ikapullay wasisniykuta, jallp'asniykuta, trigo chajrasniykuta, wakasniykuta, ovejasniykuta, tukuy uywasniykuta ima. Tukuy chaykunawanqa imallatapis ruway, munasqaykiman jina.

⁴Makisniykipi kanku llajtasniyku, chaypi tiyakojkunapis. Jamuy, imatachus munanki, ruwallay, nispa.

⁵Kachasqa Holofernespaman chayamorqanku. Tukuy chaytataj nerqanku.

⁶Payrí mar chimpaman uraykamorqa soldadosninwan khuska. Runasninta churarqa perqachasqa llajtaspi. Chay llajtasmanta runastapis ajllakullarqataj soldadosninta yanapanankupaj.

⁷Chay llajtaspi, qaylla ranchospipis runasqa payta reciberqanku t'ikanchasqas, bombosta tocaspa, tususpataj.

⁸Holofernesqa templosta t'unararqa. Santo sach'asninkutapis urmaykuchillarqataj. Pay tukuchinan karqa tukuy chay jallp'aspi dioskunata, tukuy runas Nabucodonosorllaman k'umuykukunankupaj. Pay kamachinan karqa tukuy runas, tukuy laya parlayniyoj, tukuy ayllusmanta kajkuna ima, Nabucodonosorta yupaychanankuta uj diosta jina.

⁹Ajinamanta, Holofernesqa chayarqa Escrelonman, Dotán qayllaman, Judea orqos qayllaman.

¹⁰Jarakorqataj Gabamanta Escitopolismanta chaupinkupi. Chaypitaj uj killa junt'ata qhepakorqa mikhunata tantaspa runasnimpaj.