Read Quechua Bolivia DC Bible JUDIT 4 Bible Online

JUDIT 4 - Quechua Bolivia DC Bible bible

JUDIT 4

¹Judeapi tiyakojkuna israelitasqa uyarerqanku imatachus waj nacioneswan ruwasqa Holofernes, Asiria rey Nabucodonosorpa ejercitonmanta jatun kamachej. Yacharqankutaj imaynatachus Holofernesqa suwasqa templosmanta, templosta urmaykuchisqataj.

²Anchatapuni manchachikorqanku yuyaspa Jerusalempipis Señor Diosninkoj templonta kikillantataj urmaykuchinanta. Holofernesmantaqa anchata manchachikusharqanku.

³Mana unayrajchu kasqa llajtankuman kutimpusqankoqa. Watejmantataj llimphuyachisqanku templota, altarta, temploj imasnintawan, enemigosninku ch'ichichasqanku chaykunata.

⁴Tukuy chaytaqa willacherqanku israelitasman Samariamanta, Conamanta, Bet-horonmanta, Ibleammanta, Jericomanta, Cobamanta, Hazormanta, Salem pampamanta ima.

⁵Sayarqanku pata orqospi. Sapa ranchoj muyuynimpi perqasta ruwarqanku. Mikhunata tantaykorqanku. Tukuy chaywanqa maqanakupaj wakichikorqanku. Chajrasninkumanta cosechatapis oqharisqankuña.

⁶Chay tiempopi jatun sacerdote karqa Jerusalempi uj runa Joaquín sutiyoj. Pay uj cartata apachimorqa Betuliapi tiyakojkunaman, Betomeistaimpi tiyakojkunamantaj. Chay Betomeistaim llajtaqa pampaj ñaupaqempi kasharqa Dotampa qayllampi, Esdrelompa chimpampi.

⁷Chay cartampeqa Joaquín nisharqa sayanankuta orqosman pusaj wicharina ñampi maynintachus enemigosqa wichariyta atinkuman Judeaman. Chaypi atikullanman ñanta jark'ayta imaraykuchus chaynejpi ñanqa k'ullku, iskay runaslla purinankupaj jina.

⁸Israelitasqa ruwarqanku imatachus jatun sacerdote Joaquinwan, tukuy Israel aylloj kurajkunasninwan, Jerusalempi tiyakunku chaykunawan ima, ruwanankuta nisqanku.

⁹Tukuy israelitasqa tukuy sonqo Diosmanta mañakorqanku. Paypa ñaupaqempi k'umuykukorqankutaj.

¹⁰Qhashqa p'achaswan p'achallikorqanku qharispis, warmispis, wawaspis, uywaspis, karu llajtayojkunapis, paykuna ukhupi tiyakojkuna kamachispis, wata runaspis.

¹¹Temploj ñaupaqempi qonqorikorqanku Diosmanta mañakuspa tukuy israelitas Jerusalempi tiyakojkuna, qharispis, warmispis, wawaspis. Umasninkuman ushphata churakorqanku, Diospa ñaupaqempitaj qhashqa p'achasninkuta mast'aykorqanku.

¹²Altartapis qhataykorqanku qhashqa phulluswan. Uj similla qhaparikorqanku tukuy sonqo Israelpa Diosninman, mañakuspa ama saqenanta chay mana creejkuna runas, paykunamanta asirikuspa apakapunankuta wawasninkutawan warmisninkutawan. Mañarikullarqankutaj ama saqenanta llajtasninku phirisqas kanankuta, templopis ch'ichichasqa kananta.

¹³Señortaj uyarerqa qhaparikusqankuta, qhawarqataj llakisqas kasqankuta. Tukuy Judeapi runasqa unayta mana mikhuspalla kasharqanku.

¹⁴Jatun sacerdote Joaquín waj sacerdoteswan khuska, templopi sirvejkunawantaj qhashqa p'achaswan p'achallikorqanku jaywanankupaj Señorman sapa día rikuchikusta, runaspa apasqankutawan, Diosmanta mañakuspa.

¹⁵Ushphata churarqanku ch'ulusninkuman. Chay ch'ulusta churaykuspataj Diosmanta mañakoj kanku, mana sayk'uspa, tukuy Israel ayllunmanta khuyakunanta.