Read Quechua Bolivia DC Bible JUDIT 5 Bible Online

JUDIT 5 - Quechua Bolivia DC Bible bible

JUDIT 5

¹Asiria ejercitomanta general Holofernesman willarqanku israelitas wakichikusqankuta maqanakupaj. Nerqankutaj israelitasqa wisq'asqankuta orqosman pusaj ñanta. Nillarqankutaj rumi jark'anasta churasqankuta orqos patapi pampaspitaj.

²Chayta uyariytawanqa Holofernes anchatapuni phiñakorqa. Moabmanta kurajkunasta wajyacherqa, Amonmanta kamachejkunatawan, jatun qochaj chimpampi kamachejkunatawantaj.

³Tukuy paykunamantaj kay jinata nerqa: Canaán runas, allinta willawaychej. Pikuna kankuri chay runas orqospi tiyakunku chaykuna? Ima llajtaspi tiyakunkuri? Kallpayojchu kanku? Imapitaj atiyninku kashanri? Imataj kamachejninkoj sutinri?

⁴Imaraykutaj paykunaqa mana jamunkuchuri ñaupaqeyman, imaynatachus ruwarqanku waj naciones inti yaykuynejpi tiyakojkuna, ajinata?

⁵Tukuy amonitaspa kamachejnin Aquiorqa kay jinata kuticherqa: Uyarillay imatachus nisunay tiyan. Cheqanta willasqayki orqospi tiyakunku chay runasmanta, kay qayllaykillapi. Manapuni llullakusajchu ni imapi.

⁶Chay runaspa ñaupa tatasninku Caldeamanta jamorqanku.

⁷Ñaupa tiempospi, tatasninku mana munasqankuchu Caldeamanta dioskunata yupaychayta. Chay jawa Mesopotamiaman ripusqanku.

⁸Paykunaqa ñaupa tatasninkoj ñanninkumanta karunchakusqanku, qallarisqankutaj yupaychayta janaj pachapi kaj Diosta, rejsisqanku chayta. Wijch'uchikuspa ñaupa dioskunasninkoj ñaupaqenkumanta, Mesopotamiaman ripusqanku. Chaypitaj unayta tiyakusqanku.

⁹Diosninku paykunaman nisqa tiyakunankuta Canaán jallp'api. Chaypi tiyakusqanku, qhapajyasqankutaj qoriwan, qolqewan, ashkha uywaswan ima.

¹⁰Chaymanta, Egiptoman uraykorqanku, Canaampi yarqhay rikhurimusqanrayku. Chaypitaj kakorqanku mikhunarayku. Chaypi mirarqanku mana yupay atinata.

¹¹Egiptopi kamachejqa contrankupi sayarisqa, asipayasqataj wata runasman tukuchispa. Kamachisqataj adobesta ruwanankuta. K'umuykuchisqa paykunataqa kamachisman tukuchispa.

¹²Paykunaqa Diosninkuman qhaparikorqanku. Diosninkoqa castigarqa Egiptota millay onqoykunawan. Chantaqa, egipciosqa qharkorqanku paykunata jallp'asninkumanta.

¹³Paykunaj ñaupaqenkupi Diosninku ch'akicherqa Puka Qochata.

¹⁴Chaymantataj, Diosninkoqa paykunata pusarqa Sinaí ñanninta, Cades Barnea ñannintataj. Paykunaqa wakhiyamorqanku ñaupaqenkumanta ch'in pampapi tiyakoj runasta.

¹⁵Chantá, tiyakorqanku Amorreospa jallp'asninkupi. Sinch'i kallpankuwantaj chinkacherqanku tukuy Hesbompi tiyaykojkunata. Chaymantataj, Jordán mayuta pasaspa, orqospi sayarqanku.

¹⁶Ñaupaqenkumanta wakhiyamorqanku cananeosta, fereseosta, jebuseosta, siquemitasta, tukuy gergeseosta ima. Chaypitaj unayta tiyakoj kanku.

¹⁷Mana juchallejtinkoqa Diosninkoj ñaupaqempi, sumajta kausakoj kanku. Diosninku juchataqa chejnikun ari.

¹⁸Maypachachus karunchakorqanku Diosninku rikuchisqan ñanmanta, wakinku phiri chinkachisqas karqanku mana yupayta atina ch'ajwaspi. Wakintaj apasqa karqa karu llajtasman, Diosninkoj templon pampachasqa karqa, llajtasninkurí contrasninkoj makisninkuman urmarqanku.

¹⁹Chaypacha, paykunaqa watejmanta kutirikorqanku Diosninkuman. Ch'eqerasqas kasqankumanta kutimporqanku. Watejmanta Jerusalén llajtata jap'ikaporqanku, maypichus templonku kashan, chay llajtata. Chay orqospi, ñaupajta ch'impacha karqa chaypi, ujtawan runas tiyakorqanku.

²⁰Kunanqa, wiraqocha kamachejníy, rikunaraj sichus paykunaqa juchallikushanku Diosninkoj contrampi. Juchallikushanku chayqa, wicharini paykunawan tinkoj.

²¹Sichus mana ni ima jucha kanchu paykuna ukhupi, amapuni riychu. Pajtataj Diosninku yanapanman paykunataqa. Chaypacha, mundontimpi runas asirikunkuman noqanchejmanta.

²²Chayta niytawantaj Aquiorqa, tukuy runas jara toldonejpi kajkuna thutuyta qallarerqanku. Holofernespa kurajkuna runasnin, mar chimpamanta jamojkuna, moabitaspis, munasharqankuña Aquiorta wañuchiyta.

²³Nisharqankutaj: Mancharikusunchejchu israelitasmanta? Mana kallpayojchu kanku. Mana atiyniyojchu kanku. Maymanta sayankuman sinch'i ch'ajwapiri? Jaku! Wicharinallaña! Noqayku runasniyki paykunata oqosqayku, Holofernes, nispa nisharqanku.