Read Quechua Bolivia DC Bible JUDIT 6 Bible Online

JUDIT 6 - Quechua Bolivia DC Bible bible

JUDIT 6

¹Ch'in kajtinkuña Holofernesqa, Asiria ejercitomanta jatun kamachej, nerqa Aquiorman moabitasmampis, waj llajtayojkunaj ñaupaqenkupi: Pitaj kanki, Aquior, Efrainmanta runasniykipis, sayarinaykipaj noqayku ukhupi profeta jina, ninawaykupajtaj ama rinaykuta maqanakoj Israel aylluwan, nispa Diosninku paykunata yanapanan kasqanta? Manachu uj dioslla tiyan, chay diostaj Nabucodonosor? Nabucodonosorqa sinch'i atiyninwan israelitasta kay pachamanta chinkachenqa. Diosninkoj atiynenqa manapuni librayta atenqachu.

³Noqayku, Nabucodonosorpa kamachisnin paykunata sarusqayku uj runallata jina. Mana atenqankuchu sayayta caballosniykoj ñaupaqenkupi.

⁴Tukurparichisqayku. Orqosninku yawarninkuwan machaykukonqanku. Pampasninku ayaswan qhatakonqanku. Mana qhepakonqankuchu chakipi, noqayku ñaupaqenkupi rikhurimojtiyku. Chinkachisqaspuni kanqanku. Kayta nisunkichej mundontimpi kamachej rey Nabucodonosor. Pay parlarqaña. Nisqanqa mana qhasichu kanqa.

⁵Qanrí, Aquior, Amonmanta runa, sajra sonqowan parlarqanki. Kunanmantapacha, amapuni qayllamuwaychu castigachinaykama chay runasta Egiptomanta jamojkunata.

⁶Kutimojtiy, soldadosniy tukuy runasniypis lanzasninkuwan t'ojsisonqanku. Qanqa israelitas jina wañunki.

⁷Kunanqa, runasniy pusasonqanku orqosman. Saqerparisonqanku uj llajtapi, kinraypi.

⁸Manaraj wañunkichu. Paykunawan khuska wañunki.

⁹Ichapis sonqoykipi nishanki mana atipasqaschu kanankuta. Qhasillamanta chayta yuyashanki. Nisqayqa junt'akonqapuni!

¹⁰Chayta niytawantaj, Holofernes kamacherqa paywan kaj soldadosta presochanankuta Aquiorta, pusanankutataj Betuliaman, jaywanankutataj israelitasman.

¹¹Holofernespa runasnin Aquiorta jap'iykorqanku. Jara toldomanta llojsichispataj pusakaporqanku pampaman. Chaymantataj pusarqanku orqosman. Chayarqankutaj juturisman, Betulia uranejman.

¹²Betuliamanta runasqa, rikuspa wicharisqankuta, jap'erqanku maqanasninkuta. Llajtamanta llojsispataj, orqo pataman wicharerqanku. Warak'asninkuwan rumista choqaykorqanku. Ajinamanta, jark'arqanku wicharinankutaqa.

¹³Paykunarí, kinraynillanta rerqanku. Aquiorta wataytawantaj, orqo sikipi saqerqanku. Chayta ruwaspa, kutimporqanku kamachejninkojpaman.

¹⁴Israelitasqa llajtankumanta uraykorqanku. Aquiorman qayllaspataj phaskararqanku, pusarqankutaj Betuliaman, kamachejkunajpaman.

¹⁵Kamachejkuna karqanku Miqueaspa wawan Ozías, Simeón ayllumanta; Otonielpa wawan Cabris, Malquielpa wawan Carmis ima.

¹⁶Chay kamachejkunaqa wajyacherqanku tukuy llajtamanta kurajkunata. Waynaspis warmispis chayta uyariytawantaj tantakuyman jamorqanku uskhayllata. Aquiorta churarqanku runaspa chaupinkupi. Osiastaj taporqa imachus pasasqanmanta.

¹⁷Payrí willarqa imatachus Holofernespa tantakuynimpi nerqanku. Willaykorqa imatachus pay kikin nerqa Asiriamanta generalespata ñaupaqenkupi. Willaykorqataj Holofernespa jatuchej palabrasninta.

¹⁸Tukuy runas pampaman k'umuykukorqanku Diosta yupaychaspa, qhaparerqankutaj: Señor, janaj pachapi kaj Dios, qhaway contrasniykoj wapu kayninkuta. Khuyakuwayku noqaykuta, pampaman urmachisqas kajkunata. Qhaway kay ajllakusqayki aylluykita.

²⁰Chaymanta sonqocharqanku Aquiorta, anchata alabaspa.

²¹Osías llojsicherqa Aquiorta tantakuymanta, wasinmantaj pusarqa. Chantaqa, uj mikhunaman wajyarqa kurajkunata. Chay tuta mañakorqanku Diospa yanapayninta.