Read Quechua Bolivia DC Bible JUDIT 7 Bible Online

JUDIT 7 - Quechua Bolivia DC Bible bible

JUDIT 7

¹Q'ayantin, Holofernes ordenta qorqa tukuy soldadosninman, tukuy yanapaj runasmampis, jaramanta llojsinankuta Betuliaman rinankupaj. Nerqa jap'inankuta orqosman pusaj ñankunata, Israelwan maqanakunankupaj.

²Chay kikimpacha, tukuy soldadosqa jaramanta llojserqanku. Tukuyninkupi pachaj qanchis chunka waranqa karqanku chakipi rej runasqa. Caballospi rej runastaj chunka iskayniyoj waranqa karqanku, mana yupaspa q'epirista nitaj waj yanapajkunatapis.

³Yaykorqanku pampaman, Betuliaj qayllampi kashan chayman, juturisnejman. Ch'eqerakorqankutaj Dotanmanta Ibleamkama. Chaymanta Betuliamanta Siamonman, Esdrelompa chimpanman.

⁴Israelitasqa, rikuspa chay mana yupayta atina runasta, qharkatitispa, paykunapura ninakorqanku: Kunanqa q'alata ruthuykonqanku jallp'aykuta. Ni pata qaqaspis, ni lomaspis jark'ayta atinkumanchu chay chhika runasta.

⁵Chaymanta, sapa uj maqananta jap'erqa. Jark'ana torres patapi kanaykorqanku. Ajinamanta, tutantinta mana puñuspalla kakorqanku.

⁶Q'ayantintaj. Holofernesqa kachaykorqa caballopi rej runasninta, israelitas qhawashajtinku Betuliamanta.

⁷Allinta rikorqa llajtaman pusaj cheqanchanasta juturistawan. Chaypi soldadosta churarqa. Chaymantataj riporqa.

⁸Chaymantataj, Edommanta kamachejkuna, Moabmanta kamachejkuna, mar chimpapi nacionesmanta kamachejkunawantaj, Holofernesman qayllaspa nerqanku: Uyariwayku, wiraqochi. Nisqaykuta uyarinki chayqa, runasniykimanta ni ujllapis urmanqachu.

¹⁰Israelitasqa mana yuyashankuchu atipayta atinankuta kallpankuwan, mana chayqa yuyashanku atipayta atisqankuta orqo pataspi tiyakusqankurayku. Ñak'aymanta wicharikun ari chay orqosmanqa.

¹¹Kunanqa, wiraqochi, ama tinkuyman riychu rikuchikuspalla. Chayta ruwanki chayqa, nisqaykuman jina, ni uj soldadoykipis urmanqachu.

¹²Ama kuyuychu jaraykimanta. Chaypi waqaychay tukuy soldadosniykita. Kamachisniykirí richunku juturita jap'ej, orqo sikipi kashan chayta.

¹³Chay juturimanta wisinku yakuta Betulia runas. Ch'akichikuspataj urmallanqanku makisniykiman. Chaykama, noqayku runasniykuwan wicharisqayku aswan qaylla orqo puntasman. Chaypi kakullasqayku. Ajinamanta, mana ni pi atenqachu llajtamanta llojsiyta.

¹⁴Yarqhaywan wañonqanku warmisnintin, wawasnintin. Mana espadapis qayllaspalla, winkusqasña kanqanku wasi punkusninkupi.

¹⁵Qanrí, castiganki paykunata oqharikusqankumanta, mana munaspa tukuy sonqo qanman qayllayta.

¹⁶Allinmin rijch'arqa Holofernesman nisqankoqa, ajinallataj generalesninmampis. Chayrayku nerqa nisqankuman jina ruwanankuta.

¹⁷Moabitaswan khuska kachaykukorqanku phishqa waranqa asirios. Pampasman chayaspa jap'ikaporqanku pujyusta juturistawan.

¹⁸Edomitastaj amonitastaj wicharerqanku orqoman, Dotampa patanman. Wakinku rerqanku uraman. Wakinkutaj inti llojsiyman, Egrebelpa chimpanman, Cuspa qayllanman, Mocmur wayq'o pataman. Waj asirio soldadostaj jarakorqanku pampapi, tukuy chay cheqata junt'aykuspa. Wasi toldosninkuwan q'episninkuwantaj may jatun jaraku karqa, may ashkha runas kasqankurayku.

¹⁹Israelitasqa, qhaparispa majakorqanku Señor Diosninkumanta. Manchachikusharqankuña. Contrasninku paykunata muyuykushasqankuña, manataj karqachu ni uj k'uchupis ayqenankupaj.

²⁰Kinsa chunka tawayoj día junt'ata, Asiriamanta soldadosqa carrosninkuwan caballosninkuwantaj paykunata mat'iykusharqanku. Betuliapi tiyakojkuna rikusharqankuña yakunku tukukapushasqanta.

²¹Yaku jallch'anasninkupitaj yakoqa ch'akikapusharqaña. Sapa día pisillata ujyaj kanku.

²²Wawasqa onqoyta qallarerqanku. Warmispis, waynaspis, sipaskunapis ch'akichikuymanta wañusharqankuña. Callespi llajta punkuspipis urmaj kanku, llauch'ispacha.

²³Runasqa mask'arqanku Oziasta kamachejkunatawan. Paykunaman qayllarqanku waynas, sipaskuna, warmis, wawas, sinch'ita qhaparispa, kurajkunaj ñaupaqenkupi. Nerqankutaj: Diosninchej cheqanyachichun qankunatawan noqaykutawan. Qankunaqa anchatapuni llakichiwayku mana munaspa allinllamanta parlarikuyta asirioswan.

²⁵Kunanqa, mana ni pi kanchu yanapanawaykupaj. Diosqa makisninkuman jaywaykuwayku wañunaykupaj ñaupaqenkupi ch'akichikuywan.

²⁶Wajyallaychejña paykunata. Yaykullachunkuña llajtaman Holofernespa runasnin. Jap'ikapullachunku tukuy imata.

²⁷Aswan walej kanman noqaykupaj makisninkupi urmayqa. Kamachisninkuchá kasqayku. Jinapis, kausasqayku, manataj rikusqaykuchu kikin ñawisniykuwan wawasniyku wañunankuta, nitaj rikusqaykuchu wañuchejta warmisniykutawan wawasniykutawan.

²⁸Kunampuni riychej. Chaytaqa niyku janaj pacharayku kay pacharaykutaj. Chantapis, ñaupa tatasninchejpa Señor Diosninrayku. Payqa castigawarqanchej juchasninchejrayku, ñaupa tatasninchejpa juchasninkuraykutaj.

²⁹Chayta niytawantaj tukuyninku paran paranta waqarqanku, qhaparispataj mañarikorqanku Señor Diosninkumanta.

³⁰Oziasqa paykunaman nerqa: Sonqochakuychej, hermanosníy. Suyarinallaraj phishqa diata. Chaykama Señor Diosninchej khuyawasunchej. Manapuni saqerpariwasunchejchu.

³¹Sichus phishqa día pasaytawan mana salvasqas kasunchejchu, ruwasaj nisqaykichejman jina.

³²Chantaqa nerqa ripunankuta. Qharis riporqanku jark'anasman llajta torresmampis, warmistaj wawastaj wasisninkuman. Llajtapeqa, mayllapipis llakiy karqa.