Read Quechua Bolivia DC Bible JUDIT 8 Bible Online

JUDIT 8 - Quechua Bolivia DC Bible bible

JUDIT 8

¹Tukuy chaytaqa uyarisqa Judit. Juditqa Merarej wawan karqa. Meraritaj Uzpa wawan karqa. Uzrí Joséj wawan. Joserí Uzielpa wawan. Uzielrí Elciaspa wawan. Elciasrí Ananiaspa wawan. Ananiasrí Gedeompa wawan. Gedeonrí Rafaimpa wawan. Rafainrí Ahitobpa wawan. Ahitobrí Eliaspa wawan. Eliasrí Hilsiaspa wawan. Hilsiasrí Eliabpa wawan. Eliabrí Natanaelpa wawan. Natanaelrí Selumielpa wawan. Selumielrí Zurisadaejpa wawan. Zurisadaejpata jatun tatanqa karqa Israel.

²Juditpa qosan Manasés Juditpa ayllullamantataj karqa. Manasesqa cebada cosecha tiempopi wañuporqa.

³Manasesqa chajrampi cebadata watashajtin campo runaswan khuska, ujta ruphayrayku onqoykorqa. Wasinman aparqanku, wañorqataj Betulia llajtampi. P'ampasqa karqa ñaupa tatasninwan khuska, Dotanmantawan Ibleammantawan chaupipi kaj campopi.

⁴Kinsa wataña tawa killayoj pasarqa Judit warmi sapaman tukusqanmanta. Chay kutimantapacha wasillampi tiyakoj.

⁵Alto patapi uj llanthuchata ruwakusqa. Lutollisqapuni Juditqa purej, qhashqa p'achaswan p'achallikusqa.

⁶Sapan kakusqanmantapacha sapa día ayunota ruwaj. Samarina diasllapi visperaspitaj mikhoj. Chantapis, mikhullajtaj mosoj killa kashajtin visperampitaj. Chantapis mikhullajtaj maypachachus karqa jatun fiesta Israel ayllupaj.

⁷Juditqa k'acha uya karqa. Qosan Manasés saqesqa qorita, qolqeta, qhari kamachista, warmi kamachista, uywasta chajrastawan. Chaymanta ganakusqanwan pay kausakoj.

⁸Diosta yupaychaspa kausakusqanrayku, sumajta kausakoj tukuy runa masisninwan.

⁹Judit uyarisqa sinch'ita parlasqankuta runas Ozías kamachejman, llakisqas kashajtinku yaku pisisqanmanta. Yachallasqataj Ozías nisqanta phishqa día pasaytawan llajtata jaywananta asiriosman.

¹⁰Chantaqa, Judit kacharqa ujnin warmi kamachinta wajyaj kurajkunata Cabrista Carmistawan.

¹¹Chayajtinkutaj, paykunaman nerqa: Uyariwaychej, Betulia llajtapi kamachejkuna. Mana allinchu chay nisqaykichej runaspa ñaupaqenkupi. Nitaj allinchu chay promesa ruwasqaykichej Diospa sutimpi, jaywanaykichejmanta llajtanchejta enemigosninchejman sichus Señorninchej mana yanapawasunchejchu chay phishqa diapi.

¹²Pikunataj kankichej ninaykichejpaj ima diapichus Diosninchej yanapanawanchejtari? Pikunataj kankichej Diospa cuentanmanta sayarinaykichejpaj runas ukhupiri?

¹³Qankunaqa Tukuy Atiyniyoj Diosman condicionta churashankichej. Mana ni jayk'aj ni imata entiendenkichejchu.

¹⁴Qankunaqa manapuni atiwajchejchu runaj sonqonman yaykuyta nitaj yachayta runaj yuyasqanta. Imaynatataj entiendewajchej tukuy imata ruwaj Diospa munaynintari? Imaynatataj yachawajchej paypa yuyasqanta munasqantataj? Hermanosníy, amapuni phiñachiychejchu Señor Diosninchejta.

¹⁵Sichus pay mana yanapawasunchejchu kay phishqa diapi, yanapawasunchej ima kutipichus munanqa chaypacha. Munaspataj, jaywawasunchej enemigosninchejpa makisninkuman wañunanchejpaj.

¹⁶Ama niychejchu Señor Diosninchejman munayniykichejta ruwananta. Pay mana runachu k'umuykukunampaj runaj munayninman.

¹⁷Mañakunachej yanapanawanchejta. Sonqochakuywan salvacionta mañakuna. Payman allin rijch'anqa chayqa, uyariwasunchej.

¹⁸Kunan mana ni pi kanñachu noqanchej ukhupi, ayllusninchejpi, llajtasninchejpitaj, yupaychakoj runaj makinwan ruwasqa dioskunata. Ñaupa tiempospi ayllu masisninchej chayta ruwaj kanku.

¹⁹Chayrayku Diosqa paykunata kachaykorqa wañuyman suwachikuyman ima. Contrasninchej anchatapuni llakiykucherqanku paykunataqa.

²⁰Noqanchejqa mana rejsikapunchejchu waj diosta paymanta jawa. Chayrayku sonqochakunchej yachaspa mana qhesachanawanchejta ni noqanchejtapis nitaj waj israelitastapis.

²¹Sichus noqanchej urmasunchej, tukuy Judeapis urmallanqataj. Enemigosninchej yaykonqanku templonchejman suwakoj. Diospa ñaupaqempi noqanchej juchayoj kasunchej templonchej ch'ichichasqa kasqanmanta.

²²Ajinallatataj, juchayoj kasunchej ayllu masisninchejpa wañupuyninkumanta, llajtanchejta chinkachisqankumanta chay naciones pejkunajpatachus kamachisninku kasunchej. Contrasninchej asikonqanku noqanchejmanta, millay simiwantaj rimawasunchej.

²³Kamachisman tukusunchej chayqa, chaymanta mana ni ima allin kanqachu noqanchejpaj. Señor Diosninchej chayta tukuchenqa p'enqayman.

²⁴Chayrayku, hermanosníy, tukuy imata allintapuni ruwana, tukuy ayllu masisninchej chayta yachanankupaj. Makisninchejpi kashan tukuy ayllu masisninchejpa kausayninku, templotaj, santo cheqataj, altartaj.

²⁵Tukuy chaykunamanta agradecekunanchej tiyan Señor Diosninchejta. Payqa kunan yachayta munashan ima layamantachus kanchej, imaynatachus ñaupajta ruwarqa ñaupa tatasninchejwan ajinata.

²⁶Yuyarikuychej ruwasqanmanta Abrahamwan, nispa Isaacta wañuchinanta, chaynejta yachanampaj imaynamantachus sonqonqa. Yuyarikuychejtaj imachus pasasqanmanta Jacobman Siria Mesopotamiapi, tion Labampa ovejasninta michishajtin.

²⁷Diosninchejqa mana churawarqanchejchu jina jatun iskaychakuypi, ninaman yaykunchejman jina. Mana llakichiwashanchejchu chejniwasqanchejrayku. Payman qayllajkunata llakichin chayqa, chayta Diosninchej ruwan payman kutirinankupaj.

²⁸Juditpa nisqanta uyarispa, Ozías nerqa: Cheqanta parlanki. Mana ni pi ninmanchu pantasqaykita.

²⁹Mana kunallanchu rikuchinki yachayniyoj kasqaykita. Llajta masisninchej rejsisunku wawa kasqaykimantapacha. Tukuy yachanku cheqan sonqoyoj kasqaykita. Yachallankutaj umayoj warmi kasqaykita.

³⁰Runasqa wañupusharqankuña ch'akichikuywan. Chayrayku chayta nerqayku juramentota ruwaspa. Kunanqa, mana atiykuchu chay nisqaykuta p'akiyta.

³¹Qanqa Diosmanta mañakuyta yachanki. Mañakuy kunanqa Diosninchejmanta tukuy noqanchejpaj. Mañakuy Diosninchej parata qonawanchejta, yaku waqaychanasninchejpi yakuta junt'anantataj, ajinamanta manaña jina pisi kallpayoj kananchejpaj.

³²Juditqa nerqa: Uyariwaychej. Ruwasqaymantaqa ayllunchej yuyarikonqa wiñaypaj.

³³Kunan ch'isi qankunaqa kakuychej llajta punkusnejpi. Noqaqa warmi kamachiywan llojsisaj. Mana junt'akushajtinraj chay tiempo nisqaykichejta enemigosninchej yaykunankupaj llajtanchejman, Señorqa noqarayku salvanqa Israel ayllunta.

³⁴Amapuni yachayta munaychejchu imatachus ruwanayta. Tukuytawanqa nillasqaykichej.

³⁵Oziasqa waj kamachejkunawan khuska nerqanku: Rillay. Señorninchej ñaupaqeykipi richun enemigosninchejta castiganampaj.

³⁶Llojsiporqankutaj Juditpa wasinmanta, riporqankutaj wasisninkuman.