Read Quechua Bolivia DC Bible JUDIT 9 Bible Online

JUDIT 9 - Quechua Bolivia DC Bible bible

JUDIT 9

¹Juditqa pampaman k'umuykorqa. Ushphata churaykorqa umanman. Lluch'ukorqa qhashqa p'achanta. Sinch'ita qhaparispataj Diosmanta mañakorqa. Chay kikimpacha, Jerusalempi ch'isi yaykuy q'osñichina inciensota Diosman jaywasharqanku. Judit kay jinata nerqa: Señor, ñaupa tatay Simeompa Diosnin. Qanqa paypa makinman espadata churarqanki castiganampaj chay waj llajtayojkunata pikunachus p'enqaypi rikhuricherqanku sipas Dinata, lluch'uykorqankutaj abusanankupaj, payta ch'ichichaspa. Nejtiykipis runaqa ama chayta ruwananta, paykunaqa ruwallarqanku.

³Chayrayku nerqanki wañuchinankuta kamachejkunasninkuta. Kikin puñunapi maypichus burlakorqanku chay sipasmanta, chayllapitaj paykunapis burlachikorqanku wañuyta tarispa. Urmaykucherqanki kamachista kamachejkunasninkuwan khuska. Kamachejkunatarí urmaykucherqanki tronosnintinta.

⁴Saqerqanki warmisninku pusasqas kanankuta, ususisninku presochasqas kanankuta ima. Saqerqankitaj jallp'asninku munasqa wawasniykipaj kanankuta. Paykunaqa, qanmanta yuyarikuspa, phiñasqas, pananku p'enqaypi rikhurisqanmanta, qanmanta mañakorqanku. Kunanqa, Diosníy, uyariway noqa warmi sapata.

⁵Chay ñaupa tiempospi pasasqan, munayniykirayku ajina karqa. Ajinallataj, imachus ñaupajtataj qhepantataj pasarqa. Munayniykirayku kunampis kaykuna pasashan. Yachankiña imatachus qhepampi pasananta. Imachus ninki junt'akumpuni.

⁶Chay yuyasqayki imasqa ñaupaqeykipi rikhurimunku ninkutaj: Kaypi kayku, nispa. Qanqa yachankiña imatachus ruwanaykita. Unaymanta yachankiña imatachus ruwanayki tiyan.

⁷Kunanqa, qhaway imaynatachus asiriosqa tantaykukunku tukuy atiyninkuwan. Wapuykachashanku caballosninkuwan, jark'anasninkuwan, wach'inasninkuwan, warak'asninkuwan ima. Mana yachankuchu qampuni kasqaykita pichus nin jayk'ajchus maqanaku tukukunanta.

⁸Sutiykeqa Señor. Atiyniykiwan kallpankuta chinkachiy. Phiñakuyniykiwan atiyninkuta tukuchiy. Paykunaqa munashanku santo wasiykita ch'ichiyachiyta, maypichus jatun sutiyki kashan chay cheqata. Munashankutaj altarniykita urmachiyta maqanasninkuwan.

⁹Qhaway wapu kayninkuta. K'ajaj phiñayniykita patankuman kachaykuy. Noqa warmi sapaman qoway kallpata yuyasqayta ruwanaypaj.

¹⁰Yanapaway ch'aukiyanaypaj, kamachis urmanankupaj kamachejkunasninkuwan tanta. Uj warmej kallpanwan wapu kayninkuta urmaykuchiy.

¹¹Atiyniyki mana jamunchu runasqa ashkha kasqankumanta. Kallpayki mana jamunchu runaspa kallpankumanta. Qanqa sarusqa runaj Diosnin kanki. Qanqa qhawanki k'umuykuchisqas kajkunata. Qanqa jark'anki mana kallpayojkunata. Qanqa kacharichinki mana suyayniyojkunata.

¹²Arí, tataypa Diosnin, Israel aylloj Diosnin, janaj pachapi kay pachapitaj kamachej Dios, jatun qhochata ruwaj, tukuy ruwasqaykej reynin, mañakusqayta uyariy.

¹³Willaway ima palabrawanchus ch'aukiyachiyman paykunata pusanaypaj chinkayman wañuymantaj. Paykunaqa sajra munayninkuwan noqaykuwan chay trato ruwasqaykita p'akichiyta munanku. Urmachiyta munanku ajllakusqayki temploykita. Riyta munanku Sión orqoj contrampi, chay llajtaj contrampi mayqempichus wawasniyki tiyakunku, mayqenchus paykunaj chayaqenkutaj.

¹⁴Aylluykipis waj nacionespis yachachunku qanlla Dios kasqaykita. Yachachunku atiyniyoj sinch'i kallpayojtaj kasqaykita. Yachallachunkutaj qanlla atisqaykita Israel aylluta jark'ayta.