Read Quechua Bolivia DC Bible ESTER 1 Bible Online

ESTER 1 - Quechua Bolivia DC Bible bible

ESTER 1

¹Kaymin pasarqa Asuero rey kashajtin. Payqa pachaj iskay chunka qanchisniyoj suyusta kamacherqa. Chay llajtastaj karqanku Indiamanta Etiopiakama.

²Chay p'unchaykunapi Asueroj kamachinampa palacionqa Susa llajtapi kasharqa.

³Rey Asueroqa kinsa watataña kamachishaspa, sumaj fiestata wakicherqa, kamachiysejkunasnimpaj, yanapajkunasnimpaj, Persiamanta, Mediamantawan soldadosta kamachejkunajpa kurajkunasninkupaj, chay tukuy suyuspi kamachejkunapaj, kurajkunapajwan.

⁴Paykunataqa tantacherqa kamachiynimpa qhapaj kayninta, may jatun kayninta, atiynimpa lliphipiynintawan rikuchinampaj. Chay fiestaqa pachaj pusaj chunkayoj p'unchaykunata karqa.

⁵Chay p'unchaykuna junt'akushajtintaj, reyqa qanchis p'unchaykunatawan waj fiestatawan ruwarqa palacioj huertan ukhupi. Chay fiestamanqa wajyacherqa tukuy runasta kamachinan Susa llajtapi tiyakojkunata, jatunta juch'uytapis.

⁶Chay palacioj pationqa sumaj k'achanchasqa karqa yuraj telaswan, q'omer telaswan, azul telaswan ima. Chaytataj jap'icherqanku linomanta ruwasqa kuli q'aytuswan, qolqemanta ruwasqa sortejaspa chaupinta chay q'aytuswan jusk'urachispa. Chaykunataj jap'ichisqas karqanku marmolmanta ruwasqa sayantasman. Chay ukhupi tiyanastaj qorimanta karqa, qolqemantawan. Chay pampantaj k'acha rumiswan losasqas karqanku: Pórfido nisqawan, marmolwan, alabastrowan, jacinto nisqa rumipiwan.

⁷Chaymantaqa vinota ujyarqanku imaymana rijch'aj qori vasospi. Reypa k'acha kasqanman jina vino may ashkha karqa.

⁸Reyqa chay palaciompi kaj mayordomosninta kamacherqa, ama pitapis munajta mana munajtaqa ujyachinankuta. Manachayqa chay wajyachisqasnin maytachá atisqankuman jina ujyakunankuta.

⁹Reina Vastipis, chay rey Asueroj wajyachisqasnimpa warmisninman chay palacio ukhullapitaj sumaj mikhuykunata mikhuchillarqataj.

¹⁰Qanchis kaj p'unchaypi rey Asueroqa vinowan machasqallaraj kashaspa, qanchis kamachisninta wajyarqa: Mehumanta, Biztata, Harbonata, Bigtata, Abagtata, Zetarta, Carcastawan.

¹¹Paykunata kacharqa ñaupaqenman reina Vastita pusarimunankuta sumaj k'achanchasqata, pilluwan churaykusqata, jinataj chay reywan kasharqanku chay kurajkunapis rikunankupaj. Cheqamanta reinaqa k'achita karqa.

¹²Reina Vasteqa reypa kachasnin runasta mana kasumorqachu. Chayrayku paypajqa maytapuni phiñarikorqa.

¹³Chaymanta reyqa leyesmanta yachajkunata tapurerqa. Reyqa tapunampuni kaj, runaj cheqan ruwanasninmanta yachajkunata.

¹⁴Chaypachataj, reywan kasharqanku: Carcena, Setar, Admata, Tarsis, Meres, Marsena, Memucán ima. Chaykunaqa qanchis karqanku, Persiamanta, Mediamantawan sumaj kurajkuna. Paykuna karqanku reypa ajllakusqasnin yuyaychajkunasnintaj.

¹⁵Chaypi reyqa paykunata tapukorqa, layman jina, imatachus reina Vastita ruwananta, kamachisqanta mana kasuta ruwaspa, kachasqasnin runasta mana kasumusqanmanta.

¹⁶Chanta, Memucán sutiyoj, reypa ñaupaqempi, kurajkunaj ñaupaqempiwan sayaykuspa, nerqa: Reina Vasteqa mana reypa contrallantachu juchallin, manachayqa tukuy kaypi kaj kuraj runaspa contrantawan, rey Asuero kamachishan chay llajtaspa contrantawan juchallin.

¹⁷Kay jinata, reina Vastej ruwasqantaqa tukuy warmis yachanqanku. Paykunapis qosasninkuta mana kasuta ruwanqankuchu. Nenqankutaj: Rey Asueroqa reinata pusachimuyta munarqa, reina Vastitaj mana kasumorqachu, nispa.

¹⁸Persiamanta, Mediamantawan kaypi kaj kurajkunaj warmisninkupis reinaj kay ruwasqanta yachaytawan, qosasninkuwan churankuyta qallarenqankupacha, pisipajtaj qhawanqanku, phiñanakuyllataj kanqa.

¹⁹Chayrayku, sichus qanman kay allin rijch'asunki chayqa, reyníy, rey jina uj kamachiyta orqhoy. Chaytaj qelqasqa kachun Persia llajtamanta, Media llajtamantawan kamachiykunaswan khuska, ama jayk'ajpis kaykunaqa p'akisqas kanankupaj. Chay reina Vasteqa amaña jayk'ajpis rey Asueroj ñaupaqanman jamuchunchu. Reytaj pitachá munasqanta reinata churachun, Vastimanta aswan allin kaj warmita.

²⁰Kay jinata reypa kamachisqanta, rey Asuero kamachishan chay tukuy llajtaspi uyarisqa kachun, ajinamanta warmisqa qosasninkuta kasunankupaj, kurajkuna kajtinkupis, mana kurajkuna kajtinkupis.

²¹Chay jinata Memucampa yuyaychasqanqa reyman, chanta chaypi kurajkunamampis allin rijch'arqa. Paytaj Memucampa nisqantaqa ruwarqapacha.

²²Kamachisharqa chay llajtasman chay kamachisqata qelqaspa apacherqa, sapa uj suyuspa kikin qelqayninkupi, kikin parlayninkupikamataj. Chay kamachisqapeqa nerqa sapa uj qhareqa warminkuwan kasuchikunankuta. Ajinamanta chay kamachisqataqa sapa llajtapi, ima parlaytachá parlanku, chaykunapi willakunanta.