Read Quechua Bolivia DC Bible ESTER 5 Bible Online

ESTER 5 - Quechua Bolivia DC Bible bible

ESTER 5

¹Kinsa p'unchaymantawan Esterqa reina p'achasta churaykukuspa, reypa palaciompa ukhu kaj pationman yaykorqa, maypichus reyqa tiyasqa kamachinampi kasharqa chay salaj ñaupaqenman. Chaytaj punku yaykuy cheqan chimpapi karqa.

²Reytaj reina Esterta patiopi rikuytawan mayta kusikorqa. Paypa ñaupaqenmantaj reyqa makimpi kasharqa chay qorimanta tojnunta aysarerqapacha. Estertaj qayllaykuytawan chay qorimanta tojnoj puntanta llujchirerqa.

³Reytaj tapurerqa: Imataj tiyan reina Ester, imatataj munankiri? Noqaqa imatachus munasqaykita, khuskan reinoytawampis qosqayki, nispa.

⁴Estertaj reyman kuticherqa: Sichus reyníy, qampaj allin rijch'asunki chayqa, munani qampaj sumaj mikhunata wakichini chayman jamunaykita Amanwan khuska, nispa.

⁵Reytaj nerqa: Amanta usqhayta wajyamuychej, Esterpa nisqan ruwakunampaj. Chanta reyqa Amanwan reinaj jatun mikhuyta wayk'uchisqanman rerqanku.

⁶Chay mikhuypitaj vinota ujyashaspa reyqa Esterta taporqa: Imatataj mañakuyta munanki? Noqaqa imatachus mañawasqaykita qosqayki. Munajtiykeqa khuskan reinoytawampis qosqayki.

⁷Estertaj kutichispa nerqa: Imatachus mañakusuyta munani chayqa kaymin:

⁸Sichus qan munakuwanki chayqa, munankitaj imatachus mañakususqayta qowayta chayqa, q'aya, reyníy, jamullaytaj Amanwan khuska mikhoj, chaypaj sumaj mikhunata wayk'uchipullasqaykichejtaj. Q'ayallaña ruwasaj imatachus kamachisqaykiman jina.

⁹Chaypacha Amanqa may kusisqa, sonqo junt'asqataj chaymanta llojserqa. Reypa palaciompa punkumpi Mardoqueota mana sayarejta, nitaj kuyurejta rikuspa, maytapuni paypaj phiñarikorqa.

¹⁰Chaywampis, chaypachaqa manapis phiñakushanmanchu jinalla wasinman riporqa. Wajyachimorqataj kausaqesninta warmin Zerestawan.

¹¹Chaypitaj Amanqa parlarqa may qhapaj kasqanmanta, ashkha wawasniyoj kasqanmantawan, imawanchus reyqa payta jatunyachisqanmantawan. Imaynatachus payta sumajpaj qhawaspa, kamachejkunaj kurajkunasninmanta sayachisqanmanta, jinallataj reypa kamachisninmantapis aswan pataman churasqanmantapis.

¹²Chanta nillarqataj: Reinaqa mana pitapis reywan khuska mikhunampaj wajyarqachu. Manachayqa noqallata, q'ayapajpis reywan khuska mikhumunaykupaj wajyashallawantaj.

¹³Chay tukuywampis noqapajqa mana ima allimpis kanchu, reypa palacion punkullapipuni Mardoqueo judiota tiyasqata sapa rikojtiy.

¹⁴Chanta warmin Zereswan, tukuy kausaqesninwantaj nerqanku: Qanqa uj sipinata ruwachiy. Chaytaj kachun iskay chunka iskayniyoj metros. Q'aya paqarintaj reymanta mañay, chayman Mardoqueota warkhunankuta. Ajinamanta reywan khuska kusisqa mikhumunki. Chay nisqankutaj Amampajqa sumaj karqa. Warkhuspa sipinatataj ruwacherqapacha.