Read Quechua Bolivia DC Bible ÉXODO 13 Bible Online

ÉXODO 13 - Quechua Bolivia DC Bible bible

ÉXODO 13

¹Señorqa Moisesman nerqa:

²Noqaman qoway tukuy ñaupajta Israel ukhupi nacejkunata: Runaspa kuraj kaj wawasninta, jinallataj uywasninkoj phiwi uñasninta. Chaykunaqa noqajta kanku.

³Moisestaj runasman nerqa: Kay diamanta yuyarikuychej, mayk'ajchus Egiptomanta Señor orqhomusorqachej jatun atiyninwan kamachillapuni kanaykichejmanta. Chayrayku ama mikhuychejchu levadurayoj t'antataqa.

⁴Qankuna llojsimunkichej Abib killapi.

⁵Kay kikin killallapitaj yuyarikuspa qhochukuta Señorman ruwankichej, maypachachus Señor yachachisonqachej lechewan misk'iwan phullchisaj chay jallp'aman chaypacha; mayqen jallp'amantachus Señorqa orqhonqa cananeosta, heteosta, amorreosta, heveosta, jebuseosta ima. Chay jallp'ata Señorqa juraspa nerqa tatasniykichejman qonanta.

⁶Qanchis diasta mikhunkichej mana levadurayoj t'antasta, qanchis kaj p'unchaypitaj Señorman qhochukuta ruwankichej.

⁷Qanchis día junt'ata mana levadurayoj t'antasta mikhunkichej, chantaqa mana maypipis kanqachu levadurayoj t'antas chay p'unchaykunapi, nitaj levadurapis tarikunanchu tiyan tukuynin jallp'api.

⁸Chantaqa chaypacha wawasniykichejman willankichej: Kaytaqa ruwashanchej yuyarikuspa, mayk'ajchus Egiptomanta orqhomuwarqayku ajinata ruwaspa, chayta.

⁹Kayqa kanqa makiykichejpi uj señal jina, mayk'ajpis ñawiykichej patapi k'asqasqa kajtin yuyarikunaykichejpaj, Señorpa leynin simiykichejpi kanampaj, Señor may jatun atiyninwan Egiptomanta orqhomusqasuykichejta.

¹⁰Chayrayku kaytaqa ruwanaykichej tiyan sapa wata, ima killapichus ruwanaykichej kashan chaypi.

¹¹Maypachachus Señor chayachisonqachej Canaán jallp'aman, mayqentachus juraspa nerqa qankunaman qonanta, jinallataj ñaupa tatasniykichejmampis, chayman chayaspa, Señorman jaywankichej tukuy kuraj kaj qhari wawasniykichejta, jinallataj tukuy uywasniykichejpa phiwi uñasintapis. Orqos kajkunaqa Señorpata kanqa.

¹³Uj china burrojta phiwi uñan kanqa chayqa, corderitatawan cambianki. Mana jinata ruwanki chayqa, chay burro uñata kunkanmanta q'ewispa wañuchinki. Jinallataj sapa uj kuraj wawasniykichejmanta uj ofrendata qonkichej cuentanmanta.

¹⁴Mayk'ajpis wawasniykichej tapusonqachej: Imatataj kay niyta munanri?, nispa chayqa, ninkichej: Kayqa niyta munan, ñaupa tatasninchej israelitasta Señor orqhomusqanta jatun atiyninwan Egiptomanta, maypichus kamachi mana ruway atinamanta.

¹⁵Chaypacha Señorqa faraompa sonqonta rumiyacherqa, ama ñaupa tatasninchej israelitasta llojsimojta saqenampaj. Jina kashajtintaj Señorqa Egiptopi tukuy kuraj kaj wawasta wañuracherqa, jinallataj uywaspa phiwi uñasnintapis. Chayrayku Señorman kay rikuchikuta uywaspa kuraj kaj uñasninta jaywayku, kuraj kaj wawaj cuentanmanta ofrendata.

¹⁶Chayrayku makiykichejpi, ñawiykichej patapi ima, uj señal imamantapis kajtin, chaymanta yuyarikunaykichejpaj. Ajinamanta yuyarikunkichej kay rikuchikuta jaywajta rikuspa, Egiptomanta Señor may atiyninwan ñaupa tatasninchej israelitasta orqhomusqanta.

¹⁷Israelitasta faraón kacharerqa chaypacha, Diosqa israelitasta mana filisteospaman rej ñantachu pusarqa, mayqenchus cheqan ñan karqa chayta. Diosqa nerqa: Paykunawan maqanakoj runasta llojsimojta rikuspa, israelitasqa Egiptoman kutiriyta munankuman imamantapis yuyarikuspa, nispa.

¹⁸Chayrayku Diosqa israelitasta muyurichimorqa ch'in pampannejta, puka mar qochaman rej ñannejta. Israelitasqa Egiptomanta sumaj wakichisqas llojserqanku maqanakunankupaj soldados jina.

¹⁹Moisesqa Josej tullusninta aparqa, imaraykuchus Joseqa israelitasta juracherqa, nispa: Dios watukusonqachej, chaypacha tullusniyta apapuwankichej kaymanta ripushaspa.

²⁰Israelitasqa Sucotmanta llojserqanku, jarakorqankutaj Etampi ch'in pampaman yaykuypi.

²¹Señorqa paykunaj ñaupaqenta rerqa p'unchaypi jatun chhoqo phuyu ukhupi paykunata pusaspa, tutantaj nina k'anchay ukhupi ama ñanta pantanankupaj; chantapis tuta p'unchay rinankupaj.

²²Ni jayk'ajpis paykunaj ñaupaqenmanta phuyu oqharikorqachu p'unchay rishajtinku, nillataj tutampis nina k'anchay oqharikorqachu paykunaj ñaupaqenkumanta.