Read Quechua Bolivia DC Bible ÉXODO 17 Bible Online

ÉXODO 17 - Quechua Bolivia DC Bible bible

ÉXODO 17

¹Chay qhepatataj tukuynin israelitas Sin ch'in pampamanta purirerqanku, pisimanta pisi rispa Señorpa kamachisqanman jina. Jinata rispallapuni chayarqanku Refidimman. Chaypi manallataj yaku karqachu ujyanankupaj.

²Israelitasqa phiñarikuspa Moisesman nerqanku: Yakuta qowayku ujyanaykupaj, nispa. Moisestaj paykunaman nerqa: Imaraykutaj phiñakuspa noqamanta yakuta mañakushawankichejri? Imaraykutaj Señorta pantachiyta munankichejri?

³Israelitasqa maytapuni yaku ch'akiywan kasharqanku, chayrayku Moisespa contranta phiñarikuspa, nerqanku: Ima nispataj Egiptomanta orqhomuwarqayku yaku ch'akiymanta kaypi wañuchinawaykupajri, wawasniykuta, uywasniykuta imari?, nispa.

⁴Jina kajtintaj Moisesqa Señormanta mañakorqa, nispa: Señor, imanasajtaj kay runaswanri? Pisimantawanqa rumiwan ch'anqaspachá wañuchiwanqanku ari.

⁵Señortaj Moisesman nerqa: Israel runaspa ñaupaqenta pasay, wakin kurajkuna israelitasta pusarikuspa; makiykipitaj tojnuykita oqhariykukuspa riy mayqenwanchus mayuta wajtarqanki chayta, chaymantaqa Horeb orqoman kachaykukuy.

⁶Noqa Horeb chhanka orqopi suyamusqayki, qantaj chay chhankata tojnuykiwan wajtanki, yakutaj chaymanta phullchimonqa, runastaj chayta ujyanqanku. Moisesqa chayta ruwarqa israelitaspa kurajkunasninku qhawashajtinku.

⁷Chaymantaqa chay cheqata suticharqa Meribata, chaypi israelitas Moisespaj rimasqankurayku. Chantaqa sutichallarqataj Masahta imaraykuchus kaypi Diosta probanku, nispa: Noqanchejwanchu Señorqa kashan manachu?

⁸Israelitas Refidimpi kashajtinku amalecitas llojsiyamorqanku paykunawan maqanakoj.

⁹Moisestaj Josueman nerqa: Wakin qharista ajllay, chaykunawan rispa amalecitaswan maqanakamuychej. Noqataj q'aya jatun orqo puntapi kamusaj, Diospa qowasqan tojnuta makiypi jap'irisqa.

¹⁰Josueqa amalecitaswan maqanakamorqa Moisespa nisqanman jina. Moiseswan Aaronwan, Hurwan ima alto orqo puntaman wicharerqanku.

¹¹Moisés makinta pataman oqharejtin israelitas atipasharqanku amalecitasta, tumpata makinta uraykuchejtintaj amalecitas israelitasta atipanayasharqanku.

¹²Jinata oqharisqampi Moisespa makisnenqa sayk'uporqa, chayta rikuspataj uj rumita churaporqanku, chaypi tiyakunampaj. Aaronwan Hurwantaj uj makinmantakama jap'erqanku. Ajinamanta Moisesqa makisninta sujetakorqa inti chinkaykunankama.

¹³Josuetaj chaykama amalecitasta espadawan atiparqa.

¹⁴Moisesmantaj Señorqa nerqa: Kaytaqa uj libropi escribiy yuyarikunankupaj. Josuemantaj niy kayta, noqamin runastaqa amalecitasmanta qonqasqata qonqachisaj.

¹⁵Moisestaj chaymantaqa uj altarta ruwarqa, chaytataj Señorqa suticharqa noqaj banderaymin, nispa: Señorpa contranta amalecitas oqharikusqankurayku Señorpa banderanqa makipi. Señorqa maqanakupi kashan amalecitaswan uj miraymanta uj miraykama.