Read Quechua Bolivia DC Bible ÉXODO 19 Bible Online

ÉXODO 19 - Quechua Bolivia DC Bible bible

ÉXODO 19

¹Israelitasqa ch'in pampa Sinaí orqoman chayarqanku, kinsa killapi Egiptomanta llojsisqankumantapacha.

²Refidimmanta llojsiytawan israelitasqa ch'in Sinaí orqoman chayarqanku. Chaypi Sinaí orqo k'uchupi jarakorqanku.

³Chaymanta Moisesqa orqoman wicharerqa Dioswan parlamoj, imaraykuchus Señor wajyamorqa chay orqomantapacha, kayta nispa: Ajinata niy Jacobpa miraynin israelitasman:

⁴Qankuna rikunkichej imastachus egipciosta ruwasqayta, imaynatatajchus apamorqaykichej maypichus tiyakushani chayman chayta, ankaspa lijrasnimpipis jamuwajchej karqa ajinata.

⁵Kunanqa sichus tratoymanta palabrasniyta uyarikunkichej, waqaychankichejtaj chayqa, noqapaj kankichej uj sumaj ayllu, tukuy ayllusmanta aswan sumaj; imaraykuchus noqajtamin tukuy jallp'asqa.

⁶Tukuy qankunaqa kapuwankichej uj sumaj llimphuchasqa sacerdote aylluy. Kaykunata qan israelitasman willamuy.

⁷Chaymanta uraykuspa Moisesqa tantacherqa tukuy kurajkunata, paykunamantaj willarqa imastachus Señor nerqa chaykunata.

⁸Chayta uyarispataj tukuynin israelitas nerqanku: Señorpa nisqasnintaqa ruwasqayku, nispa. Moisestaj chay jinata runas nisqankuta Señorman willamorqa kutirispa.

⁹Señortaj payman nerqa: Qhawariy, noqa jamusaj uj yanayarishaj phuyupi, qanwan parlasqayta israelitas uyarinankupaj, ajinamanta wiñaypaj parlasqaykita creenankupaj. Moisestaj ujtawan Señorman willarqa israelitas imastachus nerqanku chayta.

¹⁰Moisesman ujtawan Señorqa nerqa: Rispa israelitasman nimuy, kunan q'ayatawan llimphuchakunankuta, p'achasninkutapis t'ajsarakuchunku.

¹¹Ajinata tukuyninku wakichisqas kachunku minchhapaj; imaraykuchus minchha Señorqa uraykamonqa Sinaí orqoman tukuy israelitaspa rikunankuta.

¹²Orqoj muyuyninman señalesta churaramuy; ninkitaj ama ni pi chay señalesta orqoman wicharinankuta, nitaj chay señalesllatapis saruykunankuta. Pichá chay orqoman chakinta churaykojqa wañonqa.

¹³Chay orqomanqa ni makillankutapis churaykonqankuchu, pichus ajinata ruwajqa rumiwan ch'anqaspa wañuchisqa kanqa, chayri flechawan, uywaspis kachun, chayri runaspis kachun. Chay orqomanqa wicharenqanku maypachachus pututu unayta waqamojtillan.

¹⁴Moisestaj orqomanta uraykamorqa runasta wakichimoj. Paykunataj mayllakorqanku, p'achasninkutapis tukuyninku t'ajsakorqanku.

¹⁵Runasman nerqa: Minchhapaj sumaj wakichisqas kanaykichej tiyan, chaykamaqa ni warmisniykichejwampis kanaykichejchu tiyan.

¹⁶Minchhantin sut'iyamuyta rikhurimorqa lliuj lliujkuna, qhon qhonkuna, uj yanayarishaj phuyutaj orqoman tiyaykamorqa. Uj pututoj waqayninta sinch'ita waqaspa tukuypa jarasninman uyaricherqa mancharikunata jina.

¹⁷Moisestaj tukuyninkuta jarasninkumanta llojsicherqa Dioswan tinkumunankupaj. Jinamanta tukuynin israelitas orqo k'uchukamalla chimparqanku.

¹⁸Tukuynin Sinaí orqo q'osñirerqa, imaraykuchus Señor uraykamorqa chay orqoman ninapi. Q'osñisqa wicharisharqa hornomantapis wicharishanman jina; chay puntastaj tukuynin kharkatirerqanku manchayta.

¹⁹Pututoj waqaynintaj astawan astawan sinch'ita waqamorqa. Chaypi Moisesqa Dioswan parlarqa, Diostaj payman kuticherqa qhon qhompis sonashanman jina.

²⁰Señorqa Sinaí orqoman uraykamorqa, kikin orqo puntaman. Moisestataj wajyarqa chayman wicharinanta, paytaj wicharerqa.

²¹Chaypi Señorqa Moisesman nerqa: Uraykuspa nimuy runasman, churasqayki señalesta ama pasaramuchunkuchu noqata rikuwayta munaspa, pajtataj chayta ruwaspa ashkhas wañurankuman.

²²Jinallataj tukuy sacerdotespis llimphuchakuchunku noqawan tinkuyta munaspaqa. Mana jinata ruwaspalla jamuwanqanku chayqa, phirita ruwachikuwanqanku.

²³Chaymanta Moisesqa Señorman nerqa: Israelitasqa mana kay Sinaí orqoman wicharimunkumanchu, qanllataj chayta kamachiwarqayku, niwarqankitaj, señalesta jina churaray kay orqoj muyuyninman, runastataj llimphuchachimuy, nispa.

²⁴Chaymanta Señorqa Moisesman nerqa: Qan rispa uraykuy, qanlla Aaronwan wicharimunki. Sacerdoteswan runaswanqa ama wicharimuchunkuchu señalesta pasaspa, manachayqa Señor paykunataqa phirita ruwarparenqa.

²⁵Chaymanta Moisesqa uraykorqa, runasmantaj kikillantataj willamorqa.