Read Quechua Bolivia DC Bible ÉXODO 27 Bible Online

ÉXODO 27 - Quechua Bolivia DC Bible bible

ÉXODO 27

¹Ruwallankitaj altarta acacia maderamanta cuadradota, sapa ladonman kanqa iskay metro iskay chunka phishqayoj centimetrosniyoj, patamantaj uj metro iskay chunka phishqayoj centimetrosniyoj.

²Esquinasnimpi kikinmanta mut'u wajrasta jina ruwanki; chay altarmantaj tukuyninta broncewan k'askarqochinki.

³Altarpi imachus apaykachana kajta tukuyninta broncemanta ruwanki: Ushpha orqhona paylasta, palasta, jatuchaj vasosta, trinchesta, brasasta apaykachanatawan.

⁴Chantá ruwallankitaj broncemanta uj rejillata. Chay rejillaj tawantin cantosninmantaj broncellamantataj ningrista k'askarachinki.

⁵Chaytataj altarpa uranman churanki, altarpa khuskanninkama chayanampaj.

⁶Chaymantaqa ruwallaytaj k'aspista acacia maderamanta, jinaspataj broncewan jawerqonki,

⁷Chaymantataj chay k'aspista ningrisnejta pasachinki, altarpa sapa lado cantosnimpi kanampaj, chaymanta oqharispa altarta apanapaj.

⁸Altarpa ukhonqa ch'usajlla kachun, imaynatachus Sinaí orqopi rikucherqayki ruwanaykita, chayman jina.

⁹Diospa tiyakunampaj uj kanchata ruwanki. Uray cantonmanta muyuykuchinki t'ullkusqa linomanta ruwasqs jark'achinawan, sayt'unman tawa chunka phishqayoj metrosta.

¹⁰Iskay chunka kurkusta sayachisqayki, chukusnin imaqa kanan tiyan broncemanta ganchosnin, ningrisnin ima kanan tiyan qolqemanta.

¹¹Jinallataj inti llojsimuy ladompis cortinaswan muyuykusqa kanqa. Chay ruwasqataj kanqa tawa chunka phishqayoj metros, broncemanta ruwasqa iskay chunka chukus patapi iskay chunka kurkus sayasqas, qolqemanta ganchosnin ningrisnin ima kanqa.

¹²Kinrayninmanta chay iskay chunka khuskanniyoj metrosta cortinaswan muyuykuchinki, maypichus chunka kurkus sayasqas kashanku chunka chukus patapi chayta.

¹³Kikillantaj kanqa, inti llojsimuy ladoman, kinrayninman ima, iskay chunka iskayniyoj khuskanniyoj metros jark'achinaswan muyuykusqa.

¹⁴Punkumanta puraj ladonmantaj kanqa qanchis metrosniyoj kinrayninman, kinsa chukus patapi kurku sayasqasniyoj.

¹⁵Uj ladompipis kikillantaj kanqa cortinasqa qanchis metrosniyoj, kinsa chukus patapi kurku sayasqasniyoj.

¹⁶Kancha punkupitaj cortinaqa isq'on metrosniyoj kanqa lilamanta, puka pantimanta, pukamanta, t'ullkusqa linomantawan ruwasqa, jinallataj k'acha ruwasqa coloreswan k'acha fijasqa, tawa chukus patapi kurkus sayasqasniyoj.

¹⁷Kanchata kurkus sayasqa muyuykusqaqa tukuynin kanqanku qolqe sortejaswan k'askachisqas, qolqe ganchosniyoj, bronce chukusniyojtaj.

¹⁸Kanchaqa sayt'unman kanqa tawa chunka phishqayoj metrosniyoj, kinrayninmantaj iskay chunka iskayniyoj khuskanniyoj metroskama puraj uyasninman. Patamantaj iskay metros iskay chunka phishqayoj centimetrosniyoj. Cortinaqa t'ullkusqa linomantapuni kanqa, chukusnintaj broncemanta.

¹⁹Tukuy imasnimpis Diospa tiyakunan wasejtaqa broncellamantapuni kanqanku. Jinallataj estacasnintin, kanchaj estacasnimpis.

²⁰Israelitasta kamachiy olivomanta sumaj kaj aceiteta apamunankuta k'anchachinaspaj, tuta p'unchay k'anchanankupaj.

²¹Chaymanta cuentayojqa kachunku Aaronwan wawasninwan, chay k'anchachinas tukuy tuta k'anchanankupaj, paykuna ima kajtapis ruwachunku, jinamanta Señorpa ñaupaqempi k'anchanampaj; velomanta jawapi, maypichus Señorpa leynimpa cajonniy kashan chaypi. Kayta israelitasqa sapa kuti ruwanqanku, jinallataj mirayninkupis uj kamachiy wiñaypaj churasqata jina.