Read Quechua Bolivia DC Bible ÉXODO 30 Bible Online

ÉXODO 30 - Quechua Bolivia DC Bible bible

ÉXODO 30

¹Chaymantaqa ruwallankitaj uj altarta acacia maderamanta, chaypi incienso ruphachisqa kanampaj.

²Chay altarqa chhikachajkama tawa ladosniyoj kanqa; sapa ladoman tawa chunka phishqayoj centimetrosniyoj, patamampis isq'on chunka centimetrosniyoj. Wajras jina ruwasqaqa ujlla kanqa chay altarwan.

³Chaytataj tukuyninta qoriwan jawerqonki, jinallataj kirpananta, muyuyninta, wajrasninta; cantosnintataj qorillawantaj muyuykuchinki awakipasqata jina.

⁴Chay awakipasqa jina chay urasninmantaj k'askarachinki qorimanta ruwasqa muyu ningrista tawantin esquinasninman k'aspiswan jusk'urachispa, chaymanta oqharispa apanapaj.

⁵Chay k'aspistapis acacia maderamanta ruwanki, jinaytawantaj qoriwan jawerqonki.

⁶Chaytaqa veloj ñaupaqenman churanki, maypichus Diospa leyninta waqaychana cajón churasqa kashan chay qayllaman; mayqenchus cobremanta ruwasqa kirpanawan kirpasqa kashan chayman, maynejpitajchus noqa qanwan tinkusaj chayman.

⁷Chay altarpa patampi Aaronqa inciensota sumaj q'apashajta ruphachenqa. Chaytaqa sapa paqarin ruwanqa k'anchanasta jap'ichishaspa.

⁸Jinallataj ch'isiyaykuytapis k'anchachinasta jap'ichiytawan inciensota ruphachillanqataj. Kaytaqa Señorpa ñaupaqempi ruwanqankupuni, jinallataj qhepaman wiñaypaj mirayniykichej kajkunapis.

⁹Kay altar incienso patapeqa amapuni ima inciensotapis q'osñichinkichejchu, ni rikuchikusta, nillataj ch'aki mikhuy ofrendastapis, nillataj vino ofrendatapis chayman ch'ajchunkichejchu.

¹⁰Chay altarqa t'aqasqapuni kanan tiyan Señorpaj. Chay altarpi wajras patapi Aaronqa uj rikuchikuta jaywanqa uj kutillata sapa wata, juchas pampachasqa kanampaj. Chaytaqa uj kutillatapuni ruwanqa Aaronqa sapa watapi, uywaspa yawarninwan chay altar patapi juchas pampachasqa kanampaj. Chaytaj Señorpajqa may t'aqasqamin kanqa.

¹¹Señorqa Moisesman parlarqa, ajinata: Maypachachus israelitasta yupanki chayqa, sapa ujninku qolqeta ramachunku Señorpaj, kausakusqankumanta pagaspa ama ima onqoypis kanampaj ajinata yupashajtiyki.

¹³Sapa uj yupasqa kasqanman jina, Señorpaj ramachun khuskan qolqeta, Diospaj tiyakunan toldoman qonku chay qolqeman jina.

¹⁴Yupachikojkunamanta iskay chunka watasniyojmanta pataman ofrendasta Señorman qonankuña tiyan.

¹⁵Sapa ujninku khuskankama qonanku tiyan kausakusqankumanta pagaspa; qhapajkuna mana astawanchu; wajchasrí mana aswan pisitachu.

¹⁶Ajinata qanqa jap'inki israelitaspa ofrenda qolqenta kausakusqankumanta paganku chayta, chaytataj apanki Dioswan tinkukuna toldoman, chaypajpuni kasqanrayku. Chay kanqa israelitasmanta Dios yuyarikunampaj, yuyarikunampajtaj israelitas kausakusqankumanta qolqeta kasqankuta Señorman.

¹⁷Ujtawan Señorqa Moisesman nillarqataj: Ruwallanki uj ch'illamita broncemanta mayllakunapaj, sayanantaj broncellamanta kanqa. Chayman yakuta churanki, jinaspataj chaytaqa churanki altarwan Dioswan tinkukuna toldowan kashan chay chaupiman.

¹⁹Chay ch'illamimanta yakuta orqhospa Aaronqa wawasninwan mayllakonqanku makisninkuta, chakisninkutawan.

²⁰Chay jinata mayllakonqanku Dioswan tinkukuna toldoman yaykuspa, ama wañunankupaj; jinallataj ruwanqanku altarman qayllaspa ruphachina rikuchikuta Señorman jaywashajtinku.

²¹Ajinata chay yakuwan mayllakonqanku makisninkuta, chakisninkutawan ama wañunankupaj. Kay ruwanaqa kanqa uj ley jina wiñaypaj, chayta ruwanqa Aaronqa jinallataj wawasnimpis.

²²Señorqa ujtawan Moisesman nillarqataj: Qan kikiyki ajllay sumajta q'apashajkunata: Sumajnin kaj sojta kilo mirrata, kinsa kilo canelata, kinsa kilo jina sumaj q'apashaj cañata, sojta kilo acaciata, Diospa tiyakunampi mashkhachus peso churasqa chayman jina pesaspa, kinsa litros khuskanniyoj olivo aceitetawan.

²⁵Chaykunamanta ruwanki Diospaj t'aqanapaj jawina aceiteta, imaynatachus q'apashaj jawinasta ruwajkuna ruwanku ajinata. Diospaj t'aqasqa aceiteqa jawinapaj kanqa.

²⁶Chaywan jawinki Dioswan tinkukuna toldoj patanta, jinallataj Diospa leyninwan kashan chay cajontapis. Jinallataj mesatapis tukuy imasnintinta, k'anchachinata tukuy imasnintinta, inciensota q'osñichina altarta, rikuchikuta q'osñichina altarta tukuy imasnintinta, mayllakuna ch'illamita, maypichus sayasqa kashan chaynintinta.

²⁹Ajinamanta chaykunata Señorpaj t'aqanki, qhepakonqataj Señorpaj t'aqasqa. Chaymantaqa imaschus chaykunaman chayajkunaqa t'aqasqallataj kanqa.

³⁰Chaymantaqa chay aceitewan jawillankitaj Aaronta wawasnintawan, jinamanta t'aqasqas kanqanku, sacerdotesniytaj kanankupaj.

³¹Chaymantataj israelitasman parlanki: Kaymin kanqa Diospaj t'aqanapaj jawina aceitey wiñaypaj.

³²Ama chay aceitetaqa ima runallamampis jawillankichu, nitaj imamantapis kayman rijch'akojta wakichillankichu. Kayqa Diospaj t'aqanapaj aceite. Ajina kajtenqa sumajta chay aceitetaqa qhawanaykichej tiyan.

³³Pillapis kay aceiteman rijch'akojta ruwajqa, chayri kay aceitewan pitapis jawejqa, israelita ayllun ukhumanta chinkachisqa kanqa.

³⁴Chanta Señorqa Moisesman nillarqataj: Sumajta q'apashaj imasta tantay: Resinata, q'apaj clavota, ch'uwa inciensota, q'apashaj galbanotawan.

³⁵Chaykunamanta wakichiy uj sumaj q'apashaj inciensota, allin llimphuchasqatataj, sumajta tukuyninta chajruspa, imaynatachus q'apashaj jawinasta ruwajkuna ruwanku ajinata.

³⁶Wakinninta sumaj ñut'ituta kutanki, chaymantataj churanki Dioswan tinkukuna toldopi, Diospa leyninwan kaj cajompa ñaupaqenman, maypichus noqa qanwan tinkusaj chayman. Chay inciensoqa qankunapaj sumaj respetana kanqa.

³⁷Kay inciensoman rijch'akojtaqa amapuni imantapis ruwankichejchu qankunallapaj. Imaraykuchus kay aceiteqa Señorpaj t'aqasqamin, jinataj qampajpis.

³⁸Sichus mayqempis kay jina aceiteta q'apaychakunampaj ruwanqa chayqa, israelita ayllun ukhumanta, chinkachisqa kanqa.