Read Quechua Bolivia DC Bible ÉXODO 32 Bible Online

ÉXODO 32 - Quechua Bolivia DC Bible bible

ÉXODO 32

¹Israelitastaj chaykama, Moisés Sinaí orqomanta mana usqhayta uraykamojtin, tantakuytawan Aaronman qayllaykuspa nerqanku: Kunanqa dioskunata ruwapuwayku ari ñaupaqeykuta rinankupaj. Imaraykuchus Egipto jallp'amanta orqhomuwarqayku chay Moisesqa imanakunchus mana rikhurimunchu.

²Aarontaj nerqa: Warmisniykichejpa ningrimpi kashan chay qori faluchost apamuychej, jinallataj qhari wawasniykichejpata, warmi wawasniykichejpatawan.

³Israelitastaj chayta uyarispa tukuyninku apamorqanku qori faluchosninkuta Aaronman ningrisninkumanta orqhokuytawan.

⁴Paytaj chaykunata jap'iytawan, tukuyninta ujllaman unuyarpachiytawan cincelwan uj waka uñata ruwarqs. Chaymantataj nerqanku: “Israelitas, kayqa Diosniykichej, pichus Egiptomanta orqhomusorqachej chay”, nispa.

⁵Chayta rikuspataj Aaronqa uj altarta ruwarqs waka uñaj ñaupaqempi. Chaymantataj nerqa: Q'aya ruwasunchej Señorpaj uj fiestata.

⁶Q'ayantenqa tutamanta jatariytawan ofrendata, allinyakuy chay rikuchikustawan jaywarqanku. Chaymantataj runasqa tiyaykukuspa mikhorqanku, ujyarqankutaj, sayariytawantaj mayta kusikorqanku.

⁷Señortaj Moisesman nerqa: Kunanqa riy, uraykuy, imaraykuchus Egiptomanta orqhomusqayki runasqa millayta juchallikunku.

⁸Paykunaqa usqhayllata t'aqarpayakunku ima ñantachus noqa nerqani rinankuta chaymanta. Qorimanta unuyachispa ruwakunku uj waka uñata. Chayta paykunaqa yupaychashanku rikuchikusta jaywaspa, nispataj: “Israelitas, kayqa diosniykichej, pichus Egipto jallp'amanta orqhomusorqachej, chay”, nispa.

⁹Señorqa Moisesman astawan nerqa: Noqa cheqamanta kay runasta rikuni, paykunaqa rumi sonqos kanku.

¹⁰Kunanqa saqellaway, paykunapi phiñakuyniyta thasnukusaj, paykunata tukuchisaj, qanmantarí uj jatun nacionta ruwasaj.

¹¹Moisestaj chayta uyarispa Señor Diosninmanta mañakorqa, nispa: Señorníy, imaraykutaj qan paykunapaj k'ajaj phiñakuyniykita rikuchiwajri, israelita runasniykej contrampiri, mayqentachus Egipto jallp'amanta manchay kallpawan, atiywantaj orqhomusqaykipajri?

¹²Manachu chayta yachaspa egipciosqa ninkuman: Diosqa israelitasta orqhon ch'in pampaspi wañuchinanrayku, kay jallp'a patamanta q'alata chinkachinanrayku?, nispa. Thasnullay ari chay k'ajaj phiñakuyniykitaqa, ama ari phiñakuychu, yuyarikuy ari Israel runasniykimanta.

¹³Yuyarikuy ari, ima tratotachus ruwasqaykita kamachisniyki Abrahamwan, Isaacwan, Israelwan ima. Qan chayta ruwashaspa nerqanki: Noqa mirayniykichejta mirachisaj qoyllurkunata jina, kay jallp'ata qosaj mirayniykichejman imatachus qosaj nisqayman jina, paykunataj chayaqenkupaj wiñaypaj jap'ikunankupaj.

¹⁴Chaymanta Señorqa phiñakuyninta tiyaykuchikorqa, manañataj Israel runasninta chinkachiyta munarqachu.

¹⁵Moisestaj chay orqomanta uraykorqa palqayoj ruwasqa p'alta rumipi escribisqa leyta marq'arisqa. Chay rumispeqa iskaynin palqasnimpi Diospa leynin escribisqa karqa.

¹⁶Chay palqa rumitaqa Diospuni ruwarqa, jinallataj chaypi ch'eqosqa palabrastapis Diospuni ruwarqa.

¹⁷Josuetaj, israelitaspa maytapuni ch'ajwaspa qhaparisqankuta uyarispa, Moisesman nerqa: Jarapeqa maqanakuspapis ch'ajwashankuman jina uyarikun, nispa.

¹⁸Moisestaj kuticherqa: Mana maqanakupi atipaspa kusiywan qhaparisqanku jinachu, nitaj atipachikuspa llakiywan qhaparisqanku jinachu; manachayqa waj laya takiykunata noqaqa uyarini.

¹⁹Moisesqa jaraman qayllaykuspa rikorparerqa waka uña lantita, israelitastataj tusurashajta. Chayta rikuspa Moisesqa manchay k'arajta phiñarikorqa, makimpi marq'arisqa kasharqa chay rumitataj, pampaman choqaspa p'akerparerqa chay orqo k'uchupi.

²⁰Waka uña lanti ruwasqankutataj jap'iytawan ninaman wijch'uykorqa; chaymantataj lantitaqa ñut'uta kutacherqa. Jinaspataj yakuman jich'aykamorqa chay kutasqata, israelitasmantaj chay yakuta ujyacherqa.

²¹Aaronmantaj Moisesqa nerqa: Imanasorqankutaj kay runasri, kay chhika jatun juchata ruwachinaykipajri?

²²Aarontaj Moisesman kuticherqa: Ama phiñakuwaychu, wiraqochíy. Qan allinta yachanki, kay runasqa munankupuni imatapis mana allin kajta ruwayta.

²³Paykuna niwarqanku: Dioskunata ruwapuwayku ñaupaqeykuta rispa pusanawaykupaj; pi qharichus Egiptomanta orqhomuwarqayku, chay Moisesqa imanakunchus kampis mana yachakunchu, nispa.

²⁴Noqataj paykunaman nerqani: Pejpatachus qorin tiyajtenqa apamuwaychej, nispa. Paykunataj qowarqanku, chaymantataj ninawan unuyacherqani, jinamanta kay waka uña ruwakorqa.

²⁵Moisesqa runasta rikorqa mana allin kasqankuta, tukuy enemigosninku asikunankupaj jina, Aarontaj chayta ruwachillarqa.

²⁶Moisestaj jara punkuman sayaykuspa nerqa: Pikunachus Señorwan kajkuna jamuychej, noqawantaj sayaychej. Chayta uyarispataj tukuynin levitas payman k'askarqanku.

²⁷Chaymanta Moisesqa nerqa: Ajinata nin Israelpa Diosnin Señorqa. Sapa ujniykichej espadaykichejta oqharikuychej, jaraman kutispa, wasimanta wasi riychej, sapa ujniykichej hermanosniykichejta, amigosniykichejta, qayllasniykichejpi tiyakojkunata ima.

²⁸Levitasqa Moisespa nisqanta kasorqanku. Jinamanta chay p'unchaypi yaqha kinsa waranqa qharis jina wañorqanku israelitas ukhumanta.

²⁹Chaymantataj Moisesqa levitasman nerqa: Kunan qankunaqa Diosmanta kamachiyta jap'inkichej Señorpa ñaupaqempi sacerdotesniy jina, chay jinata ruwajkuna wawasniykichejpa, hermanosniykichejpa contranta sayarikusqaykichejrayku, ajinamanta Señorqa bendicionesninta qonasuykichejpaj.

³⁰Q'ayantin Moisesqa runasman nerqa: Qankunaqa uj jatun juchata ruwarqankichej, kunanqa wicharisaj maypichus Señor kashan chayman, ichapis Señorqa juchasniykichejta pampachanqa.

³¹Ajinamanta Moisesqa kutirerqa maypichus Señor kasharqa chayman, chaypitaj Señorman nerqa: Cheqamanta kay israelitasqa uj jatun juchata ruwanku, qorimanta uj lantita ruwaspa diosninku kanampaj.

³²Noqa mañakuyki paykunaj juchankuta pampachanaykita, mana chay juchankuta pampachanki chayqa, kunampacha libroykipi escribisqayki sutiyta orqhopuway.

³³Señortaj Moisesman kuticherqa: Pichus noqaj contraypi juchallikun chaypa sutillanta orqhosaj escribisqay libromanta.

³⁴Kunanqa rispa israelitasta pusay, maymanchus noqa pusay nerqayki chayman. Chaymantaj noqaj angelniy pusasonqa. Mayk'ajchus jasut'iy p'unchay chayamonqa, chaypacha noqa juchasninkumanta jasut'isaj paykunata.

³⁵Israelitasta Señorqa juchankumanta jasut'erqa, waka uñata Aaronwan ruwachikusqankumanta.