Read Quechua Bolivia DC Bible ÉXODO 33 Bible Online

ÉXODO 33 - Quechua Bolivia DC Bible bible

ÉXODO 33

¹Señorqa Moisesman nerqa: Kunanqa riy, wichariychej mashkha runastachus Egiptomanta orqhomorqanki chay runaswan; ima jallp'atachus juraspa nerqani qonayta Abrahamman, Isaacman, Jacobmanwan, mirayniykichejman qosaj kay jallp'ata, nispa, chayman.

²Noqa kachamusaj angelniyta ñaupaqeykita rispa pusasunampaj; ñaupaqeykimantataj qharqosaj karuman cananeosta, amorreosta, hititasta ferezeosta, heveosta, jebuseosta ima.

³Qankunaqa riychej maypichus lechewan misk'iwan corrishan yaku jina chayman. Noqaqa mana qankunawanchu risaj; qankunawan riyman chayqa, ñampi tukuchiykichejman, imaraykuchus qankunaqa ancha rumi sonqo runas kankichej.

⁴Señorpa sinch'i palabranta uyarispa israelitasqa mayta llakikorqanku, ni mayqenninku ima k'achanchakunasninta churakorqankuchu.

⁵Imaraykuchus Señorqa Moisesman nerqa: Israelitasman niy: Qankunaqa ancha rumi sonqos kankichej. Uj chhikantachus qankunawan riyman chayqa, qankunata uj ratopi tukuchiykichejman. Kunitampacha qhechukuychej tukuy k'achanchakunaykichej sumaj imasta, chaymanta noqa yachasaj imastachus qankunawan ruwayta.

⁶Chayta uyariytawan israelitasqa tukuyninku chay k'achanchakunasninkuta qhechukorqanku Horet orqomantapachaña.

⁷Moisesqa toldo wasita oqharispa aparqa jaramanta karunejman, chaypi suticharqa Dioswan tinkukuna toldota. Pillapis Señorta mask'ajqa jaramanta llojsispa rej kanku Dioswan tinkukuna toldoman, mayqenchus jaramanta karunejpi kasharqa.

⁸Maypachachus Moisesqa Dioswan tinkukuna wasiman rej chaypacha israelitasqa tukuyninku sayarikoj kanku; chanta sayarakoj kanku jarasninku punkuspi, chaymanta qhawaj kanku Moisespa risqanta Dioswan tinkukuna toldoman yaykunankama.

⁹Moisés, Dioswan tinkukuna toldoman yaykojtinkamataj, sayashaj phuyu punkuman uraykamoj, chay phuyu chaupipitaj Señorqa Moisesman parlarqa.

¹⁰Tukuynin israelitastaj, Dioswan tinkukuna punkuman phuyu uraykamojtinkama, tukuyninku jarasninku punkuspi k'umuykukoj kanku, yupaychaspa.

¹¹Chaypi Señorqa uyapura Moiseswan parlaj, imaynatachus pipis kausaqenwan parlarikun ajina. Parlaytawantaj Moisesqa jaraman kutimoj. Numpa wawan Josuetaj yanapajnin wayna nipuni jayk'ajpis Dioswan tinkukuna toldomanta t'aqakojchu, chay ukhullapipuni kaj.

¹²Moisesqa Señorman nerqa: Qhawariy, qan niwarqanki noqaman: Kay runasta orqhoy, nispa; manataj sut'inchawankichu pitachus kachamunawaykita noqawan rinampaj. Chaywampis qan niwarqanki, noqa qanta allintapuni rejsiyki, nispa. Chanta nillawankitaj: Noqapi khuyakuyta tarinki, nispa.

¹³Kunanqa Señor, sichus qampi tarini khuyakuyta chayqa, kunan rikuchiway ari ñanniykita qanta rejsisunaypaj, qampi khuyakuyta tarisqayta. Chayrayku qhawariy, kay runasqa qampa runasniyki.

¹⁴Señortaj payman nerqa: Noqa kikiy qanwan risaj, noqallataj samachisqaykipis.

¹⁵Moisestaj kuticherqa: Sichus qan mana noqawanchu rinki chayqa, ama kaymanta orqhowaychu.

¹⁶Imapitaj yachakonqa qampi khuyakuyniykita tarisqayri, jinallataj israelita runasniyki imari? Manachu yachakonqa qan noqaykuwan purisqaykipi, manachu chanta yachakullanqataj noqata, israelita runasniykita ima kay mundopi tukuy laya runasmanta wajllaman t'aqawasqaykupi?

¹⁷Chaymanta Señorqa Moisesman nerqa: Kay tukuy imasta niwasqaykitaqa ruwasaj, qan noqapi khuyakuyta tarisqaykirayku, noqa qantaqa allintapuni rejsiyki.

¹⁸Moisestaj kuticherqa: Noqa mañakuyki, Señor, uyaykej lliphipiyninta rikuchinawaykita.

¹⁹Señortaj kuticherqa: Noqa k'acha sonqo kayniyta ñaupaqeykipi rikuchisqayki. Chaymanta Señor sutiyta oqharisaj. Chaypi khuyakuyniyta rikuchisaj pimanchus munasqayman; jinallataj tukuy munakuyniywan yanapasaj pitachus munasqayta.

²⁰Chantaqa sut'inta niyki: Manapuni qanqa uyayta rikuwankichu, imaraykuchus ni pi rikuwajqa kausallanqapunichu.

²¹Señorqa nillarqataj: Qhawariy, kaypi uj cheqa kaj kashan. Kay chhanka patapi sayakuy.

²²Lliphipiyniy rikhurimojtin, churasqayki uj chhanka t'oqoman, chaypitaj makiywan pakaykusqayki chaynejta pasanaykama.

²³Chaymantataj makiyta oqharisaj, qantaj wasayta rikuwanki, uyayrí manapuni rikukonqachu.