Read Quechua Bolivia DC Bible ÉXODO 34 Bible Online

ÉXODO 34 - Quechua Bolivia DC Bible bible

ÉXODO 34

¹Señorqa Moisesman nillarqataj: Uj p'alta rumita palqayojta ruwallaytaj ñaupajta jina; mayqenkunatachus choqaspa t'unaykorqanki chay kikinta, chayman kunampis ñaupajta escriberqani chay kikin palabrasta ch'eqospa escribinaypaj.

²Chayrayku kunanqa usqhayta wakichikuy q'ayapaj, tutamanta wicharinki Sinaí orqo puntaman, chay orqo puntapi noqaman qayllamuwanki.

³Qanwanqa ni pipis wicharimonqachu, nitaj pipis chay orqoman qayllamonqachu; nillataj chayman qayllanqankuchu ovejas, ni wakaspis chaynejpi mikhonqankuchu.

⁴Moisestaj ñaupajta jina ruwallarqataj uj palqayoj p'alta rumita. Q'ayantintaj chay rumita oqharikuspa tutamanta wicharerqa Sinaí jatun orqoman, imaynatachus Señor payman kamachisqanman jina.

⁵Señortaj chayman uraykamorqa phuyupi. Jinamanta payqa Señor sutinta oqharispa Moiseswan chaypi karqa,

⁶Jinamanta Señor Moisespa ñaupaqenta pasarqa qhaparispa: Señor, Señor, wiñaypaj Dios, khuyakuyniyoj, k'acha sonqoyoj, llamp'u sonqo, mana imamantapis k'ajajta phiñakojlla. Chantaqa jatun khuyakuypi, jinallataj cheqa kaypipis.

⁷Khuyakuyninwan waranqa waranqa runasta juchasninta pampachan munakuyninwan, jinallataj tukuy sajra kayninkuta, mana allin puriyninkuta, juchasninkuta ima. Chantaqa mana qhawallanchu tataspa jucha ruwasqasninkuta, payqa jasut'impuni, wawasninkupi, chaymanta aswan qhepaman wawasninkupipis kinsa mitakama, chayri tawa mitakama.

⁸Moisestaj usqhay usqhayta k'umuykorqa pampakama, Señortataj yupaycharqa, jinata: Kunanqa Señor, sichus ñaupaqeykipi khuyakuyta tarini chayqa, kunan noqaykuwan riy ari, Señor; imaraykuchus kay runasqa ancha rumi sonqos kanku. Perdonawayku Señor tukuy sajra ruwasqasniykumanta, juchasniykumanta, jap'ikapuwaykutaj qampata kanaykupaj.

¹⁰Señortaj payman nerqa: Kunanqa uyariwaychej kayta: Noqa ruwashani kay tratota tukuy aylluyki israelitaspa ñaupaqempi. Noqa ruwasaj jatuchaj milagrosta; chayqa manaraj maynejpipis ruwakunrajchu. Chaytaqa tukuy israelitas rikonqanku, mayqenkunaj chaupinkupischus qan kashanki chaypi; paykunaj chaupinkupi Señorqa chay milagrosta ruwanqa. Chay ruwasqayqa may t'ukunapaj jina kanqa qankuna ukhupi.

¹¹Kay kamachisqayta sumajta junt'aychej; noqa qharqosaj ñaupaqeykichejmanta amorreosta, cananeosta, hititasta, ferezeosta, heveosta, jebuseostawan.

¹²Amapuni ni ima tratotapis ruwakunkichejchu maymanchus rishankichej chaypi kaj runaswan, ama, ima sajratachus ruwasqasninkupi urmanaykichejpaj, jinamanta ama misk'achinasuykichejpaj.

¹³Manachayqa qankuna urmarachinkichej altaresninkuta, rumisninkuta p'akirankichej, yupaychananku k'ullustapis khuchurankichej.

¹⁴Amapuni ni mayqen diosninkuman k'umuykuspa yupaychankichu, imaraykuchus Señorpa sutenqa may manchachikunamin, Diosqa may celoso.

¹⁵Chayrayku amapuni ima tratotapis ruwakunkichejchu ni mayqenwan chay jallp'api tiyakojkunawan, paykunaqa diosninkoj qhepampi qhenchachakonqanku, ofrenda rikuchikustataj diosninkuman jaywanqanku. Paykunaqa chaywan wajyasonqachej, chay jaywasqanku imastataj qankunaqa mikhunkichej, chayri ususisninkuta wawasniykichejwan casarachenqanku, jinamanta ususisninkupis qhenchachakonqanku diosninkoj qhepampi, churisniykichejtapis qhenchachachenqanku lantisninkuta yupaychachispa.

¹⁷Amapuni qankunaqa ima lantitapis ruwakunkichejchu ima metalmantapis unuyachispa.

¹⁸Mana levadurayoj t'anta fiestata ruwankichej imaynatachus kamachisqayman jina. Qankunaqa qanchis diata mikhunkichej mana levadurayoj t'antata, chayqa sapa wata Abib killapipuni kanqa. Imaraykuchus chay killapi Egiptomanta llojsimorqankichej.

¹⁹Tukuy kuraj wawasniykichej nacejqa noqajta kanqa, kikillantaj uywasniykichejpa phiwi uñasnimpis orqos kajtenqa noqajta, chayta noqapaj t'aqapuwankichej, waka uñasta, oveja uñasta, cabra uñastawan.

²⁰Burrospa phiwi uñanmantari, uj corderota chayri uj cabritota qonkichej; mana jinata ruwanki chayqa chay burro uñata kunkanmanta q'ewispa wañuchipunki. Jinallataj kuraj kaj wawasniykichejmantapis uj ofrendata qonkichej. Jinamanta ni pipis noqaman jamuwanqachu makisnin ch'usajllaqa.

²¹Sojta diata llank'ankichej, qanchis kaj diapitaj samarikunkichej, tarpuypis kachun, chayri cosechapis kachun.

²²Ruwallankichejtaj uj samakuna fiestata, ñaupaj cosecha trigo oqhariyta, cosecha takukuyta ima.

²³Tukuy qharis kinsa kutita watapi Señorman qayllanqanku, Israelpa Diosnin Señorman.

²⁴Ñaupaqeykichejmanta waj nacionesta qharqosaj, jallp'asniykichejtataj astawan jatunyachisaj. Chay jallp'asniykichejtaqa ni pipis munapayanqachu, chayri jap'ikaponqachu, qankuna watapi kinsa kutita Señor Diosniykichejman qayllakunkichej chayqa.

²⁵Rikuchikumanta yawartaqa levadurayoj t'antatawan khuska ama jaywankichejchu, nitaj pascua fiestamanta kajta imatapis q'ayantimpaj qhepachinkichu.

²⁶Jallp'aykipi poqochisqayki ñaupaj kaj poqoykunata Señor Diosniykej wasinman apanki. Juch'uy ñuñushaj cabra uñasta ama wayk'unkichejchu mamampa lechempi.

²⁷Señorqa Moisesman nerqa: Kay palabrasta escribiy, imaraykuchus chayman jina tratota qanwan ruwani, jinallataj israelitaswampis.

²⁸Chaypi Moisesqa qhepakorqa Señorwan tawa chunka p'unchayta, tawa chunka tutatawan; mana imata mikhuspa, nitaj imata ujyaspa. Chaypi Moisesqa escriberqa uj palqayoj ruwasqa p'alta rumipi tratota ruwasqanmanta chunka kamachiykunata.

²⁹Chaymantataj Moisesqa uraykamorqa Sinaí orqomanta chay chunka kamachiykuna escribisqa rumi marq'arisqa. Chay puntamanta uraykamushaspa Moisesqa mana reparakorqachu uyan lliphipisqanta, Dioswan parlamusqanmanta.

³⁰Aaronwan tukuy kurajkuna israelitaswan Moisesta qhawarispa rikorqanku uyan lliphipisqanta, chayrayku paykunaqa manchachikorqanku payman qayllaykuyta.

³¹Moisestaj paykunata wajyarqa; chaymantaraj Aaronwan tukuy kurajkuna israelitaswan qayllaykorqanku. Moisestaj paykunaman willarqa.

³²Chay qhepatataj tukuynin israelitas qayllaykorqanku, paytaj chaypi kamacherqa paykunaman, imaynatachus payman Señor Sinaí puntapi kamachisqanman jina.

³³Paykunaman parlayta tukuytawantaj, Moisesqa uyanman uj velowan qhataykukorqa.

³⁴Ujtawan Señorwan parlaj rispataj chay velota orqhokorqa, chaypi parlamusqanmanta llojsimunankama. Chaymanta llojsimuspataj israelitasman kamacherqa imastachus Señor payman nisqanman jina.

³⁵Israelitas Moisespa uyanta qhawarejtinku lliphipishajtintaj, Moisesqa ujtawan uyanta qhataykukullarqataj velowan, ujtawan rispa Dioswan parlamunankama.