Read Quechua Bolivia DC Bible ÉXODO 36 Bible Online

ÉXODO 36 - Quechua Bolivia DC Bible bible

ÉXODO 36

¹Ajinaqa Bezaleelwan Aholiabwan, chantaqa tukuy sonqo imastapis sumajta ruwayta yachajkuna; pikunamanchus Señor yachayta qon imastapis ruwanankupaj, chaykuna ruwachunku Diospa tiyanan toldopi, imaynatachus Señorpa kamachisqanman jina.

²Moisesqa wajyarqa Bezaleelta, Aholiabta, tukuy yachayniyojkunatawan, pikunamanchus Señor qorqa yachayta tukuy sonqo imastapis k'achitusta ruwanankupaj. Paykuna kikinkutaj nerqanku Señorpaj imastapis tukuy sonqo ruwanankuta, chaykunatawan.

³Chaymantaqa paykuna oqharerqanku tukuy ofrendasta Moisespa ñaupaqenmanta, mayqenkunatachus israelitas apamorqanku Señorpaj, Diospa wasimpi imaschus kanan kashan chaykunata ruwanankupaj. Chaymantaqa israelitas apamullarqankupuni ofrendasta tukuy sonqo sapa paqarin.

⁴Tukuy imastapis ruwayta yachajkuna, chay ruwanasninkuta Diospa wasimpaj ruwasharqanku chayta saqerispa, Moisesman jamorqanku, nerqankutaj: Israelitasqa ancha ashkhataña ofrendasta apamunku, imaschus Diospa wasimpaj ruwakunan kashan chaymanta kurajtaña, mayqentachus Señor kamacherqa ruwakunanta chaypaj.

⁶Chaymanta Moisesqa tukuynin jaraspi kajkunaman willacherqa: Amaña Diospa wasimpaj ofrendasta apamuchunkuchu qharis, nitaj warmispis, nispa. Ajinata israelitastaqa jark'ararqa amaña astawan ofrendasninkuta apamunankuta.

⁷Imastachus ruwananku karqa chaypajqa tukuy imas kurajyarqa.

⁸Chay tukuynin llank'ajkunamanta aswan yachayniyojkuna qallarerqanku Diospa tiyanan nisqata ruwayta; chaypaj ruwarqanku chunka jark'achina telasta sumaj rakhu t'ullkusqa linomanta, lilamanta, puka pantimanta, pukamanta ima. Chaykunataj jatuchaj pallaynisniyoj karqa iskay angelesniyoj.

⁹Chay cortinasqa sayt'unman karqa chunka iskayniyoj khuskanniyoj metros. Kinrayninmantaj iskay metros. Tukuynin chhikachachajkama karqa.

¹⁰Phishqa cortinas karqa, chaykunata ujllaman cantosninmanta sirararqanku, jinallatataj chay uj phishqa kajkunatapis.

¹¹Chaymantataj chay ñaupaj kaj cortinasta sirasqaspa puntasninman chhitararqanku lila q'aytumanta ningrista, kikillantataj iskay kaj jark'achinasmampis.

¹²Ñaupaj kajkunaman churararqanku phishqa chunka ningrista, kikillantataj qhepan kajkunamampis. Jinamanta chay ningrisqa chimpan chimpampi karqa.

¹³Chaymantaqa cantosnimpi ruwallarqankutaj phishqa chunka ch'itanasta qorimanta. Jinamanta chay cortinasqa ch'itanasninmanta ch'itarajtinku ujllaman puntampura k'askanakorqanku. Ajinamanta Diospa tiyananqa k'achitu ruwasqa karqa.

¹⁴Chaymantaqa Bezaleel ruwallarqataj cortinasta cabra pelosmanta chunka ujniyojta; chaywan chay Diospaj tiyananta toldowan muyuricherqa.

¹⁵Chay cortinasqa karqa chunka kinsayoj khuskanniyoj metros sayt'unman, kinrayninmantaj iskay metros. Chunka ujniyojnintintaj chhikachachaj pura karqanku.

¹⁶Chaymantaqa Bezaleel phishqa kajkunata cantosninmanta ujllaman sirararqa, sojta kajtataj ujllaman.

¹⁷Jinaspataj phishqa chunka ningrista cantosninman k'askaracherqa ñaupaj kaj sirasqasman, phishqa chunkatataj chay qhepan kajman k'askaracherqa.

¹⁸Chantaqa ruwarallarqataj phishqa chunka ch'itanasta broncemanta, chaywan cantosninmanta ch'itaranampaj, jinamanta ujllaman k'askaykuchispa muyuykuchinampaj toldota.

¹⁹Chay toldota patamanta qhataykunampaj Bezaleel ruwallarqataj oveja qarasmanta pukaman teñiraspa, chaypa patanman qhatanampajtaj wajta ruwarqa sumaj ruwasqa qarasmanta.

²⁰Chaymanta Diospa tiyanampajtaj ruwarqa tablasta acacia maderasta, sayacherqataj acacia maderasta cheqanta.

²¹Chay maderasqa karqa tawa metros khuskanniyoj sayt'unman, kinrayninmantaj sojta chunka phishqayoj centimetrosniyoj.

²²Sapa uj tablastaj iskaykama tarukiyasqasniyoj karqa iskaynin tablasta ujllaman t'inkinapaj.

²³Diospa tiyakunan toldoj tablasninta uray uyampaj iskay chunkata ruwarqa.

²⁴Chay tawa chunka tablasta sayachinampaj ruwarqa tawa chunka chukusta qolqemanta. Sapa uj tabla tarukiyasqaj urasninmantaj iskaykama churararqa.

²⁵Jinaspataj Diospa tiyananta sayachinampaj pata uyanman churanampaj ruwallarqataj waj iskay chunka tablasta.

²⁶Chaymantaqa qolqemanta tawa chunka chukusninta ruwarqa, chaymantataj sapa uj tablasta iskay chukus pataman sayaykucherqa.

²⁷Qhepanmanta inti yaykuymanta sayachimunampajtaj sojta tablasta ruwarqa.

²⁸Qhepa esquinasman sayachinampaj iskay tablastawan ruwarqa.

²⁹Chay tablasqa sumajta k'askaykunakorqanku uramanta patakama, ujllapis kanman jina maypichus ningris churasqa karqa chaykama. Ajina ruwasqa karqa chay iskay tablasmanta, iskaynin esquinasnin.

³⁰Ajinaqa pusaj tablas chunka sojtayoj qolqemanta ruwasqa chukusniyoj karqa. Imaraykuchus sapa uj tabla iskay chukus patapikama sayanan karqa.

³¹Chaymanta Bezaleelqa ruwallarqataj phishqa kurkusta acacia maderamanta, Diospa tiyakunan wasej uj ladompaj.

³²Phishqa kurkustaj Diospa tiyakunan wasej tablaspa wasanman churanampaj, phishqa kurkustataj inti yaykuy uyapaj.

³³Ruwallarqataj uj kurkuta tablaspa chaupinta uj ladoman pasachinampaj jawa ladomanta.

³⁴Jinaspataj chay kurkusta qoriwan k'askaykucherqa tablasninta, sorteja jina ningris kajkunatapis qorimanta ruwarqa, maynintachus k'aspiswan jusk'uracherqa.

³⁵Chaymanta velotañataj ruwarqa lilamanta, puka pantimanta, pukamanta, t'ullkusqa linomanta, pallaynintaj karqa iskay ángeles.

³⁶Jinaspataj tawa postesman jap'iykucherqa qori ningrisninmanta. Chay postesqa acacia maderamanta karqa qoriwan jawisqas qolqe chukus patapi sayasqas.

³⁷Diospa tinkukuna wasinta jark'achinapaj ruwallarqataj jark'achinata, lilamanta, pukamanta, puka pantimanta, ch'ullanchasqa t'ullkusqa linomantawan sumaj k'acha pallayniyojta.

³⁸Chaymantataj phishqa postesta sayaracherqa ganchosniyojta broncemanta ruwasqa chukus patapi sapa ujninta. Jinaspataj qoriwan k'askaykucherqa chay postesta, jinallataj ganchosnintapis.