Read Quechua Bolivia DC Bible ÉXODO 37 Bible Online

ÉXODO 37 - Quechua Bolivia DC Bible bible

ÉXODO 37

¹Bezaleelqa ruwallarqataj uj cajonta acacia maderamanta. Chaytaj sayt'unman karqa uj metro chunka centimetrosniyoj, kinrayninman karqa sojta chunka phishqayoj centimetrosniyoj, patamantaj karqa sojta chunka phishqayoj centimetrosniyojllataj.

²Chay cajontataj ukhunta, jawantinta qori puruwan jawerqorqa, cantosnintataj qorillawantaj muyuykucherqa awakipasqata jina.

³Chaymantataj ruwarqa tawa ningrista qorimanta sortejasta jina. Jinaspataj tawantin esquinasninman churararqa, iskayta qhepaman, iskaytataj ñaupajman.

⁴Chanta ruwallarqataj iskay kurkusta acacia maderamanta, jinaspataj qoriwan jawerqorqa.

⁵Chaymantataj chay qori ningrista chay k'aspiswan pasacherqa chaymanta oqharispa apanapaj.

⁶Chaymanta ruwallarqataj chay kajaj kirpananta qori purumanta. Sayt'unman karqa uj metro centimetrosniyoj, kinrayninmantaj karqa sojta chunka phishqayoj centimetrosniyoj.

⁷Chay patapitaj ruwarqa iskay angelesta qorimanta, martillowan ruwasqata.

⁸Ujninta sayacherqa uj lado cantonman, ujnintataj uj lado cantonman qhawarinasqasta. Chaykunataj mana waj wajchu karqanku, manchayqa ujlla karqanku kirpanantin.

⁹Chay angelesqa purajmanta qhawanakusharqanku kirpana patapi lijrasnin oqharisqas kirpanaman k'umuykusqas.

¹⁰Chaymantaqa mesatañataj acacia maderamanta ruwarqa; sayt'unman karqa isq'on chunka centimetrosniyoj, kinrayninmantaj karqa tawa chunka phishqayoj centimetrosniyoj, patamantaj karqa sojta chunka phishqayoj centimetrosniyoj.

¹¹Jinaytawantaj tukuyninta qoriwan k'askaykucherqa, cantosnintapis awakipasqata jina qoriwan muyuykucherqa.

¹²Mesaj muyuynenqa phatunman karqa uj t'ajllu jina, chaytapis qorillawantaj cantosninta awakipasqata jina muyuykucherqa.

¹³Chaymantaqa ruwallarqataj qorimanta tawa ningrista sortejasta jina, jinaspataj tawantin esquinasninman k'askaracherqa, maynejpichus chakisnin kasharqa chaykunaman.

¹⁴Chay qori ningrisqa mesa urapi karqa tawantin esquinasnimpi, chayninta puraj ladoman k'aspista pasacherqa, chaymanta oqharispa chay mesata apaykachanapaj.

¹⁵Chay k'aspistapis mesata apaykachanapajqa, acacia maderamanta ruwarqa, jinaspataj qoriwan jawerqorqa.

¹⁶Imaschus mesapi kananku karqa, chaykunatapis qori purumanta ruwarqa: chuwasta, cucharasta, jarrasninta, copastawan, ima ch'irwasqastachu ofrendasta apamoj kanku chaykunata jap'inapaj.

¹⁷Bezaleelqa ruwallarqataj qori purumanta uj k'anchachinata martillowan ch'eqospa: Sayananta, cañonninta, copasninta, t'ika moqos jina chaykunasninta, t'ikaman rijch'asqa puntasninta ima, chaytaj ujllapis kanman jina karqa.

¹⁸Puraj ladomanta sojta palqas llojserqa, chaupimantataj uj; ajinaqa sapa ladopi kinsa palqasniyojkama karqa.

¹⁹Sapa uj palqaqa karqa kinsa moqosniyoj almendra t'ika jina, t'ika moqoyoj phanchapacha. Ajina karqa sojtantin palqasnin.

²⁰Chay k'anchachina uramantapacha almendra t'ika jina tawa copasniyoj karqa, moqosniyoj t'ika jina phancharishaj.

²¹Iskay palqasnimpa urasnimpi chay moqosnin karqa; jinallataj iskay kaj palqaspi, kinsa kaj palqaspipis.

²²Chay moqosnin, palqasnin, jap'inasninwan ima, ujlla karqa qori purumanta martillowan ruwasqas.

²³Chaymantaqa qanchis k'anchachinasninta, kikillantataj qorimanta ruwarqs, pabilo k'utunasninta, aceite jap'inasninta ima.

²⁴K'anchachinata, tukuy imasnintawan ruwarqanku kinsa chunka kinsayoj kilos qori purumanta.

²⁵Bezaleelqa ruwallarqataj incienso altarta acacia maderamanta, puraj cantonmantaj chhikachaj pura karqa. Sayt'unman karqa tawa chunka phishqayoj centimetrosniyoj, kinrayninman kikillantaj karqa, patamantaj isq'on chunka centimetrosniyoj. Jinallataj sapa esquinasnimpi wajrasman rijch'asqa kikinmanta ruwasqs karqa altarwan ujlla.

²⁶Chaymantataj patanta qoriwan k'askaykucherqa tawantin cantosninta, wajrasninta imaqa qoriwan muyuykucherqa awakipasqata jina.

²⁷Chay awakipasqa urasnin mantaj k'askaracherqa qorimanta ruwasqa ningrista, ujnin esquinanman iskayta, ujnin esquinanmantaj iskayta chayninta k'aspista pasacherqa, chaymanta oqharispa maymampis apaykachampaj:

²⁸Chay k'aspistaqa ruwarqs acacia maderamanta, jinaspataj qoriwan jawerqorqa.

²⁹Chaymantataj Bezaleel ruwarqa Diospaj t'aqanapaj jawina aceiteta. Jinallataj inciensotapis k'acha q'apayniyojta, imaynatachus perfumeta ruwajkuna ruwanku ajinata.