Read Quechua Bolivia DC Bible ÉXODO 40 Bible Online

ÉXODO 40 - Quechua Bolivia DC Bible bible

ÉXODO 40

¹Chaymanta Moisesman Señor parlarqa, kay jinata: Ñaupaj kaj diapi ñaupaj kaj killapi Dioswan tinkukuna toldota sayarichinki.

³Chay ukhuman churaykunki Diospa leyninwan kaj cajonta, chaytataj velowan qhataykunki.

⁴Mesata apaykunki, k'anchachinatawan. Chay pataman sumajta maychus kananman churaykunki.

⁵Chanta apaykullankitaj qori altarta, chaypi inciensota q'osñichinapaj Diospa leyninwan kashaj cajompa ñaupaqenman, jinaspataj Diospa tiyakunan yaykuyman velowan jark'aykuchiy.

⁶Chaymanta churaykullaytaj sumaj imasta ruwana altarta Diospa tiyakunanman yaykuyman.

⁷Chaymantaqa ch'illamita yakuyojta churallankitaj Dioswan tinkukuna toldowan altarwan kashan chay chaupiman.

⁸Chaymantataj pationta muyuykuchinki, punkumantaj uj cortina jark'achinata churaykunki.

⁹Chaymantataj sumajnin kaj aceitewan Diospa tiyakunan wasita jawiykunki, jinallataj chay ukhupi imaschus kajkunatapis. Ajinata chaytaqa tukuy imasninwan Diospaj t'aqanki, t'aqasqa cheqa kanampaj.

¹⁰Sumajta q'apashaj altarta aceitetawan ch'ajchuykullankitaj, tukuy imasnintawan. Ajinata chay altartaqa Diospaj t'aqachinki, may t'aqasqa kanampaj.

¹¹Ch'illamitapis sayanasninta aceitewan jawillankitaj, ajinamanta t'aqasqallataj kanampaj.

¹²Chaymantataj Aaronta wawasnintawan Dioswan tinkukuna toldo punkuman pusay, chaypitaj paykuna yakuwan mayllakuchunku.

¹³Jinaspataj Aaronta sumaj ruwasqa p'achaswan p'achallichinki, aceitewantaj jawiy sacerdotey t'aqasqa kanampaj.

¹⁴Chaymantaqa wawasnintañataj qayllachimuspa wakin p'achaswan p'achallichiy.

¹⁵Jinaytawantaj aceitewan jawiy, imaynatachus tatankuta jawerqanki ajina, paykunapis sacerdotesniy kanankupaj. Ajinata aceitewan jawisqaykeqa wiñaypaj wawasninkupis qhepaman sacerdotesllapuni kanankupaj.

¹⁶Moisesqa chaykunata kikinta ruwarqa imaynatachus Señor kamachisqanman jina.

¹⁷Ajinata Egiptomanta llojsimusqankumanta iskay watanman qallarikuy killapi, ñaupaj kaj diapitaj Dioswan tinkukuna waseqa sayarerqa.

¹⁸Moisesqa Dioswan tinkukuna wasita sayaricherqa, sayanasnin chukustapis sumajta sayaracherqa, chaymantaj tablasninta sayaykucherqa, jinaspataj k'aspisninta jusk'uracherqa, chaymantataj postesninta sayaracherqa.

¹⁹Chaymantataj Moisés Dioswan tantakuna toldota sayaricherqa, jinaspataj patanta toldowan qhataykorqa, imaynatachus payman Señor kamachisqanman jina.

²⁰Chaymantataj Moisesqa rumispi Diospa leynin escribisqa karqa chayta cajonman churaykorqa, kajaj ningrisninmantaj k'aspista jusk'uracherqa, jinaspataj kirpananwan kirpaykorqa.

²¹Jinata ruwaytawantaj chay cajonta Diospa tiyakunan toldo ukhuman apaykorqa; velota warkhuykuspataj, chaywan chay cajonta qhataykorqa, imaynatachus Moisesman Señor kamachisqanman jina.

²²Dioswan tinkukuna wasiman apaykorqa mesata, Diospa tiyakunan wasi patanejman, velomanta jawanejpi.

²³Chay mesa patamantaj t'antasta churaykorqa sumaj k'achanchasqasta Señorpa ñaupaqenman, imaynatachus Señor payman kamachisqanman jina.

²⁴Jinallataj Dioswan tinkukuna wasiman apaykullarqataj k'anchachinata mesaj chimpanman Diospa tiyakunan ura uyanejman.

²⁵Chaymantataj k'anchachinaj puntasninman k'anchaykunata jap'iracherqa Diospa ñaupaqempi imaynatachus Señor payman kamachisqanman jina.

²⁶Qori altartapis apaykullarqataj Dioswan tinkukuna wasiman veloj ñaupajninman.

²⁷Chay altar patapitaj inciensota ruphacherqa, imaynatachus Moisesman Señor kamachisqanman jina.

²⁸Chaymantaqa Diospa tiyakunan wasi punku yaykuyman Moisesqa uj cortinata churaykorqa.

²⁹Chay punkunejllamantaj sumajta ruphachej altarta churaykorqa, Dioswan tinkukuna wasi punkuman, chay altar patapi ofrenda astawan uywastawan jaywaj kanku Señorman, imaynatachus Moisesman Señor kamachisqanman jina.

³⁰Chaymantaqa ch'illamitañataj Diospa tiyakunan wasiwan altarwan kashan chay chaupiman churaykorqa, chaymantaj mayllakunapaj yakuta churarqa.

³¹Chaypi mayllakoj kanku makisninkuta, chanta chakisninkuta ima Moiseswan Aaronwan, chantá wawasnin ima.

³²Chaypi mayllakoj kanku Dioswan tinkukuna wasiman yaykunankupaj, jinallataj altarman qayllaykunankupajpis, imaynatachus Moisesman Señor kamachisqanman jina.

³³Chay imasta ruwayta tukuytawantaj Dioswan tinkukuna wasej muyuyninta, patiompa muyuynintawan, altarpa muyuynintawan uj perqata jina muyuykucherqa. Chaymantataj patio punkuman uj cortinata churaykorqa. Ajinata Moisesqa chay tukuy imasta ruwayta tukucherqa.

³⁴Chaymantataj chay Dioswan tinkukuna toldota phuyuykamorqa, Señorpa jatun kaynintaj chay wasiman junt'aykorqa.

³⁵Jinamanta Moisesqa manaña chayman yaykuyta aterqachu, imaraykuchus tukuyninta phuyuykorqa, Señorpa jatun kaynintaj chay Dioswan tinkukuna toldoman junt'aykorqa.

³⁶Chay phuyu oqharikojtintaj, israelitasqa tukuy imasninkuta oqharikuytawan purirej kanku maymampis rinankupaj.

³⁷Mana chay phuyu oqharikojtintaj israelitasqa mana oqharikojchu kanku, ima p'unchaychus chay phuyu oqharikunankama.

³⁸Israelitaspaj chay tukuy puriyninkupi, Señorpa phuyun sapa p'unchay Diospa tiyakunan toldomanta manapuni oqharikojchu, tutantaj nina k'anchayllapuni sut'iyaj chay Diospa tiyakunan toldopeqa.