Read Quechua Bolivia DC Bible ÉXODO 5 Bible Online

ÉXODO 5 - Quechua Bolivia DC Bible bible

ÉXODO 5

¹Chaymantaqa Moiseswan Aaronwan faraonman parlaj rerqanku, nispa: Israelpa Señornin, Diosnintaj ajinata nin: Saqepuway aylluy Israelta ch'inman rispa, chaypi yuyarikuwaspa qarakuta ruwanankupaj.

²Faraontaj kuticherqa: Pitaj kasqa chay Señor, noqa paypa nisqanta kasunaypaj, israelitastaj rejta saqenaypaj? Noqaqa mana rejsinichu chay Señorta, nitaj saqesajchu israelitas rejta.

³Paykunataj nerqanku: Hebreospa Diosnin taripawayku, chayrayku rinaykupuni tiyan ch'in pampaman kinsa día puriyta, chaypi rikuchikuta Señorniyku Diosman jaywamunaykupaj, ama ima onqoypis jamuspa wañuchinawaykupaj, chayri ima espadanejtapis wañunaykupaj.

⁴Egipto reytaj paykunaman nerqa: Qankunarí, Moisés, Aarón, imaraykutaj runasta llank'ayninkumanta saqechiyta munashankichejri? Riychej qankunapis, llank'anaykichejta ruwamuychej.

⁵Chanta nillarqataj faraonqa: Kunanqa ashkha kanku israelitasqa kay tukuynejpi. Kunanqa qankunachu saqechiwajchej kasqa llank'ayninkuta?, nispa.

⁶Chay kikin diapacha faraonqa sapa t'aqamanta kaj kurajkunata, capatazkunatawan aswan sinch'ita kamacherqa, nispa: Kunanmanta ñaupajmanqa amaña ichhuta israelitasman qonkichejchu adobesta ruwanankupaj imaynatachus kunan qoshankichej jinataqa; manachayqa paykuna kikin rispa oqharikamuchunku ichhuta.

⁸Qankunataj ninaykichej tiyan, imaynatachus kunankama ruwarqanku ajinallatapuni adobesta ruwanankuta ni uj pisita; imaraykuchus paykunaqa qhellashanku, chayrayku nishanku: Diosniykuman rikuchikuta jaywamusqayku, nispa.

⁹Qankunaqa astawan jasut'ishaspalla sinch'ita llank'achiychej, imatachus ruwanallankupi yuyanankupaj, ama kasunankupaj llulla palabrasta.

¹⁰Chaymanta sapa t'aqata kamachejkuna, capatazkuna ima, llojsiytawan runasman nerqanku: Faraonqa kamachiwayku amaña ichhuta qonasuykuta.

¹¹Kunanqa qankuna kikiykichej maymantapis ichhuta oqharikamunaykichej tiyan, nitaj ni uj pisita ruwanaykichejchu tiyan kunankama ruwarqankichej chaymanta.

¹²Chaymanta israelitasqa tukuynejta ch'eqerarqanku rastrojosta ichhoj cuentanmanta oqharimoj t'uruta sarunankupaj.

¹³Sapa t'aqata kamachejkunaqa astawan sinch'ita llank'acherqanku, nispa: Tukunaykichej tiyan sapa día mashkhatachus ruwanaykichej kashan chay chhikata, ichhuta qoshajtiyku ruwaj kankichej chay chhikallatataj.

¹⁴Maytapuni jasut'erqanku faraompa capatazkunasnin israelitas ukhupi capatazkuna churasqas karqanku chaykunata, nispa: Imaraykutaj mana mashkhatachus ruwaj kankichej chay chhikallatataj adobesta ruwankichejchu, ni qayna, nitaj kunampisri?

¹⁵Chaymantataj israelitasmanta capatazkuna, faraonman quejakoj rerqanku, nispa: Imaraykutaj chay jinata ruwanki kay kamachisniykitari?

¹⁶Manaña qowaykuchu ichhuta, munankitaj adobesta ruwanaykuta; chantapis anchata maqawayku. Chaypajqa runasnillaykitaj juchayoj kanku.

¹⁷Faraontaj paykunaman nerqa: Qankunaqa kankichej qhellas, sinch'i qhellas. Chayrayku ninkichej: Rispa Señorniykuman rikuchikuta jaywamusqayku, nispa.

¹⁸Riychej ruwanaykichejta ruwamuychej. Ichhutaqa mana qosonqachejchu, chaywan mana chaywan qankunaqa mashkhatachus ruwaj kankichej chay chhikallatapuni adobesta ruwanaykichej tiyan sapa día.

¹⁹Chaymantataj capataz kajkuna israelitasqa, aswan llakiypi rikukorqanku; adobe ruwanasniykichejmanta sapa día mana pisitachu ruwankichej nispa, faraón jinata nejtin.

²⁰Paykunataj faraonwan parlasqankumanta llojsimuspa Moiseswan Aaronwan jawapi suyashajwan tinkukorqanku.

²¹Paykunamantaj nerqanku: Señorqa rikuchun qankunaj ruwasqaykichejta, cheqanchachuntaj. Qankuna juchayoj kankichej faraón tukuy kamachisnin ima astawan noqanchejta chejninakunawanchejpaj. Qankuna kikiykichej churankichej espadata makisninman, noqanchejta wañuchinawanchejpaj.

²²Moisesqa chaymanta rispa Diosmanta mañakorqa, nispa: Señor, imaraykutaj chay jinatapuni llakichinki kay ayllutari? Chaypajqa imapajtaj kachamuwarqankiri?

²³Kayman jamuspa faraonman sutiykipi parlasqaymantapacha payqa astawan llakiyman churan israelitasta; qantaj chaymanta manaraj kacharichinkichu aylluykita.