Read Quechua Bolivia DC Bible ÉXODO 6 Bible Online

ÉXODO 6 - Quechua Bolivia DC Bible bible

ÉXODO 6

¹Diostaj Moisesman nerqa: Kunanraj rikunki imatachus faraonman ruwasaj chayta. Imaraykuchus paymantaqa sinch'i kallpawampuni kacharichisqaykichej chaymanta ripunaykichejpaj, jinallataj paypis may phiñasqa kacharisonqachej.

²Diosqa parlallarqapuni Moiseswan, nispa: Noqamin kani Señorqa.

³Noqa tukuy atiyniyoj Dios sutiywan rejsichikorqani Abrahamwan, Isaacwan, Jacobwan ima. Señor nisqa sutiywanri paykunaman mana rejsichikorqanichu.

⁴Chantapis paykunawan uj tratota ruwarqani, Canaán jallp'ata qonaypaj. Chay jallp'api paykunaqa karu llajtayoj jinalla karikorqanku pisi p'unchaykunata.

⁵Ña kunanqa rikuniña israelitas sinch'ita ñak'arisqankuta, egipcios sinch'ita llank'achisqankuta, kunanqa yuyarikuni uj tratota ruwasqayta.

⁶Chayrayku nimuy israelitasman: Noqa Señormin, orqhosqaykichej chay jina ñak'arispa egipciospaj llank'anaykichejmanta, chay jina sinch'i kamachi ruway mana atinamanta. Noqa atiyniyta rikuchisaj. Ashkha muchuy mana atinasta rikuchispa kacharichisqaykichej sumaj cheqanta ruwaspa.

⁷Noqa orqhokapusqaykichej: Qankunaqa aylluy kankichej; noqataj Diosniykichej kasaj. Chaypi qankunaqa yachankichej noqamin Señorqa, qankunaj Diosniykichej kasqayta, egipcios mayta ñak'arichispa llank'achisusqaykichejmanta, noqa qankunata orqhosqayta.

⁸Noqa pusasqaykichej, ima jallp'atachus Abrahamman, Isaacman, Jacobman ima, chayaqenkupaj qosqaykichej nerqani chayman. Noqamin kani Señorqa.

⁹Chay kikinta Moisesqa israelitasman willamorqa, paykunaqa mana payta kasuta ruwarqankuchu; imaraykuchus paykunaqa may ñak'arisqas kasharqanku, llakisqastaj maytapuni llank'asqankumanta.

¹⁰Chaymanta Señorqa Moisesman nillarqataj:

¹¹Rispa faraonman nimuy, saqey israelitasta jallp'aykimanta llojsejta, nispa.

¹²Moisestaj Señorman kuticherqa: Qhaway, israelitasqa mana uyariwankuchu; imaynatataj faraón noqata uyariwanqari? Chantapis noqa mana ch'uyata parlayta atishajtiyri?

¹³Chaymanta Señorqa Moisestawan Aarontawan kacharqa israelitasman, rey faraonmanwan nimunankupaj, paykuna israelitasta Egipto jallp'amanta orqhonankupaj kamachisqas kasqankuta.

¹⁴Kaykuna karqanku sapa ayllumanta kurajkuna churasqas tatasninkumanta. Israelpa kuraj wawan Rubempata wawasnin karqanku: Hanoc, Falú, Hezrón, Carmi ima. Kaykuna karqanku Rubempa ayllusnin.

¹⁵Kaykuna Simeompa wawasnin karqanku: Jemuel, Jamín, Ohad, Jaquín, Zohar, Saúl ima. Kay Saulpataqa maman cananea karqa. Kaykuna karqanku Simeompa ayllusnin.

¹⁶Kaykuna karqanku Levej wawasnimpa sutisnin kurajmanta sullk'akama: Gersón, Coat, Merari ima. Leveqa pachaj kinsa chunka qanchisniyoj watasta kausarqa.

¹⁷Gersompa wawasnenqa karqanku familiasninkuman jina: Libni, Simei ima.

¹⁸Coatqa pachaj kinsa chunka iskayniyoj watasta kausarqa. Wawasnintaj karqanku: Amran, Izhar, Hebrón, Uziel ima.

¹⁹Merarej wawasnintaj karqanku Mahli, Musiwan. Kaykuna karqanku Levej ayllusnin, mirayninkuman jina, kurajmanta sullk'akama.

²⁰Amramqa casararqa tian Jocabedwan, wawasninkutaj karqanku Aaronwan, Moiseswan. Amramqa kausarqa pachaj kinsa chunka qanchisniyoj watasta.

²¹Izharpa wawasnintaj karqanku Coré, Nefeg, Zincrewan.

²²Uzielpa wawasnintaj karqanku Misael, Elzafán, Sintriwan.

²³Aaronqa casararqa Elisabetwan, mayqenchus karqa Aminadabpa ususin, Naasompa panan. Pay wawasta rejserqa Nadabta, Abiuta, Eleazarta, Itamartawan.

²⁴Coréj wawasnintaj karqanku: Asir, Elcana, Abiasafwan. Kaykuna karqanku Coréj familiasnin.

²⁵Aarompa ujnin kaj wawan Eleazar casararqa Futielpa ususinwan, paypa wawantaj karqa Finees. Kaykuna karqanku levitaspa ayllusninmanta kurajkuna layankuman jina.

²⁶Kaykuna karqanku Aaronwan Moiseswan, mayqenkunamanchus Señorqa nerqa israelitasta orqhomunankuta Egipto jallp'amanta, ashkha soldadosta jina.

²⁷Paykunallataj kanku Moiseswan Aaronwan, Egipto rey faraonwan parlamojkuna, israelitasta orqhomunankupaj Egiptomanta.

²⁸Mayk'ajchus Señorqa Egiptopi Moiseswan Aaronwan parlarqa chaypacha nerqa:

²⁹Noqamin kani Señorqa. Rispa Egipto rey faraonman willamuy, imastachus noqa nisqayki chayta.

³⁰Moisestaj kuticherqa: Señor, noqaqa mana parlayta atinichu, qallullay watakuwan, imaynatataj chay jinata faraonqa uyariwanqari?, nispa.