Read Quechua Bolivia DC Bible ÉXODO 8 Bible Online

ÉXODO 8 - Quechua Bolivia DC Bible bible

ÉXODO 8

¹Señorqa Moisesman nillarqataj: Faraonman rispa nimuy: Señorqa ajinata nimusunki: Saqey aylluyta llojsejta yupaychamunawampaj.

²Mana llojsejta saqenki chayri, kayqa, noqa jasut'isaj tukuynin Egiptota k'aylankulaswan.

³Mayoqa k'aylankulasta mirachenqa, chaykuna llojsimuspa tukuynejman junt'anqanku, wasiykiman, maypichus puñunki chayman, kamachisniykej wasisninman, tukuy runasniykejman, hornosniykiman, maypichus mikhunasta ruwachinki chaykunamanwan.

⁴K'aylankulasqa patasniykiman wicharenqanku, tukuy Egipto runaspa patanman, jinallataj kamachisniykimampis.

⁵Chaymanta Señorqa Moisesman nerqa: Aaronman niy, tojnunta oqharinanta mayusta qhawarispa, wayq'osman, mayusman, qochasman; chaykunamanta jamp'atus llojsimunankupaj tukuynin Egipto jallp'asman.

⁶Aarontaj makinta jaywarerqa Egipto yakus pataman, Jinajtinkamataj k'aylankulasqa yakusmanta llojsiykamorqanku tukuynin Egipto jallp'asman junt'aykunankukama.

⁷Tukuy layqaspis kikillantataj ruwaspa k'aylankulasta junt'aykucherqanku Egipto llajtankuman.

⁸Jina kajtintaj faraonqa Moisesta Aarontawan wajyachispa nerqa: Señormanta mañaychej ari, k'aylankulasta chinkachinampaj, noqamanta, runasniymantawan karunchachispa, noqataj saqesaj israelitas llojsinankuta Señorman rikuchikusta jaywamunankupaj.

⁹Moisestaj kuticherqa: Niway, mayk'ajtaj munanki Señormanta mañanayta qanrayku, kamachisniykirayku, runasniykirayku ima; k'aylankulas karunchakunankupaj qanmanta, palacioykimantawan, mayullapiña qhepakunankupajri?

¹⁰Faraonqa nerqa q'ayapacha, nispa. Moisestaj nerqa: Qampa munasqaykiman jina mañasaj, ajinamanta qan rejsinaykipaj, Señor Diosniyku jinaqa mana pipis kasqanta.

¹¹K'aylankulasqa riponqanku qanmanta, palacioykimanta, kamachisniykimanta, runasniykimanta ima, mayullapiña qhepakonqanku.

¹²Moiseswan Aaronwan faraompa ñaupaqenmanta llojserqanku. Chaymanta rispa Moisesqa Señormanta mañakorqa, k'aylankulasta faraonman apachimusqanta karunchachinampaj.

¹³Señortaj Moisespa nisqanman jina kasorqa. K'aylankulastaj wañurarqanku wasispi, patiospi, tukuy campospi ima.

¹⁴Runasqa k'aylankula wañusqasta tantarqanku qotu qotuta. Chantaqa tukuynejpi millayta phututirerqa.

¹⁵Faraontaj chay imas manaña kajtin qonqaporqa, sonqontapis astawan rumiyarqa, manaña kasorqachu Moiseswan Aaronwan nisqankuta, imaynatachus Señorpa nisqanman jina.

¹⁶Señorqa ujtawan Moisesman nerqa: Aaronman niy ujtawan tojnunta oqharinanta, chaywantaj ñut'u jallp'ata wajtachun, chay ñut'u jallp'a tiwlaman tukuspa, Egipto jallp'aman junt'anampaj.

¹⁷Paykunata ajinata ruwarqanku. Aaronqa tojnunta oqharispa, pampata wajtaspataj jallp'ata oqharicherqa, chaytaj tiwlaman tukuspa Egipto jallp'aman junt'aykorqa. Chay tiwlastaj runasta, uywasta ima tukuykorqa. Tukuynin Egiptopi maynejpipis tiwlallaña karqa.

¹⁸Yatirisqa kikillantataj ruwaspa imatachus yachasqankuwan mana ajinata ruwayta aterqankuchu. Tiwlasqa tukuynin runasta tukuykorqa, jinallataj uywastapis.

¹⁹Chaymantaqa chay layqas faraonman nerqanku: Kayqa Diospa jasut'iynin, nispa. Faraonqa astawan sonqonta rumiyacherqa; mana imatapis kasorqachu, Señorpa nisqanman jina.

²⁰Señorqa ujtawan nillarqataj Moisesman: Q'aya paqarin faraonqa tutamanta mayuman renqa; qampis tutamanta jatarispa riy paywan parlaj. Ajinata ninki: Señorqa ajinata nimusunki: Saqey aylluyta llojsejta yupaychamunawampaj.

²¹Manachus saqenki llojsejta chayqa, noqa apachimusaj imaymana khanikoj ch'uspista qampa pataykiman, kamachisniykiman, runasniykiman, wasisniykiman ima junt'aykunampaj. Tukuy egipciospa wasisninman junt'aykonqanku, tukuy pampasnintinman.

²²Ajina kashajtintaj, Gosén jallp'apeqa mana kanqachu khanikoj ch'uspisqa, mayqempichus aylluy tiyakushan chaypi; ajinamanta yachanaykichejpaj noqa Señor kay jallp'a patapi kashasqayta.

²³Ajinata aylluytawan aylluykitawan t'aqasaj. Kaytaj q'ayapacha kanqa.

²⁴Ajinata Señorqa ruwarqa. Khanikoj ch'uspisqa manchay ashkhas urphurimorqanku, faraompa palacionman, kamachisnimpa wasisninman, tukuynejman junt'aykunankukama. Tukuynin jallp'astapis mana allinta ruwarparerqankuchu.

²⁵Chaymanta faraonqa Moisesta Aarontawan wajyachispa, nerqa: Rispa Diosniykichejman rikuchikusta jaywamuychej mana kay jallp'amanta ripuspalla.

²⁶Moisesqa kuticherqa: Jinata kayllapi ruwanaykoqa mana allinchu, ima uywastachus Señor Diosniykuman jaywasqayku chayqa egipciospaj mana allinchu, paykunapajqa Diosninku jina. Sichus egipcios rikuwasqayku chay uywasta rikuchikusta jaywashajta chayqa, mayqenkunatachus paykuna yupaychanku chaytaqa, cheqamanta rumiswan ch'anqaspa wañurparichiwasqayku.

²⁷Noqaykoqa rinayku tiyan kinsa día puriyta ch'in pampaman, chaypi Señor Diosniykuman rikuchikuta jaywamunaykupaj, Pay kamachiwasqaykuman jina.

²⁸Faraontaj nerqa: Noqa saqesqaykichej ch'in pampaman rispa Señor Diosniykichejman rikuchikuta jaywamojta, ama ancha karuman rinaykichej kajtenqa; chaypi noqapajpis mañapuwaychej.

²⁹Moisestaj kuticherqa: Kaymanta riytawan Señormanta mañapusqayki kay khanikoj ch'upis qanmanta jatarinankupaj, jinallataj kamachisniykimanta, llajtaykimantapis q'ayapacha. Qantaj amallaña ch'aukiyawaykuchu, amañataj jark'aychu israelitas rispa Señorman richuchikusta jaywamojta.

³⁰Moisesqa chaymanta riytawan palacionmanta rispa, Señormanta mañakorqa.

³¹Señortaj Moisespa imatachus nisqanman jina ruwarqa. Tukuynin khanikoj ch'uspista chinkacherqa faraonmanta, kamachisnimpamanta, runaspa wasisninmanta ima mana ujniyojta.

³²Faraontaj chayta rikuytawan sonqonta rumiyachillarqataj, mana saqerqachu israelitasta rejta.