Read Quechua Bolivia DC Bible ÉXODO 9 Bible Online

ÉXODO 9 - Quechua Bolivia DC Bible bible

ÉXODO 9

¹Chaymanta Señorqa nillarqataj Moisesman: Rispa nimuy faraonman: Hebreospa Diosnenqa ajinata nimusunki: Kacharipuway Israel aylluyta, rispa yupaychamunawampaj.

²Manachus kacharinki, astawanchus jap'ikullankichejpuni chayqa, Señorqa uywasniykita sinch'i onqoywan atiyninta rikuchispa jasut'enqa, caballosta, burrosta, camellosta, wakasta, ovejasta ima.

⁴Señorqa israelitaspa uywasninta egipciospa uywasninmanta t'aqanqa; chayrayku israelitaspa uywasnenqa ni ujpis wañonqankuchu.

⁵Señorqa ima pachachus kay kananta nerqa: Q'aya pacha kayta ruwasaj, nispa.

⁶Q'ayantin pacha Señorqa chayta ruwarqa, Egiptopi tukuy uywas wañurarqanku israelitaspa uywasninrí ni ujpis wañorqankuchu.

⁷Faraonqa israelitaspa uywasninta qhawarejta kacharqa, nitaj uj wañusqatapis tarerqankuchu. Chaywampis faraonqa sonqonta rumiyachillarqapuni, manapuni israelitasta kacharerqachu.

⁸Chaymanta Señorqa nillarqataj Moisesman, Aaronmanwan: Hornomanta orqhospa, ushpha morq'ota makiykichejpi apaychej. Moisestaj chayta qhallachun pataman faraompa ñaupaqempi.

⁹Chay ushpha q'osñitaj tukuynin Egipto jallp'aman junt'aykuchun; chaymantataj llejti onqoyman tukuspa jap'ichun runasta, uywasta ima tukuynin Egipto jallp'api.

¹⁰Paykunataj kikinta ruwarqanku hornomanta orqhospa, ushphata makinkupi aparqanku faraompa ñaupaqenman. Chaypitaj Moisesqa faraón qhawashajtin pataman ushphata qhallarqa. Chaymantataj runas, uywas ima llejti onqoyta jap'irarqanku tukuy ukhusninkupi.

¹¹Layqa runaspis kayta mana imaynamanta ruwayta aterqankuchu Moisespa ñaupaqempi, imaraykuchus paykunajtapis tukuy ukhunkupi llejti onqoy karqa, jinallataj tukuy egipcio runaspipis.

¹²Señortaj astawan faraompa soqonta rumiyacherqa; chayrayku Moisesta Aarontawan mana kasuta ruwarqachu Moisesman Señor nisqanman jina.

¹³Chaymanta Señorqa ujtawan Moisesman nillarqataj: Q'aya paqarin tutamanta jatarispa riytawan nimuy faraonman: Hebreospa Diosnin Señormin kayta nimusunki: Kachariy israelitasta noqata yupaychamunawankupaj.

¹⁴Kunan kutipeqa tukuy jasut'iykunasniyta apachimusqayki qampa contraykipi, yanapajkunasniykej contranta, runasniykej contranta ima. Ajinamanta yachanaykipaj, mana pipis kay jallp'a patapi noqa jina kasqanta.

¹⁵Sichus mana makiyta oqhariyman qanta nanachisunaypaj, runasniykitawan, manchay jasut'iyniywan chayqa, kay jallp'a patamanta chinkachisqaña kawaj karqa.

¹⁶Chaywampis cheqamanta churayki, qampi atiyniyta rikuchinaypaj, qannejta sutiy willasqa kanampaj tukuy mundontimpi.

¹⁷Chaywampis qanqa astawanraj sonqoykita rumiyachishanki israelitaspa contranta, mana paykunata saqeshankichu llojsejta.

¹⁸Qhawariy, q'aya kay horasta manchay jatuchaj granizo parata parachimusaj, chay jina granizoqa ni jayk'ajpis karqachu kay Egiptopi kay mundo ruwakusqanmanta kunankama.

¹⁹Chayrayku kunanqa kachaspa tantachimuy tukuy uywasniykita campospi kajkunata, allinnejman pakakunankupaj. Sichus runas chayri ima uywallapis campopi tarikonqanku, ni ima wasillapipis pakakonqankuchu chayqa, granizo wañurachenqa.

²⁰Wakin faraompa yanapajkunasnin Señorpa nisqasninta uyarispa mancharikorqanku, chayrayku kamachisninkuta, uywasninkutapis wasisninkuman wisq'arqanku.

²¹Piskunachus mana kasuta ruwarqankuchu Señorpa nisqasninta chaykunaqa, kamachisninkuta, uywasninkutapis saqellarqanku jawapi.

²²Chaymanta Señorqa Moisesman nerqa: Makiykita oqhariy pataman, tukuynin Egipto jallp'asman granizo urmanampaj runaspa patasninman, uywaspaman, tukuy qhoraspa patanman ima.

²³Moisestaj tojnunta pataman oqharerqa. Señortaj qhon qhonkunata, lliuj lliujkunatawan rikhurichimorqapacha, granizotaj paramorqapacha ninawan chajrusqa tukuynin Egipto jallp'aman.

²⁴Granizoqa qhon qhonkunawan ninawan chajrusqas urmamorqanku, chay jina granizoqa ni jayk'ajpis karqachu, chay jallp'api Egiptopi runa tiyakusqanmantapacha.

²⁵Chay granizoqa tukuy ima kajta t'unaykorqa Egiptopi; runasta uywastapis wañuracherqa, jinallataj qhorasta, sach'astapis, q'ara k'aspillata sayacherqa.

²⁶Gosén jallp'allaman mana granizoqa chayarqachu, maypichus israelitas tiyakaorqanku chayman.

²⁷Chaymantaqa faraón wajyachimorqa Moisesta Aarontawan, nerqataj: Kunan kutipeqa juchata ruwani, jinallataj runasniypis, Señorqa cheqampuni.

²⁸Señormanta mañay ari, kay qhon qhonkuna, granizo ima thañinampaj; noqataj manaña astawan jark'asqaykichejchu llojsipunaykichejta.

²⁹Moisestaj nerqa: Kayqa kunitan kay llajtamanta llojsiytawan Señorman makisniyta oqharisaj mañakuspa, qhon qhonkunataj thañenqanku, granizopis manañataj kanqachu, yachanaykipaj kay jallp'a patapi Señorqa kasqanta.

³⁰Chaywampis noqaqa yachani, ni qan nitaj kamachisniykipis manchachikunkichejrajchu Señor Diospa ñaupaqempi.

³¹Linowan cebadawan q'ala chinkachisqas karqanku; chaypacha cebadaqa espigasqaña karqa, linotaj sumajtaña t'ichasharqa.

³²Trigowan centenowanqa mana imanasqaschu karqanku, imaraykuchus manaraj llojserqankurajchu.

³³Moisestaj faraompa qayllanmanta, llajtamanta llojsiytawan Señormanta mañakuspa makisninta oqharerqa. Chay ratopacha qhon qhonkunawan granizowan thañiporqanku. Jinamanta paraqa manaña paramorqachu.

³⁴Faraontaj manaña paramojta rikuspa, nitaj granizo, nitaj qhon qhonkunapis kajtin ujtawan juchallikullarqataj. Chantapis astawan sonqonta rumiyacherqa, jinallataj kamachisnimpis.

³⁵Faraonqa sonqonta rumiyachispa manapuni saqerqachu israelitas llojsinankuta, Señorpa nisqanman jina Moisesnejta.