Read Quechua Bolivia DC Bible JOB 13 Bible Online

JOB 13 - Quechua Bolivia DC Bible bible

JOB 13

¹Kay tukuy imastaqa kikin ñawisniywan rikuni; ningrisniywampis uyarini imaschus kajta.

²Imatachus yachasqaykichejta noqapis yachallanitaj; ni imapi qankunamanta pisichu kani.

³Chaywampis tukuy Atiyniyoj Dioswampuni parlayta munani. Paywan imamantapis unanchariyta munani.

⁴Qankunaqa cheqa kajta llullakuyniykichejwan pakankichej; qankunaqa qhasi mana kaj jampejkuna kankichej.

⁵Ch'inllapis kakuwajchej karqa chayqa, yachayniyoj runaspaj qhawasqas kawajchej.

⁶Uyariwaychej kunanqa sumajta, imaynata yuyaspachus parlasqasniyta.

⁷Yuyankichejchu Diospaj allinninta parlasqaykichejta jinata llullakuspaqa? Chay ch'aukiyayniykichejwanqa allintachu Diospaj parlawajchej?

⁸Diosraykuchu wakin runasta qhesachankichej? Qankunaqa Diosman sayasqaschu kankichej?

⁹Imaynataj kanman sichus Diosqa kausayniykichejmanta waturisunkichejman chayri? Chaypacha qankunaqa runata jinachu payta ch'aukiyawajchej?

¹⁰Chaypacha Diosqa sumajta jasut'isunkichejman, sichus pakayllamanta wakillanman sayakuwajchej chayqa.

¹¹Cheqamanta Diospa jatun kaynenqa mancharichisunkichejman, chay musphay manchachiynin kharkatichisunkichejman.

¹²Chay jinata parlasqasniykichejqa ushpha qhelli jina; parlasqasniykichejqa t'uru jinalla.

¹³Ch'inmanta kaychej, noqañataj parlarisaj. Chaymantaqa imapis jamuwachun!

¹⁴Kausayniyta wañuy patapi churasaj; kausayniyta makisniypi jap'ikusaj.

¹⁵Dios wañuchinawan kashajtimpis Payllamampuni k'askasaj, noqataj sut'inta paywan parlasaj imaynachus kasqayta.

¹⁶Payllataj jap'ikapuwanqa, imaraykuchus paypa ñaupaqenman sajra runaqa mana yaykuyta atinchu.

¹⁷Sumajta uyariwaychej imatachus yuyasqayta; imatachus nisqaytataj ningriykichejman yaykuchun.

¹⁸Noqapis imaynachus kasqayta parlarinay tiyan; yachanitaj cheqampi kasqayta.

¹⁹Sichus pipis juchaymantapuni ch'atawanman chayqa, ch'inyakusaj, wañupusajtaj.

²⁰Iskay imasllata qonawaykita mañakuyki, Diosníy, manataj qanmanta pakakusqaykichu.

²¹Amaña jasut'iwaychu ari; amaña manchachiyniykiwan jinata manchachiwaychu.

²²Chantaqa wajyaway, noqataj uyarisqayki; chayri noqa ñaupajta parlarisaj, qantaj kutichiwanki.

²³Niwan, mashkhatataj pantani, mashkhataj juchasniy? Rikuchiway ari imaspunichus juchasniy chayta.

²⁴Imaraykutaj uyaykita pakakuwanki, imajtintaj enemigoykita jina qhawawankiri?

²⁵Noqaqa wayraj apaykachasqan laqhe jina kani; imaraykutaj chay jinata chinkachiyta munawankiri? Noqaqa ch'aki ichhu jina kani, imaraykutaj qhatiykachallawankipuniri?

²⁶Imaraykutaj chay jinata contrayta ch'atawaspa qelqankiri; wayna kasqaymantapachataj juchaymanta cuentata mañawankiri?

²⁷Chakisniy cadenaswan maniyawanki, imaynatachus purisqayta qhawawanki, imaynatachus sarusqasniyta qhawarawanki.

²⁸Ukhoyqa ismusqapis kanman jina mikhukushan, thutaj p'acha k'utusqan jina.