Read Quechua Bolivia DC Bible JOB 14 Bible Online

JOB 14 - Quechua Bolivia DC Bible bible

JOB 14

¹Warmimanta nacesqa runaqa, pisillata kausan, imaymana llakiykunawan junt'a.

²Ujllata t'ika jina phancharparin, chaymantataj wañuykapun, llanthu jinataj chinkapun.

³Chay rijch'aj runatachu qhawarinki, qantaj paypa contranta uj demandata wakichinkichu?

⁴Pitaj chay jina ch'ichimanta llimphuchanmanri? Ni pipis atinchu.

⁵Cheqamanta diasnenqa yupasqalla, mashkha killastachus kausananqa qayllaykipi kashan; qan churanki maykamachus rinanta, manataj chayta pasayta atinchu.

⁶Amaña qhawaychu payta, saqellayña munasqampi kajta, saqellayña sapa p'unchay peonniyakoj jina kusikojta.

⁷Uj sach'a k'utusqa chayqa, chay sach'aqa atinraj ch'illchimuyta, k'utusqamantaqa ima kashajtimpis q'erqemusqasnin kanqapuni.

⁸Saphisnin jallp'a ukhupi machusña kajtimpis, k'ullumpis phunuyashajtinña.

⁹Yaku kajtenqa q'omeryamullanqapuni, juch'uy sach'ajta jina ramasnenqa wiñamullanqapuni.

¹⁰Runari, wañupun mana ujtawan rikhurimuyniyojta; runaqa wañuspa, maypitaj kashanri?

¹¹Mar qochapi yakusqa ch'akiykapuyta atin, mayuspis ch'akiykunku.

¹²Janaj pacha kanankama, runaqa mana jatarimonqachu maypichus p'ampakusqanmanta; puñusqanmanta mana rijch'arimonqachu.

¹³Allin kanman wañuypa kamachiynimpi pakaykunawayki, sinch'i phiñakuyniyki thasnukunankama; niwankimantaj mayk'ajchus ujtawan noqamanta yuyarikunawaykita.

¹⁴Sichus uj runa wañun chayqa, ujtawan kausanmanchu? Tukuy kausayniypi suyasaj, kay tukuy llakiyniymanta sonqo tiyakuy jamunawankama.

¹⁵Qan wajyawanki, noqataj uyarisqayki; munakuywan qhawawanki imaraykuchus ruwawajniy kanki.

¹⁶Kunan qanqa thaskisqasniyta qhawawanki, juchasniytataj reparachillawankipuni.

¹⁷Juchasniyta qonqayman churawaj pantasqasniymantataj llimphuchawankiman.

¹⁸Orqospis lluchhikuspa tukukunku; chhankaspis kuyuchisqas kanku.

¹⁹Yakoqa kallpawan rispa rumista tukuchin, ñut'u jallp'atapis apakapun; ajinata qanqa runaj suyayninta chinkachinki.

²⁰Qanqa payta wiñaypaj atipanki, jallp'amantataj wijch'unki, uyanta waj jinaman tukuchinki, kacharpayankitaj.

²¹Wawasnin pataman oqharisqas kajtinkupis, payqa mana yachallampischu. Llakiyman chayanku chaypis, payqa mana reparakunchu.

²²Imasninchus nanasqallanta reparakun, imaynatachus ñak'arisqantawan.