Read Quechua Bolivia DC Bible JOB 22 Bible Online

JOB 22 - Quechua Bolivia DC Bible bible

JOB 22

¹Temanmanta Elifaz kutichispa nerqa:

²Runaqa Diospaj allinchu kanman? Chayqa mana jinachu, yachayniyoj runaqa pay kikillampaj allin.

³Ima allintaj kasqanki cheqan kaspa Tukuy Atiyniyoj Diospajri? Chayri ima allintataj Pay orqhonqa qan cheqanta purisqaykimantari?

⁴Sichus Pay k'amisunki, cheqanchanampajtaj wajyasunki chayqa, mana qan sumajta kasuspa kamachisqasninta ruwasqaykiraykuchu.

⁵Manachayqa qampa sajra ruwasqasniyki ancha ashkha, qampa juchasniykeqa mana tukukuyniyoj kanku.

⁶Qanqa mana imallamanta wauqesniykimanta prendasta orqhoj kanki, p'achasninkuta lluch'oj kanki, q'alasllatataj saqej kanki.

⁷Pichus ch'akichikojmanqa mana yakuta jaywarejchu kanki; pichus yarqhachikojmanqa mana mikhunata qorejchu kanki.

⁸Qanqa ajina qhapaj kaspa, allimpaj qhawasqa kaspataj, qanqa creekoj kanki qanlla kay jallp'amanta dueño kasqaykita.

⁹Warmi sapasta mana imayojta kachapoj kanki; wajcha wawastapis maqaspa kachapoj kanki.

¹⁰Chayrayku kunanqa ima llakiypis muyuynillaykipiña kashan, chayrayku ima ratopis manchariylla qampajqa kashan.

¹¹Tukuy imapis laqhalla qampajqa, mana imatapis rikuyta atinkichu, uj correshaj ashkha yaku llump'iyamusunki.

¹²Diosqa janaj pachamanta aswan patapi kashan, aswan jatuchaj qoyllurkuna chakisnin urapi qhepakunku.

¹³Qanqa ninkichari: Imatataj Dios yachasqa? Imaynatataj laqhanejta qhawanqari?

¹⁴Imaynatataj ninki: Phuyus laqhaykunku, mana rikumunchu; janaj pachallapi purispa muyushasqantari?

¹⁵Qanqa chay ñaupa ñantachu riyta munallankipuni, mayqan ñantachus sajra runas purerqanku chayta?

¹⁶Chay sajra runasqa manaraj imapi wañorqanku, paykunaqa apasqas karqanku ashkha mayu yakuwan jina.

¹⁷Diosman nerqanku: Jatariy noqaykumanta, imatataj ruwasqa Tukuy Atiyniyoj noqaykupaj?, nispa.

¹⁸Chaypajri, Diosqa tukuy ima allinwan wasisninkuman junt'acherqa. Sajra runaspa yuyaychayninkoqa noqamanta karupi kachun!

¹⁹Cheqan kaj runasqa kayta rikunku, kusikunkutaj; mana juchayojkunaqa kay jinata asipayanku:

²⁰Contrariosninchejqa chinkachisqas kanku, tukuynin kapuyninkutaj q'olaykun.

²¹Ujtawan Dioswan allinyakuy, sonqo tiyasqataj kanki, chanta ujtawan tukuy imasniykipis kapullasonqataj.

²²Saqey pay imatapis kamachis unanta, chay palabrasintataj sumajta umaykipi jap'eqay.

²³Sichus ujtawan Tukuy Atiyniyojman kutirinki chayqa, wasiykipi imachus mana cheqan kajta ayqechinki.

²⁴Qoreqa tiyapusonqa jallp'amanta astawan, Ofirmanta mayu rumis jina.

²⁵Tukuy Atiyniyojqa qoriyki kanqa, may ashkha qolqeyki ima.

²⁶Tukuy Atiyniyojqa kusiyniyki kanqa, jinamanta mana p'enqakuspa Diosta qhawarinki.

²⁷Sichus Paymanta imata mañakunki chayqa, Pay uyarisonqa; qantaj imatachus Paypaj ruwasaj nisqaykita ruwanki.

²⁸Imatachus nisqaykipeqa allimpuni risonqa, ñanniykitataj k'anchay k'anchamonqa.

²⁹Diosqa may kasqanta yuyakoj runata ruaman churan, llamp'u sonqoyoj runatataj salvan.

³⁰Mana juchayojtaqa paymin salvan, qantapis salvasonqa sichus mana juchayoj kanki chayqa.