Read Quechua Bolivia DC Bible JOB 24 Bible Online

JOB 24 - Quechua Bolivia DC Bible bible

JOB 24

¹Tukuy Atiyniyojmanta tiempospis mana pakasqa kajtenqa, imaraykutaj payta rejsejkunaqa ima diaschus ruwanantaqa mana yachankuchuri?

²Sajra runasqa campospi mojonesninkuta pasaykunku, ovejasta suwanku ovejasninkuman yapaykunankupaj.

³Wajcha wawaspa burronkuta apakapunku, warmi sapaspa wakasninkuta prendata jina qhechunku.

⁴Wajcha runasta cheqan ñanmanta pantachinku, chaynejta llamp'u sonqo runasqa pakakunku.

⁵Wajcha runasqa monte burros jina, mikhunata ch'in pampaspi mask'amunku pakay pakayllamanta, wawasninkupajpis ch'in pampasmanta apamuspa mikhuchinku.

⁶Waj jallp'asmanta mikhunasta suwakamunku, manachayri sajra runaspa uvas chajrasninmanta chajmakamunku.

⁷Tutapis sut'iyakunku mana imawan qhataykukuyta atispa, ni imanku kanchu chirimanta jark'anampaj.

⁸Chay orqospi parawan joq'ochikunku, chay paramanta pakakunku chhanka uraspi.

⁹Wajcha warmispa wawasninkuta nacejtinkama qhechunku; wajcha runasmanta prendasta qhechunku.

¹⁰Wajchasta purichinku yaqha mana p'achayojta, trigota q'epichinku mana ima mikhusqasta.

¹¹Molinota muyuchinku aceiteta ch'irwanankupaj, uvasta sumajta sarunku vino orqhonankupaj, jinapis ch'akiywan wañushankuña.

¹²Llajtamanta waqamunku wañupushankuña chaykuna, nanasqataj may llakiyta waqashanku; Diostaj mañakusqankuta mana uyarinchu.

¹³Wakenqa k'anchayta chejninku, tukuy puriyninkupi chay k'anchaymanta t'aqakunku.

¹⁴Runa wañucheqa laqha laqhata wajchata wañuchimunampaj rin, ch'isiyaykojtintaj suwaspa purin.

¹⁵Qhenchachakoj runaqa laqhayaykunallanta suyan, uyanta sumajta pakaykukun, mana pipis rikunanta yuyaspa.

¹⁶Suwasqa ch'isillan wasismanta suwanku, p'unchayqa tukuyninku pakasqalla kanku, paykunaqa k'anchayta chejninku.

¹⁷Paykunapajqa k'anchay uj pawi laqhawan ninakun; tuta ima millaykunatachus ruwaykuna paykunapajqa sumaj.

¹⁸Chay sajra runastaqa yaku apan. Jallp'asninkoqa maldicisqas qhepakunku, niña pipis chay uvas chajrasninkupi llank'anchu.

¹⁹Mana paramojtin, ruphay rit'ita chhullurparin; ajinallatataj sepulturapis juchasapataqa chinkarpachin.

²⁰Chaykunamantaqa kikin mamanku qonqaponqa; qhurustaj may mik'ejta mikhonqanku; ni jayk'aj paykunamanta yuyarikonqankuchu. Chay sajra runaqa uj jatun sach'a jina urmanqa.

²¹Mana wawayoj warmista payqa manchayta llakichej, warmi sapastapis manapuni ima allintapis ruwajchu.

²²Diosqa atiyniyoj runasta manchay kallpanwan urmarparichin. Sichus Dios makinta oqharin chayqa, manaña pipis kausayta atinchu.

²³Diosqa saqen sumaj kusiypi kausajta, imaynatachus parisqantataj sumajta qhawan.

²⁴Uj rato sajra runaqa mayta oqharikun, chaymantataj usqhayllata chinkaripun. Payqa ch'akipun uj t'irasqa qhora jina, uj ch'akisqa espiga jina k'umuykun.

²⁵Sichus kay mana jina chayqa, pitaj niwanman noqa llullakusqayta, niwanmantaj noqa pantasqa kasqaytari?