Read Quechua Bolivia DC Bible JOB 28 Bible Online

JOB 28 - Quechua Bolivia DC Bible bible

JOB 28

¹Cheqamanta qolqeta qhoyamanta llojsin, qoripis uj cheqapi ch'uwachakun.

²Fierroqa jallp'amanta llojsin, cobreqa rumimanta ninapi unayachispa ruwakun.

³Runaqa laqhayajta tukuchin, jallp'a ukhuman yaykun, chay laqhayaypi rumista mask'an.

⁴Qhoyastaqa karuspi mana runa tiyanaspi kicharinku, ch'in cheqaspi maypichus mana pipis saruykunñachu chaypi. Wasqhaswan warqhuykukuspa, runasqa qhoyasta kicharinku.

⁵Jallp'a patapeqa trigo poqon, chay jallp'a urapitaj nina jina kashan.

⁶Chay cheqapeqa tarikun zafiro nisqa rumis, chay jallp'antaj qoriwan chajru.

⁷Chay ñantaqa ni ima p'isqo rikunchu, ni mamanis, nitaj suwintuspis.

⁸Ni ima sajra phiña animalpis chay ñanmanqa saruykunchu, nitaj leompis chayninta purinchu.

⁹Runaqa sinch'i rumiwan allan, orqostaqa saphinmanta urmachin.

¹⁰Chhanka ukhuspi jusk'usta kicharin, chaypitaj k'acha mineralesta tarin.

¹¹Maymantachus mayus llojsimunku chaykunata qhawamun, ima pakasqa kajtapis sut'inchampuni.

¹²Chanta, maymantataj yachay jamunri? Maypitaj kashan chay jina yuyayniyoj kanari?

¹³Chay jina valorniyoj yachay kasqanta, runaqa mana reparallampischu, nitaj kay mundopipis tarinchu.

¹⁴Musphay yana laqha ukhoqa nin: Mana kaypichu, nispa. Mar qochapis nillantaj: Mana noqapi kanchu, nispa.

¹⁵Mana rantikunmanchu qoriwan, nitaj qolqewampis rantikunmanchu.

¹⁶Sumajnin kaj qoriwampis yachayqa mana rantiyta atikunchu, nitaj ónice rumiwan, chayri zafiro rumiwampis.

¹⁷Chayqa qorimanta, cristalmantawan astawan valen, mana atikunchu trocanaqa ch'uya qori imaswampis.

¹⁸Yachayqa aswan valorniyoj coral rumimanta, k'acha walqasmantawan nisqaqa, chhankaspi cristales kan chaymantawan nisqaqa.

¹⁹Etiopiapi topaciowanqa mana kikinchakunchu, nitaj atikunchu aswan sumajnin kaj qoriwan rantina.

²⁰Maymantataj yachay jamunri? Maypitaj kashan chay jina yuyayniyoj kanari?

²¹Phiña sajra animalesmantaqa pakasqa kashan, jinallataj tukuy phawaykachajkunamantapis.

²²Infiernowan, wañuywanqa ninku: May mentasqa kaynillanta uyariyku.

²³Diosqa yachaypa ñanninta rejsin; Paylla yachan maypichus tarikunanta.

²⁴Payqa rikun kay jallp'aj tukukuynin kashan chaykama, imaschus janaj pacha urapi tiyan chaykunatawan.

²⁵Maypachachus Diosqa wayraman kallpata qorqa, yakustataj nerqa maykamachus kanankuta,

²⁶paramampis qorqa leyesta, qhon qhonmampis ñanninta rikucherqa,

²⁷chaypacha rikorqa yachayta, sumaj cheqan kasqanta, allinta qhawaspataj nin chayqa allimpuni kasqanta.

²⁸Diosqa runaman nerqa: Señorpa kamachisqallanta ruwanki. Chaymin yachayqa. Sajramanta t'aqakunki. Chaymin sumaj yuyayniyoj kayqa.