Read Quechua Bolivia DC Bible JOB 3 Bible Online

JOB 3 - Quechua Bolivia DC Bible bible

JOB 3

¹Chaymanta Jobqa parlayta qallarerqa nacesqan p'unchayta maldecispa.

²Jobtaj qhaparispa nerqa:

³Ima sajra ch'isichus karqa yumasqa kasqayqa! Ima sajra horachus karqa nacesqay p'unchayqa!

⁴Chay nacesqay p'unchayqa tutaman tukunan karqa, Diosqa chay p'unchayta mana rikumoj tukunan karqa, manataj sut'iyananchu karqa!

⁵Uj wañuy llanthu laqhayaykuchinan karqa! Uj yana phuyu laqhayaykuchinan karqa, chayri uj inti laqhayay manchay laqhaman tukuchinan karqa!

⁶Chay ch'iseqa laqhayaypi chinkanan karqa, chay p'unchayqa mana yupakunmanchu karqa, chay killaspi, chay wataspi ima!

⁷Chayqa phutiy ch'isi kanan karqa, chay ch'isipi mana ima kusiy takiypis kananchu karqa!

⁸Chay ch'isitaqa p'unchayta chejnejkuna maldicinanku karqa, ima atiyninkuwanchus Leviatanta wajyanku chaywan.

⁹Chay paqarimpi sut'iyay qoyllurkunaqa mana k'anchanankuchu karqa; chay jina suyasqa k'anchayqa mana chayamunanchu karqa; sut'iyarpamuyta yurajyaytapis mana rikunanchu karqa.

¹⁰Ima sajra tutachus karqa, ima wijsamantachus nacesharqani chayta mana wisq'aj ch'iseqa; ñawisniypa rikunanmanta llakiyta mana pakaykojqa.

¹¹Imaraykutaj mamaypa wijsampi mana wañorqanichuri, chayri naceytawampisri?

¹²Imaraykutaj arphisqa suyawarqankuri, ima nispataj chuchuspis noqapaj karqari?

¹³Chaypacha wañupuyman karqa chayqa, kunanqa sumajta puñurikushayman karqa, sumaj misk'i puñuywan samarikuspa,

¹⁴kay jallp'a patapi reyeswan, reyespa yanapajkunasninwan, pikunachus jatuchaj wasista raqayasmanta ruwakojkunawan,

¹⁵chayri pikunachus palaciosninkuman qorita, qolqetawan junt'achejkunawan.

¹⁶Imaraykutaj mana p'ampaykuwarqankuchu sullusqa wañusqa wawata jinari, wañusqa nacesqa wawasta jinari?

¹⁷P'ampasqamantaqa manaña imatapis ruwayta atinkuchu sajra runasqa, manaña kausayta atejkunapis wañuspaqa sumajta samarikunku.

¹⁸Chaypi presochasqa runasqa samarikunku, carcelta qhawajkunaj qhaparisqankutapis manaña uyarinkuchu.

¹⁹Jaqaypeqa jatumpis juch'uypis uj rejlla kanku, kamachipis chaypeqa patronnimpa kamachiyninmanta kacharisqa.

²⁰Imaraykutaj Diosqa saqellan k'anchayta rikojta ñak'arejtari? Imaraykutaj Diosqa kausayta qollan may jina llakiyniyojmanri?

²¹Imaraykutaj mana wañoyqa kanchu wañuyta munajpajri, sumaj pakasqa qolqeta jina wañuyta mask'ashajtimpisri?

²²Chay jina runaspa kusiynenqa chayamun, maypachachus sepulturaman yaykojtinku.

²³Imaraykutaj kausayqa qosqa mana yachanchu maymanchus rinanta chay runamanri, Diosllataj tukuy thaskinasninta wisq'aykojtinri?

²⁴Mikhunayqa jik'un jik'unta waqarikuylla, waqayniypis yaku jina corren.

²⁵Imatachus manchachikoj kani, imachus manchayta manchachiwaj, chayrajtaj patayman urmaykamun.

²⁶Ni jayk'aj sonqo kausayta karikunichu, nitaj samarikunichu, manachayqa mana imaynapi kayta atiylla jamuwan.