Read Quechua Bolivia DC Bible JOB 30 Bible Online

JOB 30 - Quechua Bolivia DC Bible bible

JOB 30

¹Kunanqa, noqamanta aswan wayna kajkuna asikuwanku, chaykunaj tatasninkuta noqaqa mana jap'iymanchu karqa, uywasniyta qhawaj alqoswan kanankupajpis.

²Paykunaqa kallpankuwan mana imatapis ruwapuwankumanchu karqa. Paykunaqa mana kallpayoj ch'uchali runas karqanku.

³Mana imankupis kasqanrayku, yarqhaywan sapanku purej kanku; paykunaqa ayqerqanku uj ch'innejman manchachinkuna jina cheqaman, uj manakaj ch'in t'ojra cheqamantaj.

⁴Khishka ukhusmanta qhorasta pallakoj kanku, retama sach'aj saphisnintataj mikhoj kanku.

⁵Paykunaqa tukuy runaspa chejnisqasnin karqanku; tukuy runastaj suwasta jina qhaparispa qhatiykachaj kanku.

⁶Chaynejta qaqa jusk'uspi tiyakoj kanku, wakintaj larqaspi, chhanka jusk'uspi ima.

⁷T'ankara uraspi alqo jina qhaparej kanku, khishka sach'as urapi tantakoj kanku.

⁸Mana imata yachaj runas, ni pejpa wawasnin, manataj chay jallp'api tiyakunankupaj jinachu kanku.

⁹Kunantaj paykunaqa alqochakuwanku, noqamanta chanzata parlarispa mayta asirikunku.

¹⁰Noqata millachikuwaspa karunchakunku, uyaypi ima thoqaykuwanku.

¹¹Kunanqa kay jina mana imayojta rikuspa, Dios llakiyta qowajtin, ni uj chhikanta kasuta ruwawankuchu.

¹²Qayllayman may chhika tantaykakamunku, tanqaspa urmachiyta munawanku, sinrullataj muyuykamuwanku, wañuchiytataj munawanku.

¹³Ñanniyta wisq'aykunku, kay jina llakiypi kajta rikuwaspa, ni pipis paykunataqa jap'iykoj kanchu.

¹⁴Uj jatun punku kicharisqata jina juyñamuwanku, tukuy kallpankuwan patayman wijch'uykakamunku llakisqa kashajtiy.

¹⁵Sinch'i manchachikuy noqaman jamuwan, allin kayneyqa wayra jina ripun, ima kajpis phuyu jinalla chinkaripun.

¹⁶Kunanqa, manaña kausanaypaj jinachu kani, ima p'unchayis llakiyllaña noqapajqa.

¹⁷Sapa ch'isi kay nanayqa tulluykama nanachiwan, mana samariyniyojtataj jap'iwan.

¹⁸Diosqa ujllata kunkaymanta jap'iwan, tukuy kallpanwantaj p'achaymanta thalanoqawan.

¹⁹T'uruman wijch'uykuwan, ñut'u jallp'apis, chayri qhelli ushphapis kayman jina.

²⁰Qanmanta, Diosníy, mañakuyki manataj uyariwankichu, qanman qayllamuyki nitaj uyarillawankipischu.

²¹Qanqa noqapaj may phiñasqa kanki. Makiykej atiyninwan qhatiykachawanki.

²²Qanqa qhawallawanki wayra apanawanta, sajra para wayra apaykachanawanta.

²³Noqa yachani qanqa wañuykama apanawaykita, tukuy kausajkuna wañuspa maymanchus rinanku kashan chayman.

²⁴Noqaqa manachu wajchata yanaparqani, manachu llakiyninmanta orqhorqani?

²⁵Manachu noqaqa pichus ñak'arejpaj waqaporqani, manachu pichus pisichikojtapis khuyarqani?

²⁶Allin kajta suyashajtiy, mana allin kajlla jamuwan, k'anchayta suyashajtiy, laqhayaylla chayamuwan.

²⁷Sonqoyqa phawashanña mana samarikusqayrayku; llakiy p'unchaykunalla jamuwan.

²⁸Mana intej yanayachisqallan yanayasqa purini, qhaparispataj tukuymanta yanapata mañakuni.

²⁹Atojkunaspa wauqenman tukuni, surispa wauqenman ima.

³⁰Ukhuypis yanaman tukun, tukuy ukhuy q'oñi onqoyman k'ajarishan.

³¹Arpaspa waqasqan, qenaspa waqasqan ima noqapajqa, llakiyta waqayman tukun.