Read Quechua Bolivia DC Bible JOB 32 Bible Online

JOB 32 - Quechua Bolivia DC Bible bible

JOB 32

¹Chay kinsa runasqa Jobwan manaña astawan ch'ajwarqankuchu, Job mana juchayoj kani nisqanta uyarispa.

²Chaymantaqa buzita Baraquelpa wawan Eliuñataj, Rampa mirayninmanta kaj runa, manaña astawan ch'in kayta atispa mayta phiñakorqa Jobpaj; Diospa ñaupaqempi mana juchayojchu kani nisqanmanta.

³Chantaqa phiñakullarqataj Jobpa kinsantin kausaqesnimpaj, Jobman mana allinta kutichiyta atisqankumanta; chaywampis Diostaqa mana allintachu rikhuricherqanku.

⁴Elioqa tukuyninkumanta aswan wayna runallaraj karqa, chayrayku payqa suyallarqa paykunaraj Jobwan parlayta tukunankuta.

⁵Paykuna mana imaynamantapis allinta kutichiyta atejtinkutaj, sinch'ita phiñarikorqa.

⁶Kay jinata parlayta qallarerqa buzita Baraquelpa wawan Elioqa: Noqaqa waynallaraj kani, qankunataj machu runasña kankichej, chayrayku noqaqa manchachikullarqani, manataj nerqaykichejchu imatachus niyta munasqaytaqa.

⁷Noqaqa nillarqani: Unay watasniyoj sut'inchallanqanku; ashkha watasniyoj yachayninkuta rikuchenqanku.

⁸Cheqamanta tukuy runas yachayniyoj kanku, chay unanchaytaqa Tukuy Atiyniyoj samaykuspa qorqa.

⁹Mana pitapis ashkha watasnenqa sumaj yachayniyojman tukuchinku, nitaj sunkhasniyoj kasqampis cheqan kajta yachachinchu.

¹⁰Chayrayku, kunanqa nini: Uyariwaychej, noqajtapis tiyapuwan imastachus ninaypaj.

¹¹Noqaqa suyarqani qankuna unanchakusqasniykichejta, uyariykichejtaj sumaj palabrasta mask'asqaykichejta.

¹²Noqaj qhawasqayman jinaqa, ni mayqenniykichej Jobta k'amiyta atinkichejchu, nitaj parlasqasninman kutichiyta atinkichejchu,

¹³Qankuna may yachayniyoj kasqaykichejta mana yuyakunaykichejpaj, Dioslla chaytaqa kutichiyta atin, mana runachu.

¹⁴Jobqa mana noqataqa ima niwampischu, nitaj noqapis paymanqa kutichiymanchu qankuna jinaqa.

¹⁵Job, kay kinsaqa umankuta muyuchikunku, mana yachankuchu imatachus kutichisunankuta.

¹⁶Noqaqa suyarqani paykuna parlanankuta, manataj parlankuchu, chayman kutichinankutaqa astawan ch'inyapunku, manaña astawan ni imata kutichisunkuchu.

¹⁷Chayrayku noqapis imatachus yuyasqayta kutichisaj, imatachus ninay tiyan chayta.

¹⁸Noqajtaqa ashkha palabras tiyapushawan imatachus ninaypajqa, manaña astawan ch'in kakuyta atinichu.

¹⁹Noqaj sonqoyqa mosoj qharaspi poqosqa vino jina phatashanña, mana mayman samaynin llojsejtin.

²⁰Kunanqa parlarisaj sonqoy tiyaykunampaj, simiyta kicharisaj, kutichisqaykitaj imachus kajta.

²¹Mana noqaqa wakillantachu sumajman orqhosaj, tukuyninkuta uj rejta qhawanay tiyan.

²²Cheqamanta noqaqa mana pitapis wayllukunichu, sichus jinata ruwayman chayqa, Ruwawajniy Dioschari jasut'iwanman.