Read Quechua Bolivia DC Bible JOB 37 Bible Online

JOB 37 - Quechua Bolivia DC Bible bible

JOB 37

¹Para wayrata rikuspa sonqoyqa may jinata kuyurin, ukhuymanta llojsinayaj jina.

²Uyariychej Dios chay jina sinch'ita parlamusqanta. Uyariychej qhon qhon siminmanta llojsimojta.

³Payqa lliuj lliujta tukuy janaj pachanejta kachaykun, jallp'a patatapis uj cantomanta uj cantokama.

⁴Chaywantaj manchayta sonachin, may jina jatunmanta parlamun; chay qhon qhonkuna uyarikunankamaqa, lliuj lliujkuna mana sayankuchu.

⁵Dios jatunmanta manchayta parlamojtenqa, sumaj imasta rikuchiwanchej; chaykunaqa manchay jatuchaj imas kanku, mana pipis unanchayta atinchu.

⁶Rit'itaqa kamachin jallp'aman urmamunanta, paratapis nin mayta jich'akamunanta.

⁷Chaykamataj runastaqa wasisninkupi kachin, ajinamanta yachanankupaj paymin chay imastaqa ruwasqanta.

⁸Phiña animalespis jusk'usninkuman ayqekunku, chaypi qhepakunku.

⁹Muyoj wayraqa uraymanta jamun, chiritaj patamanta jamun.

¹⁰Dios wayrachimojtin chhullunkaqa ruwakun, ashkha yakustataj tikayachin.

¹¹Phuyusman yakuta junt'achin, chay phuyusmantataj lliuj lliujkunata llojsichin.

¹²Lliuj lliujkunaqa patapi kayman jaqayman correykacharinku, kay jallp'a patapi Diospa kamachisqanta junt'aspa.

¹³Kaytaqa Dios apachimun jallp'ata jasut'inampaj, wakin kutispitaj apachimun munakuyninta rikuchinanrayku.

¹⁴Job, allinta uyariy kayta, sumajta unanchay Dios imastachus may t'ukunasta ruwasqanta.

¹⁵Qan yachankichu kay imasta imaynatachus Diosqa kamachisqanta, imaynatachus lliuj lliujkuna phuyupi k'ancharisqankuta?

¹⁶Qan yachankichu imaynatachus jaqay pata ch'usajpi phuyus aywiykachasqanta, chay jina yachayninta phuyusta purichispa rikuchisqanta?

¹⁷Imaraykutaj p'achaykeqa q'oñichisunkiri, uray wayrawan jallp'ata Dios samarichishajtinri?

¹⁸Janaj pachata ruwayta qanqa Diosta yanaparqankichu, metalmanta espejota jina sayachispa?

¹⁹Yachachiwayku ari imatachus Diosman ninaykuta; noqaykoqa laqhapi jina kashayku, manataj yachaykuchu imatachus ninaykuta.

²⁰Noqaqa mana nillaymampischu parlayta munasqayta; chaytaqa chinkachinawanta munaspa jinachari parlariyman.

²¹Kunanqa janaj pachapi intej k'anchaynenqa manaña rikukunchu, phuyus pakaykusqankurayku, chaywampis ujta wayra wayramun chayqa, phuyusta picharparin.

²²Patamanta qori jina ch'ipeqerimun, Dios manchay jatun atiyninta rikuchejtin.

²³Tukuy Atiyniyojmantaqa mana yachayta atisunmanchu; Payqa manchay atiyniyoj, cheqantaj; Payqa cheqanta imatapis ruwan mana pitapis sarullanchu.

²⁴Chayrayku runasqa paymanta manchachikunku; Paypajqa yachayniyojkuna mana imachu.