Read Quechua Bolivia DC Bible JOB 38 Bible Online

JOB 38 - Quechua Bolivia DC Bible bible

JOB 38

¹Chaymanta Señorqa Jobman parlamorqa manchay yanayarishaj para wayrapi, nerqataj:

²Pitaj qan kanki yuyaychasqasniymanta iskayrayanaykipajri, palabrasniykiwantaj mana yachasqaykita rikuchinaykipajri?

³Sumaj kallpayoj kasqaykita rikuchiway, kay tapuykunamantaj kutichiway:

⁴Kay jallp'ata sayachishajteyqa, maypitaj kasharqankiri? Niway, sichus qan cheqamanta kay imasta yachanki chayqa!

⁵Qan yachankichu pichus chay jallp'aj medidasninta churasqanta? Yachankichu pichus q'aytuwan jina midisqanta?

⁶Yachankichu ima patapichus sayashasqanta? Pitaj chay cimiento esquina jatun rumita churarqari,

⁷mayk'ajchus qoyllurkuna takishajtinku, janaj pacha wawasniy kusikushajtinku?

⁸Maypachachus mar qocha rikhurimushajtin, pitaj yakusninta jark'acherqa uj cheqallapi kanampaj?

⁹Noqa phuyuwan p'achallicherqani, janantasnintataj laqhayayta churarqani.

¹⁰Noqa nerqani mar qochaqa maykamachus kananta, noqa punkusninta wisq'arqani, llaverqanitaj.

¹¹Chaypi nerqani: Kaykamalla junt'anki, kaymanta astawanqa amaña pasankichu; kayllapi oqharikuspa jamusqaykeqa ch'allpakonqa.

¹²Mayk'ajllapis kausayniykipi kay jinata kamacherqankichu, sut'iyay yurajyamunanta, sut'iyamunantataj?

¹³K'anchaypis jallp'aman k'anchamunanta, sajra runastaj chaymanta pakakamunakuta?

¹⁴Chaymantataj jallp'aj puntasnin rikhurimun, uj p'acha jinataj tukuy colorwan jina teñikun.

¹⁵Sajra runaspa k'anchayninkoqa qhechukapun, may jinata oqharikushaj makipis p'akikun.

¹⁶Mar qochaj ukhunman, maykunamantachus yaku ch'illchimushan chayman chayarqankichu? Chay laqhayasqa ukhunta qhawarispa purerqankichu?

¹⁷Qan rikunkichu wañuypa punkunta, wañuy llanthoj punkusninta rikunkichu?

¹⁸Qanqa yachankichu may chhikanchus kay mundo kasqanta? Niway ari, sichus qan cheqamanta yachanki chayqa!

¹⁹Maynintaj rin k'anchaypa wasinmanri? Maynejpitaj laqhayaypis tiyakunri?

²⁰Chaykunata k'uchunkama apanaykipaj, maynintatajchus ñan wasinman rishan chayta rejsinkichu?

²¹Qanqa yachanaykiña ari, kay chhika watasniyojña kankipisqa; chay imas ruwakunampajqa ñachá nacerqankiña ari!

²²Qanqa rikunkichu maypichus jallch'ani rit'ita, granizota ima,

²³mayk'aj llakiy kajtin, maqanakojtinku, chanta ch'ajwa kajtin apachimunaypaj?

²⁴Ima ñankunatataj k'anchaykunaqa rin k'anchamuspari? Ima ñankunatataj inti llojsimuynejmanta wayraqa rinri?

²⁵Pitaj paraman ñanta rikuchinri? Pitaj qhon qhonkunaman, lliuj lliujkunamanwan ñanta rikuchinri?

²⁶Jinamanta ch'in pampapi paranampaj, maykunapichus mana pipis tiyakunchu chaypiri,

²⁷chay jina wijch'usqa ch'aki jallp'asta qarpanampaj, qhorastapis chaykunamanta llojsichimunampaj?

²⁸Pitaj parajtawan, chhullajtawan tatanri?

²⁹Pitaj chhullunkajtawan escarchajtawan mamankuri?

³⁰Yakutaqa chhullunkiyan rumiyachinankama, mar qochatapis patanta tikayarpachin.

³¹Cabrillasta qanqa watayta atiwajchu, chayri Orión ch'askaj watanasninta phaskayta atiwajchu?

³²Qanqa maychus llojsimunan horata sut'iyay ch'askata orqhomuwajchu? Jatun kaj Osa, juch'uy kaj Osa nisqa ch'asqasta ñaupajman pusayta atiwajchu?

³³Janaj pachajpa leyesninta rejsinkichu? Kunanqa qanchu chay leykunaman jina kay jallp'a patapi kamachishanki?

³⁴Phuyusta kamachiyta atiwajchu, pataykiman paramunampaj?

³⁵Sichus lliuj lliujta waj cheqaman kachanki chayqa, kutichisunkichu: Kaypi kashani, nillaway imatachus munasqaykita, nispa?

³⁶Pitaj yachayta qorqari ibis nisqa piliman, chayri galloman ima?

³⁷Pitaj chay jina yachayniyoj kanman mashkhachus phuyus kasqanta yachanampaj? Pitaj paramunampaj chay phuyumanta yakuta jich'amuyta atinmanri?;

³⁸maypachachus ñut'u jallp'apis k'urpasman tukun, k'urpaspis paykunapura jap'inaykukunku chaypacha.

³⁹Qanchu leonaspajqa aychata mask'apunki; uñasninku sajsakunankukama mikhunankupaj?

⁴⁰Chaytaqa jusk'usninkupi pakakushajtinkuchu ruwanki, chayri khishkas ukhumanta wateqashajtinkuchu ruwanki?

⁴¹Pitaj q'arqañasman mikhuchin, irpasninku mikhunata mask'ashajtinku, chay jinata qhaparispa mañakushawajtinku?