Read Quechua Bolivia DC Bible JOB 40 Bible Online

JOB 40 - Quechua Bolivia DC Bible bible

JOB 40

¹Señorqa Jobman ujtawan nerqa:

²Qanqa, Tukuy Atiyniyojwan tinkuyta munanki, chantapis kutichikuytarajchu munanki?

³Chaymanta Jobqa Señorman kuticherqa:

⁴Noqa kay chhika millayqa, imatataj qanman kutichiykimanri? Chaynejta noqaqa ch'inlla kakuni, simiyman makiyta churaykukuspa.

⁵Noqaqa ashkhataña parlani, manaña imatapis niyta atinichu.

⁶Señorqa ujtawan Jobman sinch'i wayra chaupimanta parlamorqa:

⁷Kunanqa may wapu kasqaykita rikuchiway, kay tapuykunasniymantaj kutichiway:

⁸Cheqamantaqa qanqa noqaj nisqayta mana valechinkichu; jinamanta qanqa mana juchayoj rikhurinaykipaj, noqata juchachanayawanki.

⁹Qanqa noqa jina atiyniyojchu kanki? Qampa qhon qhon parlayniyki noqaj qhon qhon parlayniy jinachu?

¹⁰Jina kajtenqa jatun kaywan, sumajpaj qhawasqa kaywan ima p'achallikuy. Jatunchasqa kaywan, k'achapaj qhawasqa kaywan ima khatakuy.

¹¹Qhawariy tukuy jatunchakojkunata, phiñakuyniki munasqanman jina qhawaspa k'umuykuchiy.

¹²Jatunchakojkunata qhawaspa k'umuykuchiy, sajra runasta mayllapipis saruy.

¹³Tukuyninkuta jallp'aman p'ampaykuy, wañusqaspa carcelninman wisq'aykuy.

¹⁴Chantaraj noqa kikiy sut'inchasqayki, qampa atiyniykeqa enemigosniykita atipachisusqanta.

¹⁵Allinta reparay chay chhika Behemotta, chaytaqa qanta jina ruwarqani, pastota mikhun waka jina.

¹⁶Qhaway wasampi may jina kallpayoj, wijsa ankusnimpis may jina thukis.

¹⁷Chupantaqa khiwirin may jina chuki cedropis kanman jina, chaki ankusnimpis may jinata k'akaririn.

¹⁸Tullusnimpis bronce tubospis kanman jina, fierro varillaspis kanman jinataj.

¹⁹Chayqa tukuy ima ruwanaypa qallariyniy, chaytaqa noqalla imaynachus ruwaj jina atipayta atini.

²⁰Maypichus sajra animales phujllanku chay orqosmanta, pastosta apamunku mikhunampaj.

²¹Llanthullapi winkumun, joq'o cheqaspi cañas ukhupi pakakun.

²²Thansa sach'asqa llanthunkuwan pakaykunku, mayuspi saucestaj muyuykunku.

²³Yaku ashkha chayamojtimpis mana mancharikunchu; tukuynin yaku senqanmanña chayashajtimpis manapuni mancharikunchu.

²⁴Pitaj jap'iyta atinman, ñawintataj orqhonman, chayri senqanmanta lazowan watuchayta atinmanri?