Read Quechua Bolivia DC Bible JOB 41 Bible Online

JOB 41 - Quechua Bolivia DC Bible bible

JOB 41

¹Leviatanta anzuelowan orqhomuyta atiwajchu, chayri q'aytuwan qallunmanta watayta atiwajchu?

²Senqanmanta wasqhawan watuchayta atiwajchu, chayri uj ganchowanchu k'akinmanta watuchawaj?

³Payqa nisunkimanchu paymanta khuyakunaykita, k'acha palabraswantaj imatapis allinta nisunanta?

⁴Qanqa imatapis qosunanta nichiwajchu, qampa kamachiyniykipitaj tukuy tiempo kananta?

⁵Paywanqa uj p'isqetuwan jinachu phujllawaj? Warmi wawasniyki phujllanampaj phujllanata jinachu watawaj?

⁶Paywanqa challwiris qolqechakunkumanchu? Vendenankupajqa chhikan chhikantachu khuchurankuman?

⁷Qarantaqa flechaspa jusk'uwajchu, chayri arponwanchu umanta jusk'uwaj?

⁸Makiykita patanman churay, chay jinata paywan maqanakusqaykitaqa mana qonqawajchu, nitaj ujtawan maqanakuwajñachu.

⁹Leviatantaqa qhawarispallaraj, pipis manchachikuywan wañunayanman.

¹⁰Sichus pillapis rijch'arichejtenqa, sinch'ita phiñarikun, nitaj pipis qayllayta atinchu.

¹¹Pitaj chimpanman, chantaqa mana imanasqa allintaj llojsinmanri? Kay mundontimpi ni pipis kanchu!

¹²Chakisninmanta willaytaqa mana qonqasajchu, chay mana tukukoj kallpanmantawan.

¹³Pitaj ukhunmanta qaranta ch'uskiyta atinmanri, pitaj chay jina phatu qaranta pasachiyta atinmanri?

¹⁴Pitaj siminta khichariyta atinmanri, chay jina manchachikuna jina kirusniyojtari?

¹⁵Wasanmanta qarasnenqa manchay sinch'i escudos jina, wisq'asqas, rumi jina manchay sinch'is.

¹⁶Qarasnenqa sumaj jap'inasqas, chaynintaqa ni wayrapis pasanchu.

¹⁷Chaykunaqa sumaj jap'inasqas kanku, ni pipis t'aqayta atinmanchu.

¹⁸Achiynenqa lliuj lliuj jina. Ñawisnenqa inti sut'iyarpamushan jina k'anchanku.

¹⁹Siminmanta nina qallus llojsinku; chaymantataj nina chispas t'akakunku.

²⁰Senqasninmanta q'osñi llojsimun, manka t'impushajtin wausiy llojsin jinata.

²¹Samayninmanta carbonesman nina jap'ikun, siminmantataj nina larway llojsin.

²²Kunkanqa manchay thuki, chaypa ñaupaqempeqa tukuy kaj kharkatitinku.

²³Cuerpompi maynejkunapichus aychan kashan chaykunapis, manchay chojru, fierro jina mana imapis yaykunampaj jinachu.

²⁴Sonqonqa uj rumi jina, ura kaj molino rumi jina.

²⁵Pay sayarejtinkama atiyniyojkunaqa manchariywan ayqenku, mayta kharkatitispa.

²⁶Paywan maqanakunapajqa ni ima allinchu, ni espada, ni lanza, ni flecha, ni dardopis.

²⁷Paypajqa, fierropis ichhupis kanman jinalla, broncepis mullpha k'ullu jinalla.

²⁸Flechasqa mana ayqechinchu; rumiswan warak'ayqa ichhuwampis ch'anqashasunman jinalla.

²⁹Tukuy armasqa ch'aki laqhespis kanman jinalla paypajqa, jabalinaspa khuyusqanta uyarispaqa mayta asikun.

³⁰Pampata qhatatikuspaqa surk'asta kicharin, urasnimpipis ganchosnin kanman jina.

³¹Mar qochataqa manchayta phullmuchimun mankapis t'impushanman jinata; uj jawinayoj mankata jina tukuchin.

³²Mar qochapi rishaspataj qhepaman saqen, yuraj lliphipirishajta uj phajcha yaku jinata.

³³Kay jallp'aspeqa mana imapis kanchu chayman rijch'akojqa; chay animalqa ni jayk'aj manachachikunampaj jinachu ruwasqa karqa.

³⁴Aswan jatuchajkunatapis mana kasuta ruwanchu, payqa tukuy phiña animalespa reynin.