Read Quechua Bolivia DC Bible JOB 42 Bible Online

JOB 42 - Quechua Bolivia DC Bible bible

JOB 42

¹Jobqa Señorman kutichillarqataj:

²Noqa yachini qanqa tukuy imata ruwayta atisqaykita, qampajqa mana imapis kanchu mana atikojqa.

³Pitaj noqa kasqani qampa atiyniykimanta iskayrayanaypajri, jinamanta mana yachasqayta rikuchispari? Noqaqa parlasharqani imastachus mana yachasqayta, chay jina t'ukuna imasta mana yachayta atisqayta.

⁴Qan niwarqanki: Uyariway, qanwan parlayta munani; kutichiwaytaj kay tapususqasniyman, nispa.

⁵Kunankama, uyarispalla qantaqa rejserqayki, kunanqa kikin ñawisniywan rikuyki.

⁶Chayrayku kunanqa noqa kikiyta chejnikuni, qanmantaj kutirimuyki kay qhelli jallp'api, ushpha patapitaj.

⁷Señorqa kay imasta Jobman parlaytawan, Elifazmanñataj nerqa: Noqaqa qampaj phiñasqa kashani, jinallataj chay iskay kausaqesniykipajpis, imaraykuchus qankunaqa noqamanta mana cheqantachu parlankichej, imaynatachus kamachiy Job ruwan jinataqa.

⁸Kunanqa qanchis torosta, qanchis carnerostawan qhatirikuspa kamachiy Jobman riychej; chaypitaj q'olachispa jaywamuychej chay jinata parlasqaykichejmanta. Kamachiy Jobqa chaypi qankunapaj Señormanta mañapusonqachej, noqataj chay mañapusqasuykichejta uyarisaj, jinamanta mana jasut'isqaykichejchu; chaywampis qankunaqa jasut'isqapuni kanaykichej karqa, imaynatachus noqamanta mana cheqantachu parlasqaykichejrayku, imaynatachus kamachiy Job ruwarqa jinataqa.

⁹Elifazwan, Bildadwan, Zofarwanqa Señorpa nisqanman jina kikinta ruwarqanku, Señortaj Jobpa mañakusqanta uyarerqa.

¹⁰Job ajinata Señormanta kausaqesnimpaj mañapusqanmanta, Diosqa Jobman kutichiporqa ñaupaj kapusqanmanta iskay jinatawan.

¹¹Chaymantataj jamorqanku watukoj tukuy wauqesnin, panasnin kausaqesnin, ñaupajta tukuy kausaqesnin kajkunapiwan. Chay watukoj jamuspataj mayta kusikorqanku, jatuchaj mikhuykunata wayk'uspataj wasimpi mikhorqanku. Chaypi paykunaqa mayta llakiporqanku, sonqocharqankutaj, tukuy imasta Señorqa ñak'arichisqanmanta; jinaytawantaj paykuna sapa ujninku qolqesta qorqanku, uj qori sortijatawan.

¹²Diosqa may sumajta Jobta bendicerqa chay wataspi, ñaupaj watasmanta nisqaqa. Chaypacha Jobpataqa tiyaporqa chunka tawayoj waranqa ovejas, sojta waranqa camellos, waranqa yunta bueyes, waranqa china burros ima.

¹³Chaymantaqa tiyapullarqataj qanchis qhari wawasnin, kinsa warmi wawasnin ima.

¹⁴Kuraj kaj warmi wawampata sutin karqa Jemima, chaupi kajpata Cesia, kinsa kajpatataj Keren-hapuc. Tukuy mundontimpi manapuni Jobpa ususisnin jina k'achitas karqankuchu. Jobqa chay warmi wawasninwan, qhari wawasninwan kuska tukuy kapuyninta chayaqesninkupaj qoporqa.

¹⁶Chaymanta qhepaman pachaj tawa chunkayoj watastaraj kausarqa, jinamanta payqa rejserqaraj wawasninta, allchhisninta, allchhisnimpa wawasninta, allchhisnimpa allchhisnintawanraj.

¹⁷Jinamanta Jobqa allin machuña, ashkha watasniyojtaj wañuporqa.