Read Quechua Bolivia DC Bible JOB 5 Bible Online

JOB 5 - Quechua Bolivia DC Bible bible

JOB 5

¹Kunanqa Job qhaparikuy, pichus uyarimusonqari? Mayqen angelmantaj qayllankiri?

²Cheqamanta wampusta sinch'i phiñakoyqa wañuchin, pichus payllapaj imatapis munajtaqa chhoqonakuy wañuchin.

³Wamputa rikuni sumajta saphinchakushajta, wasintataj maldicini kay jinata:

⁴Wawasnintaqa ama pipis khuyachunchu, juezkuna qhasi mana kajmanta juchachachunku, nitaj pipis kachunchu paykunamanta jark'akojqa.

⁵Poqochisqasninkuta tukuy yarqhasqas mikhuranqanku, khishkaswan circusqa ukhusmanta orqhospa, tukuy ch'akichikojkuna kapuyninkuta jap'ikapuchunku.

⁶Llakiykunaqa mana jallp'amantachu p'utumun, nitaj mana allin kaypis pampamantachu llojsimun.

⁷Imaynatachus nina chispa pataman rinankupaj phinkinku, ajinallataj runaqa llakiypaj nacen.

⁸Qan kaspaqa, Diosman kutiripuyman, Paypa makisninman tukuy llakiyniyta churayman.

⁹Payqa ashkha imasta, musphay t'ukunastawan ruwan, chaykunatataj mana pipis unanchayta atinmanchu!

¹⁰Payqa parata kay jallp'a pataman parachimun; chay yakuwan tukuy camposta qarpan.

¹¹Pay llamp'u sonqoyojkunata pataman oqharin, tukuy llakisqasta sumajmin churan.

¹²Sajra yuyayniyojkunaj yuyasqankuta mana kajman tukuchin, ama chay makisninku ima sajrata ruwanampaj.

¹³Pay ch'ipaykun sajra yuyayniyojkunata sajra yuyaynillankuwantaj, sajrata ruwanankupaj wakichisqankuta manakajman tukuchin.

¹⁴P'unchay kashajtin laqhayaywan tinkukunku, chaupi p'unchaypi thamaykachanku tutapis kanman jina.

¹⁵Ajinata Diosqa wajcha runata ayqechin espadaj puntanmanta, juchasapaj siminmanta orqhospa, jap'iykuspa q'allpiykoj rishajtinku.

¹⁶Paymin pisi kallpayojkunaj suyaynenqa, Pay sajra runaspa siminta lluphan.

¹⁷Pi runatachus Dios jasut'in, chay runaqa kusisqamin; chayrayku qanqa ama qhesachaychu Tukuy Atiniyojpa jasut'isqantaqa.

¹⁸Sichus pay nanaykuchin chayqa, payllataj thañichenqa. Sichus pay maqaykun chayqa, payllataj jampiykaponqa.

¹⁹Sojta kutita ñak'ariymanta orqhosonqa, qanchis kajpitaj sajraqa mana chayamullasonqapischu.

²⁰Yarqhaywan k'atiy kashajtiyki wañuymanta jark'asonqa, ch'ajwapi kashajtiyki espadamanta ayqechisonqa.

²¹Runaj sajra siminmanta pakaykusonqa; manchay urmaj jamushajtin qanqa mana manchachikunkichu.

²²Yarqhaypi urmaypipis asirikunki, k'ita sajra animalesmantapis mana manchachikunkichu.

²³Rumis ukhupipis chajrasniykeqa poqollanqankupuni, chaykunawampis tratoyoj kawaj jina, phiña animales kausaqesniyki kanqanku.

²⁴Wasiykipeqa kusiylla kanqa, wasiykita qhawakunki nitaj imapis pisipusonqachu.

²⁵Mirayniykeqa ashkhapuni kanqa, campospi pastos jina.

²⁶Sumaj kallpayojpacha sepulturaman chayanki, sumajta q'elluyarishaj marq'ay trigo jina.

²⁷Imatachus ruwasqallanchejtaj yachachiwanchej chayqa jinapuni kasqanta; kayta uyariy, qan kikiyki yachay imaynachus kasqanta.