Read Quechua Bolivia DC Bible JOB 7 Bible Online

JOB 7 - Quechua Bolivia DC Bible bible

JOB 7

¹Uj runaj kausaynin kay jallp'a patapeqa, uj soldadoj kausaynin jina.

²Uj wata runaqa llanthumanta khaykakun, uj llank'aj runaqa pagonta jap'iyta mayta suyan.

³Ajinata killan killantinta ñak'arinay chayamuwan, sapa ch'isi nanaywan ñak'arinay.

⁴Noqaqa puñuykuni, tutataj mana sut'iyáy atej, ujnejmantaj ujnejmantaj wijch'uykachakuni sut'iyanankama, ninitaj: Mayk'ajtaj jatarisajri?

⁵Ukhoyqa khuru puru, sarna kharkapacha, aychayqa t'oqo t'oqolla, q'eya puru millaytaj.

⁶Diasneyqa telarpi lanzaderamantapis astawan phinkishan, mana suyayniyojta tukukapun.

⁷Yuyarikuy ari, Diosníy, kausayneyqa samaylla kasqanta, ñawisneyqa manaña jayk'ajpis kusiyta rikunmanchu.

⁸Pikunachus kunan rikushawanku chaykunaqa manaña jayk'ajpis rikuwanqankuchu; qan qhawariwajtiykikama manaña kausasajchu.

⁹Imaynatachus phuyoqa rikhurimun, chinkapullantaj, ajinata pichus p'ampakojqa, mana jayk'ajpis rikhurimunchu.

¹⁰Manaña wasinman kutimunchu, wasinmanta kajkunaqa manaña rikonqankuchu.

¹¹Chayrayku simiytaqa khicharinaypuni tiyan, kay ñak'ariyniypi parlarinaypuni tiyan, kay jina llakiyniypi atisqayta parlarisajpuni.

¹²Noqaqa mar qochachu kani, marpi manachachikuna jina jatun animalchu kani, qhawajkunawan qhawachinawaykipaj?

¹³Noqaqa yuyayniypi nini, puñunaypi samarikusaj, puñoyqa chay jina llakiyniyta thasnonqa.

¹⁴Puñuyniypi manchachikuywan junt'achiwanki; misk'i puñuyniypi chay jina millay mosqoykunawan rijch'arichiwanki!

¹⁵Allin kanman kunkaymanta q'allpinawayki; wañupuyllataña munani kay ñak'arinaymanta nisqaqa.

¹⁶Manaña astawan kayta munanichu. Mana wiñaypajchu kausasaj. Saqellawayña, kausayneyqa samay jinalla.

¹⁷Imataj qampaj runari payta pataman oqharinaykipajri, paymanta chay jinatapuni yuyarikunaykipajri?

¹⁸Ima nispataj sapa paqarin watukunkiri, sapa kutitaj imaynachus kasqanta yachanaykipajri?

¹⁹Mayk'ajkamataj chay ñawisniyki qhawallawanqapuniri, manataj kachariwankichu thoqaynillaytapis oqoykojtari?

²⁰Sichus juchallikuni chayqa, runaspa qhawajnin, ima sajratataj qanta ruwaykiri? Imaraykutaj maymanchus flechanaykimanta churakuwankiri? Imapitaj qanta phiñachiykiri?

²¹Manachu juchaytaqa pampachapuwayta atinki? Manachu ima sajratachus ruwasqaytaqa pampachayta atinki? Noqaqa ñapis jallp'apiña wijch'ukusaj; tutamanta mask'awanki, noqataj chaypajqa manaña kasajchu.