Read Quechua Bolivia DC Bible SALMO 10 Bible Online

SALMO 10 - Quechua Bolivia DC Bible bible

SALMO 10

¹Señor, imaraykutaj karullapi qhepakunki? Imaraykutaj llakiy chayamojtin pakaykukunkiri?

²Sajra runaqa, phiñakuspa wapu wapu kayninwan, wajcha runata llakichin. Pay kikin tojlla churasqampi ch'ipaykuchikonqa.

³Sajra runaqa imaynatachus munasqanmanta alabakun. Munapayajqa maldicin, Señortaj qhesachan.

⁴Payqa wapu wapulla senqanta q'entin: Diosqa mana kanchu. Mana kanchu noqata tapuwajqa, nispa. Chayllata payqa yuyan.

⁵Imallatapis ruwajtin walejllapuni llojsin, paypajqa justiciayki manapis kanmanchu jina. Ñawisninmanta ancha karupi. Payqa tukuy enemigosninmanta alqochakun.

⁶Payqa yuyan ni pipis urmachinanta, ni jayk'aj ima misk'anapis paypaj kananta.

⁷Simimpeqa maldiciones junt'a kashan, llullakusqasninwan, ch'aukiyasqasninwan. Palabrasintaj sajra kajkunawan tumpaykunawan ima junt'a kashan.

⁸Ranchosta puriykachan wateqaspa, pakaymantataj mana juchayojta wañuchin. Mana atejtaqa wateqallampuni.

⁹Pakasqamanta wajchata jina, leompis jusk'unmanta wateqanman jina, rikhurimojtin patanman urmaykunampaj. Jap'ispataj ch'ipampi qhatamun.

¹⁰K'umuykuspa lip'iykun. sillusninmantaj mana jark'akuyta atejkuna urmanku.

¹¹Sajra runaqa yuyan Dios qonqapusqanta, uyanta pakaykukusqanta, ni jayk'aj imatapis rikusqanta.

¹²Sayarikuy Señor. Makiykita oqhariy. Ama wajchasmanta qonqapuychu.

¹³Imaraykutaj, Señor Diosníy, sajra runas alqochakonqankuri?; mana cuentata mañanaykita yuyaspari?

¹⁴Qan kikiyki rikunki may jatun sajra kayninkuta. Sajra kayninkutaqa rikunki. Chayrayku ruwasqankuman jina pagota qopunki. Qanmanqa mana piniyojkuna chayamusunku, qan wajcha runasta yanapanki.

¹⁵Sajra runaj makisninta p'akiray, juchankumantataj cuentata mañay, tukuy ima jucha chinkanankama.

¹⁶Señorqa wiñaypaj rey. Diospi mana creejkunaqa llajtankumanta wijch'usqas kanqanku.

¹⁷Señor, qan jap'inki llamp'u sonqo runaspa mañakusqankuta. Qan paykunata kallpachanki uyarinkitaj.

¹⁸Cheqan kayta ruway ari wajcha wawapaj, sarusqa runapajpis. Jallp'amanta ruwasqa runaqa, amaña watejmanta manchachichunchu!