Read Quechua Bolivia DC Bible SALMO 105 Bible Online

SALMO 105 - Quechua Bolivia DC Bible bible

SALMO 105

¹Señorman graciasta qoychej, sutintataj oqhariychej. Tukuy runasmantaj ruwasqasninta willaychej.

²Payta yupaychaspa takiychej, tukuy ruwasqasninmantataj parlaychej.

³Santo sutinrayku jatunchaychej. Señorta mask'ajkunaj sonqonku kusikuchun.

⁴Señorman riychej, atiyninman atienekuychej, paytataj tukuy tiempo mask'aychej.

⁵Tukuy ruwasqasninmanta yuyarikuychej, tukuy kamachisqasninta rimarisqanmantapis.

⁶Qankuna, Abrahampa miraynin. Qankuna, ajllasqas Jacobpa miraynin kajkuna.

⁷Paymin Señor Diosninchejqa, pay kamachin tukuy kay pachata.

⁸Waranqa waranqa runa mitapis pasachun, ruwasqantaqa mana jayk'aj qonqanqachu:

⁹Abrahamwan trato ruwasqanta, Isaacman jurasqanta.

¹⁰Kamachiyta jina Jacobman qorqa, Israelman wiñaypaj trato kanampaj.

¹¹Chaypacha Señorqa nerqa: Canaán jallp'ata qosqayki, chayaqeyki jina kanampaj.

¹²Paykunaqa pisilla karqankupis, ñan purejkuna jina pisilla.

¹³Paykunaqa nacionmanta nación purej kanku, llajtamanta llajtataj.

¹⁴Diosqa nin mana pipis paykunata llakichinankuta, paykunaraykutaj reyesta nerqa:

¹⁵Ajllakusqasniytaqa amapuni llankhaychejchu, amataj profetasniytapis imanankichejchu, nispa.

¹⁶Chay jallp'amantaj yarqhayta chayachimorqa, tukuy mikhunatataj qhechorqa.

¹⁷Paykunamanta ñaupajtaña Joseta kacharqa. Payta venderqanku kamachita jina.

¹⁸Chakisninta cadenaswan wataykorqanku, carcelmantaj wisq'aykorqanku,

¹⁹Joséj nisqan junt'akunankama, Señortaj nisqanta Josewan junt'acherqa.

²⁰Egipto rey kamacherqa Joseta kacharipunankuta; ashkha runasta kamachejta kachariporqa.

²¹Wasimpi mayordomomanta churarqa, tukuy kapuyninmanta dueñota jina,

²²kamachejkunatawan munasqanman jina yachachinampaj; kurajkunata yachayniyoj runasman tukuchinampaj.

²³Chanta Israelqa Egiptoman yaykorqa. Paymin Jacob. Karu llajtayoj jina Jacobqa Egiptopi tiyakorqa, Campa jallp'ampi.

²⁴Diosninchejqa ayllunta ashkhata miracherqa, egipciosmanta aswan kallpayojta.

²⁵Diosninchejqa egipciospa sonqonta uj jinayacherqa, ayllunta chejninankupaj, Diospa runasnimpaj contranta sajrata yuyanankupaj.

²⁶Chaypachataj Diosninchej kamachin Moisesta kacharqa, Aarontawan, pitachus pay ajllakorqa.

²⁷Paykunanejta Diosqa señalesninta rikucherqa, may sumaj ruwaykunata Campa jallp'ampi.

²⁸Diosqa tukuy chay jallp'ata laqhayaykucherqa. Egipciostaj Diospa parlasqanta mana kasorqankuchu.

²⁹Mayusninkoj yakusninta yawarman tukucherqa, challwasninkutataj wañucherqa.

³⁰Nacionninkuman, reyesnimpa puñunasninman ima jamp'atusta junt'aykucherqa.

³¹Diosninchej parlarqa ch'uspistaj junt'aykorqa, phuyu jina rikhurerqanku; junt'aykorqankutaj egipciospa jallp'ankuman.

³²Parachimunantaqa granizota parachimun, lliuj lliujkuna ima tukuy jallp'ankupi karqa.

³³Chaykuna uvas sach'asta, higos sach'astawan, Egipto tukuy sach'astapis choqarqa.

³⁴Dios parlarqa, langostastaj rikhurerqanku; chay chhika mana yupay atinapuni karqanku.

³⁵Tukuy q'omer qhorasta mikhukaporqanku, jallp'asninkupi tukuy chajrasninkutapis.

³⁶Diosqa Egiptopi phiwi wawasninkuta, jinallataj uywasninkumantapis wañuracherqa.

³⁷Chaymantataj Diosqa runasninta orqhorqa qoriyojta, qolqeyojta. Nitaj mayqempis ayllusninkumanta misk'arqankuchu.

³⁸Egipciosqa kusikorqanku israelitas ripusqankuta rikuspa, imaraykuchus mancharisqas karqanku.

³⁹Diosninchejqa paykunata llanthuykunampaj phuyuchimorqa, ch'isintaj paykunata ninawan k'anchacherqa.

⁴⁰Mikhunata mañakojtinku Diosqa p'isaqasta paykunaman apachimorqa; cielomanta t'antatawan sajsacherqa.

⁴¹Chhankata phatachejtin, yaku phullchimorqa, ch'aki pampatataj mayu jina yakoqa purirerqa.

⁴²Diosqa yuyarikorqa kamachin Abrahamman ruwasaj nisqanta.

⁴³Jinata Diosqa ajllasqa runasninta orqhorqa, may kusikuy chaupipi.

⁴⁴Chay nacionespa jallp'asninkutataj paykunaman qorqa. Chay runaspa ruwasqasninkuta jap'ikaporqanku.

⁴⁵Señorpa nisqasninta waqaychanankupaj, kamachisqasnintataj junt'anankupaj. Yupaychasqa kachun Señorqa.