Read Quechua Bolivia DC Bible SALMO 106 Bible Online

SALMO 106 - Quechua Bolivia DC Bible bible

SALMO 106

¹Señorqa yupaychasqa kachun! Agradecekuychej, Señorta yupaychaychej, imaraykuchus payqa k'achamin, khuyakuynimpis wiñaypajpuni.

²Pitaj Señorpa jatuchaj ruwasqasninmanta willayta atinmanri? Pitaj Señorpa atipasqasninta willayta atinmanri?

³Kusisqas kanku cheqan kajta waqaychajkunaqa, kusisqas kanku tukuy tiempopi cheqan kajtapuni ruwajkunaqa.

⁴Señor, noqamanta yuyarikuway, aylluykita munakusqaykirayku, salvacioninykiwan watukuway.

⁵Ajllakusqasniykej allin kayninta rikunaypaj, noqapis aylluykiwan khuska kusikunaypaj, runasniykiwan khuskataj allimpi kanaypaj.

⁶Noqaykupis tatasniyku jina juchallikorqayku, sajrasman tukorqayku, millay kajtataj ruwarqayku.

⁷Tatasniykoqa Egiptopi, jatuchaj ruwasqasniykimanta mana unancharqankuchu. Ashkha munakuyniykimanta qonqaporqanku, astawanqa puka mar qocha qayllapi contraykipi oqharikorqanku.

⁸Diosninchejqa llimphu sutinrayku paykunata salvarqa, atiyninta rikuchinampaj.

⁹Chay puka mar qochata k'amerqa, ch'akicherqataj. Chay mar khallasqa qocha ukhuta ch'aki jallp'ata paykunata chimpacherqa.

¹⁰Ajinata enemigosninkumanta salvarqa, chejnikorqanku chaykunamantataj librarqa.

¹¹Yakoqa enemigosninkuta chinkaykucherqa, ni ujpis paykunamanta puchorqachu.

¹²Chaypacha, Diospa nisqampi creerqanku, takerqankutaj payta yupaychaspa.

¹³Paykunaqa usqhayllata Diospa ruwasqasninmanta qonqaporqanku, manataj Diospa yuyaychasqanta suyarqankuchu.

¹⁴Chay ch'in pampapitaj sajra yuyayninkuman qokorqanku, Diostataj tapurispa jina mañarqanku, Diostataj sapankupi tentarqanku.

¹⁵Diosninchejtaj imatachus mañasqankuta qorqa. Paykunaman uj wañuy onqoyta apachimorqa.

¹⁶Campamentopi paykunaqa Moisesmanta envidiakorqanku, Diospa ajllasqan Aaronmantawan.

¹⁷Chaymantataj jallp'a kicharikorqa, Dantataj oqoykaporqa Abiranta, tropantawan.

¹⁸Ninataj chay t'aqaj contranta laurarerqa; chay nina tukuy sajra runasta upharqa.

¹⁹Horeb orqopi uj uña torillota ruwakorqanku, qorimanta unuyachispa lantita ruwasqankuta yupaycharqanku.

²⁰Atiyniyoj Diosqa, qhorata mikhoj toroj lantinman tukucherqanku.

²¹Paykunaqa salvaj Diosninkuta qonqarqanku, mayqenchus paykunata salvan. Egiptopi jatuchaj t'ukuna imasta ruwajta qonqarqanku.

²²T'unata ruwallarqataj Campa jallp'ampi, jinallataj ruwarqa Puka mar qochapi.

²³Diosqa paykunata tukuchisaj nerqa. Ajllakusqan Moisés paykunarayku mañakojtintaj, Señorpa phiñakuynenqa tiyaykaporqa.

²⁴May sumaj jallp'asta qhesacharqanku, Diospa nisqanta mana creespa.

²⁵Toldosninkupitaj Señorpaj rimarqanku, manataj Señorpa kamachisqasninta yuyarerqankuchu.

²⁶Chayrayku Señorqa, makinta oqharispa jurarqa, ch'in pampapi paykunata wañurachinampaj.

²⁷Mirayninkutapis wañurachinampaj, waj nacionesman wijch'unampaj, paykunata ch'eqerachinampaj.

²⁸Baal-peorman k'askaykorqanku, wañusqa diosman jaywasqastataj mikhorqanku.

²⁹Sajra ruwasqasninkuwan Diosta phiñacherqanku. Ajinapi paykunapi wañuy jatarerqa.

³⁰Fineestaj sayaykuspa juchayojta wañucherqa, chay wañuy onqoytaj sayarqa.

³¹Diostaj chay cheqan ruwasqanta allimpaj qhawarqa wiñay wiñaynintimpaj.

³²Watejmanta paykunaqa Meriba yaku chimpapi Diosta phiñachillarqankutaj, paykunaraykutaj Moisespaj mana allinchu karqa.

³³Moisespa sonqonta phiñacherqanku, paytaj mana yachaspa imatachus nisqanta parlarqa.

³⁴Llajtasta mana chinkacherqankuchu, Señorpa kamachisqanta mana kasuspa.

³⁵Astawampis paykunaqa Diosta mana rejsej runaswan chajrukorqankuña, ususninkutataj ruwarqanku.

³⁶Yanqha mana kaj dioskunata yupaycharqanku, chaytaj paykunataqa lastayman chayacherqa.

³⁷Qhari wawasninkuta, warmi wawasninkutawan uywa wañuchisqata jina chay supaykunaman jaywarqanku.

³⁸Mana juchayojpa yawarninta jich'arqanku, chay wawasninkoj yawarninta, Canaán dioskunamantaj jaywarqanku. Chay jallp'ankutaj yawarninkuwan ch'ichichakorqa.

³⁹Ajinamanta paykunapis sapa ruwasqasninkuwan ch'ichichakorqanku, millay ruwasqankuwantaj qhenchachakorqanku.

⁴⁰Chayrayku Señorqa ayllumpa contranta phiñakorqa, paykunatataj qhesacharqa.

⁴¹Saqerparerqankutaj mana Diosta rejsej runaspa makisnimpi, enemigosninkutaj paykunata kamacherqanku.

⁴²Enemigosninkoqa lastacherqanku. Atiyninkuwantaj paykunata ñak'aricherqanku.

⁴³Señorqa ashkha kutista paykunata salvarqa, paykunataj mana munarqankuchu munaynin ruwakunanta, kikin juchankupitaj chinkarqanku.

⁴⁴Chay tukuywampis, payqa llakiyninkuta rikuspa, waqasqankuta uyarerqa.

⁴⁵Paykunawan trato ruwasqanmanta yuyarikorqa, sonqontataj nanachikorqa, munakuynin may jatun kasqanrayku.

⁴⁶Enemigosninkuwampis Señorqa paykunata khuyacherqa, paykunaj makisninkupi kashajtinku.

⁴⁷Salvawayku Señor Diosniyku! Oqharikapuwayku tukuy nacionesmanta, santo sutiykita yupaychanaykupaj, kusisqas qanta upaychanaykupaj.

⁴⁸Israelpa Señor Diosnin jatunchasqa kachun, wiñaypa wiñaynimpaj. Tukuy nichunku: Ajina kachun, nispa. Yupaychasqa kachun Señorqa!