Read Quechua Bolivia DC Bible SALMO 107 Bible Online

SALMO 107 - Quechua Bolivia DC Bible bible

SALMO 107

¹Señorta agradecekuychej, imaraykuchus payqa k'achamin; khuyakuynenqa wiñaypaj.

²Ajinata nichunku Señorpa librasqasnin, pikunachus enemigoj makinmanta librasqas kanku chaykuna,

³pikunatachus Señorqa tantarqa tukuy nacionesmanta, inti llojsimuymanta, inti yaykuynejmantapis, ura ladomanta, pata ladomantawan.

⁴T'iyu ch'in pampaspi chinkasqas purerqanku. Tiyakunankupaj llajtaman rina ñanta mana tarerqankuchu.

⁵Yarqhasqastaj, ch'akiyniyojtaj karqanku, wañunankupajña kasharqanku.

⁶Llakiyninkupitaj Señorta qhaparikorqanku, paytaj chay ñak'ariyninkumanta librarqa.

⁷Chaymantataj payqa uj cheqan ñanta paykunata pusarqa, kausakuna llajtasman chayanankupaj.

⁸Señorta khuyakuyninrayku agradecekuychej, runaspaj allin imasta ruwasqanrayku.

⁹Payqa runaj ch'akiyninta thasnun, yarqhasqa runatataj allin imaswan sajsachin.

¹⁰Wakenqa laqha wañuy patapi kausasharqanku. Llakiywan cadenaswan watasqas presos jina kasharqanku,

¹¹Señorpa kamachisqanta mana kasukusqankurayku, jatun Diospa munakuyninta qhesachasqankurayku.

¹²Chayrayku Diosqa sinch'i llank'ayman churarqa, misk'ajtinkupis mana pipis yanaparqachu.

¹³Llakiyninkupitaj Señorta qhaparikorqanku, paytaj chay ñak'ariyninkumanta orqhorqa.

¹⁴Chay ukhu laqhamanta orqhorqa, preso kasqankumantataj librarqa.

¹⁵Señorta khuyakuyninrayku agradecekuychej, runaspaj allin imasta ruwasqanrayku.

¹⁶Payqa bronce punkusta phirerqa, fierro tranquerastapis p'akerqa.

¹⁷Onqosqas llakisqastaj karqanku sajra ruwasqankurayku, juchasninkuraykutaj.

¹⁸Manaña ima mikhunatapis munarqankuchu, wañuy patapiñataj kasharqanku.

¹⁹Llakiyninkupitaj Señorta qhaparikorqanku, paytaj ñak'ariyninkumanta orqhorqa.

²⁰Parlasqanwan paykunata thañicherqa, tukuchisqa kanankumantataj librarqa.

²¹Señorta khuyakuyninrayku agradecekuychej, runaspaj allin imasta ruwasqanrayku.

²²Yupaychana takiykunata jaywaychej rikuchikuta jina, kusisqastaj parlaychej ruwasqasninmanta.

²³Mar qochaman buquespi yaykojkunaqa, yakuspi purejkunaqa,

²⁴chay mar qocha ukhupi Señorpa may sumaj jatun ruwasqantapis rikorqanku.

²⁵Señor parlajtin sinch'i para wayra oqharikorqa, mar qhochapitaj yakus oqharikorqanku.

²⁶Yakustaj patakama oqharikorqanku, uraykamuspataj, ukhukama chinkaykorqanku. Chayta rikuspa buquespi runasqa manchachikuywan kharkaterqanku.

²⁷Machasqa jina chankaykacharqanku; sumajta yachasqankoqa qhasi manakaj karqa.

²⁸Llakiyninkupitaj Señorta qhaparikorqanku, paytaj llakiyninkumanta orqhorqa.

²⁹Sinch'i para wayrata k'acha wayraman tukucherqa, yaku oqharikojtataj tiyaykucherqa.

³⁰Yaku manaña oqharikusqanta rikuspataj kusikorqanku, Diosninchejtaj chayananku karqa chayman pusarqa, ch'aki jallp'a sinch'ita sayan, chayman.

³¹Señorta khuyakuyninrayku agradecekuychej, runaspaj allin imasta ruwasqanrayku.

³²Runaspa tantakuynimpi Señorta jatunchaychej. Kuraj runaspa tantakuyninkupipis Señorta yupaychaychej.

³³Señorqa yaku mayusta ch'akichin, juturistapis ch'akiman tukuchin.

³⁴Sumaj jallp'asta mana poqojman tukuchin, chaypi tiyakojkuna sajrata ruwasqankurayku.

³⁵Ch'in pampata qochasniyojman tukuchin, ch'aki jallp'astataj juturisniyojman.

³⁶Jaqayman yarqhasqa kajkunata churan, paykunataj llajtasta tiyakunankupaj ruwakunku.

³⁷Jallp'api tarpunku, uvasta poqochinku, sumaj cosechastataj oqharinku.

³⁸Paykunata bendicin, ashkhaman mirachin, uywasninkutapis mirachipun.

³⁹Wañojtinku pisiyanku, ñak'ariypi kasqankurayku, mana allin kaypi, llakiypitaj kasqankurayku.

⁴⁰Diosninchej uraj runasman chejnichikuyta apachimun, chinkasqata purichin, mana mayman rinankuta yachajman tukuchin.

⁴¹Wajcha runasta pisichikuyninmanta orqhon, ayllusnintataj oveja tropasta jina mirachin.

⁴²Chayta cheqan runas rikunku, kusikunkutaj, tukuy runastaj siminkuta wisq'anku.

⁴³Pichus yachayniyoj kajqa chay imasta waqaychachun, yachachuntaj Señorpa khuyakuyninta.