Read Quechua Bolivia DC Bible SALMO 119 Bible Online

SALMO 119 - Quechua Bolivia DC Bible bible

SALMO 119

¹Kusisqas kanku cheqanta kausajkunaqa, Señorpa kamachisqasnintataj kasojkunaqa.

²Kusisqas kanku paypa kamachisqasninta uyarejkuna, tukuy sonqowantaj payta mask'ajkuna.

³Paykunaqa sajra kajta mana ruwankuchu, Señorpa ñannintataj purinku.

⁴Qan kamachiwarqayku, nisqasniykita allinta junt'anaykuta.

⁵Munayman ari allintapuni puriyta, kamachisqasniykita junt'anaypaj.

⁶Mana p'enqakusajchu simiykita allinta junt'aytaqa.

⁷Tukuy cheqan nisqasniykita yachaspa, cheqan sonqowan yupaychasqayki.

⁸Kamachisqasniykita junt'asaj. Ama jayk'ajpis saqerpariwaychu!

⁹Imawantaj waynaqa llimphu kausayniyoj kanqari? Parlasqaykita kasuspa.

¹⁰Noqa tukuy sonqoywanmin mask'akuyki. Amataj kamachiyniykimanta karunchakunayta saqeychu.

¹¹Palabrasniykita sonqoypi waqaychani, ama contraykipi juchallikunaypaj.

¹²Jatunchasqa kanki, Señor! Kamachisqasniykita yachachiway.

¹³Kikin simiywan willani, tukuy cheqan nisqasniykita.

¹⁴Qampa kamachisqasniykipi astawan kusikuni, qhapaj kanaymanta nisqaqa.

¹⁵Nisqasniykipi allinta yuyasaj; ñankunasniykita sumajta qhawasaj.

¹⁶Kamachisqasniykipi kusikusaj, parlasqaykita mana qonqasajchu.

¹⁷Allinta ruwaspa kausachiway ari, palabraykitataj junt'asaj.

¹⁸Ñawisniyta kichariy qhawanaypaj chay jina k'acha kamachisqasniykita.

¹⁹Noqa kay pachapi purikoj runalla kani, kamachisqasniykitaqa ama pakawaychu.

²⁰Sonqoyqa q'asa kashan, tukuy kausayniy kamachisqasniykita yachayta munaspa.

²¹Qan k'aminki mana kasukojkunata, sajrata ruwaspa kamachisqasniykimanta t'aqakojkunatawan.

²²Karunchay noqamanta sajrata chejnikuyta, imaraykuchus kamachisqasniykita junt'arqani.

²³Atiyniyoj kuraj runas sajrata ruwayta munawajtinkupis, kay kamachiykeqa kamachisqasniykipi yuyallanqapuni.

²⁴Noqa kamachisqasniykipi kusikuni, chay kamachisqasniyki yuyaychawanku.

²⁵Wañunayashaniña; kausayta qoway ari, nisqaykiman jina.

²⁶Imaynatachus kausasqayta willarqayki, qantaj kutichiwarqanki. Yachachiway ari kamachisqasniykita.

²⁷Yuyayta qoway kamachisqasniykita qhatinaypaj; sumaj ruwasqasnillaykipi yuyayta munani.

²⁸Llakiywan waqasqaypi jeq'eqashaniña; sinch'ita sayachillaway, nisqaykiman jina!

²⁹Llulla ñanmanta karunchaway, khuyakuyniykiman jina, allinta ruwaway.

³⁰Cheqan ñanta noqa ajllakuni, kamachisqasniykita munakuni.

³¹Señor, kamachisqasniykiman k'askakuni, ama p'enqaypi rikhurichiwaychu.

³²Sonqoyman yuyaywan junt'achiwajtiyki, kamachisqasniykipi purisaj.

³³Señor kamachisqasniykej ñanninta yachachiway, chayninta riyta munani tukukuyninkama.

³⁴Kamachisqasniykita waqaychanaypaj yuyayta qoway; tukuy sonqoywantaj junt'asaj.

³⁵Kamachisqasniykej ñanninta pusaway, chaypi kusikuyneyqa kashan.

³⁶Sonqoyta aysaway kamachisqasniykita mask'anaypaj; ch'ichi qhapajyaykunata amaña munapayanaypaj.

³⁷Amaña saqeychu ñawisniy mana kaj dioskunata qhawananta; kausayta qollawaypuni ñanniykita purinaypaj.

³⁸Kasukoj kamachiykiman ruwasaj nisqaykita junt'ay.

³⁹Manchachikuni chay p'enqayta noqamanta karunchay, imaraykuchus nisqasniykeqa allimpuni kanku.

⁴⁰Kamachisqasniykitaqa may jinata munani; cheqa kayniykirayku kausachiway.

⁴¹Señor, khuyakuyniykita rikuchiway, salvacionniykitawan nisqaykiman jina.

⁴²Ajinata noqa kutichisaj contraypi parlajkunaman, imaraykuchus palabraykipi atienekuni.

⁴³Cheqa parlaytaqa ama jayk'ajpis simiymanta qhechuwaychu, imaraykuchus palabraykipi atienekuni.

⁴⁴Leyniykita waqaychasajpuni, wiñay wiñaykama.

⁴⁵Kamachisqasniykita mask'asqayrayku kacharisqa jina kausakusaj.

⁴⁶Kamachisqasniykimanta reyespa ñaupaqempi, mana p'enqakuspa parlasaj.

⁴⁷Kamachisqasniykipi noqa kusikusaj, chaykunata munakusqayrayku.

⁴⁸Munakusqay kamachisqasniykita junt'asaj, chaykunallapitaj yuyaspa kasaj.

⁴⁹Yuyarikuy kay kamachiykiman nisqasniykimanta; chay nisqasniykipi noqata suyachiwanki.

⁵⁰Chay nisqasniykimin llakiyniypi kusichiwan, chay palabrayki kausachiwan.

⁵¹May kasqankuta yuyakojkuna mayta asipayawanku, noqatajrí yachachiwasqasniykimanta mana karunchakunichu.

⁵²Señorníy, unayña nisqasniykimanta yuyarikullanipuni, chaywantaj sonqochakuni.

⁵³Juchasapas kamachisqasniykita, mana kasusqankumanta mayta phiñakuni.

⁵⁴Kamachisqasniykeqa misk'i takiykunasniy kanku, kay pachapi karu llajtayoj jina kashajtiy.

⁵⁵Señor, ch'isisnimpi qanmanta yuyarikuni; kamachisqasniykita waqaychani.

⁵⁶Ajinatapuni ruwanay tiyan, kamachisqasniykita junt'aspa.

⁵⁷Qan, Señor, tukuy kapuyniy kanki, noqa nini qampa nisqasniykita junt'anayta.

⁵⁸Tukuy sonqoywan wajyakuyki, nisqasniykiman jina khuyakuway.

⁵⁹Imaynatachus kausasqaymanta allinta yuyarikuni, watejmantataj kamachisqasniykita junt'aj churakorqani.

⁶⁰Usqhayllata kamachisqasniykita junt'arqani, mana qhellakuspa.

⁶¹Juchasapas ch'ipasninkuwan jap'iykuwanku, chaywampis kamachisqasniykita mana qonqapunichu.

⁶²Chaupi tutata sayarikuni qanta yupaychasunaypaj, cheqan nisqasniykimanta.

⁶³Qanta yupaychasojkunata munakuni, kamachisqasniykita junt'ajkunajtawan.

⁶⁴Señor, kay pachaqa khuyakuyniykiwan junt'a kashan. Yachachiway kamachisqasniykita.

⁶⁵Señor, kay kamachiykipajqa allin imasta ruwarqanki nisqaykiman jina.

⁶⁶Cheqan sonqoyoj, sumaj yuyayniyojtaj kanaypaj yachachiway; kamachisqasniykipipuni atienekuni.

⁶⁷Manaraj qanman k'umuykushaspa anchata noqa pantaj kani, kunantaj nisqaykita kasukuni.

⁶⁸Qanqa k'acha kanki, sumaj kajtataj ruwanki. Kamachisqasniykita yachachiway.

⁶⁹May kasqankuta yuyakojkunaqa qhasimanta ch'atawanku. Noqarí kamachisqasniykita tukuy sonqo junt'ani.

⁷⁰Yuyayninkoqa wisq'asqa kashan, noqataj kamachisqasniykipi kusikuni.

⁷¹Jasut'iwasqaykeqa noqapaj allin karqa, ajinamanta kamachisqasniykita yachakorqani.

⁷²Noqapaj yachachiykunasniyki palabrasqa, aswan allinraj kanku ashkha qorimanta, qolqemantawan nisqaqa.

⁷³Qan, Señor, makisniykiwan ruwawarqanki, sumaj yuyayta qoway kamachisqasniykita yachanaypaj.

⁷⁴Qanta kasojkuna rikuwaspaqa kusikonqanku, imaraykuchus parlasqaykipi suyakuni.

⁷⁵Noqa yachani, Señor, cheqan justiciata ruwaj kasqaykita. Maychus kajta jasut'iwarqanki.

⁷⁶Khuyakuyniyki kunanqa sonqochawachun, niwasqaykiman jina.

⁷⁷Khuyakuyniyki jamuchun kausanaypaj. Kamachisqasniykipi kusikuni.

⁷⁸May kasqankuta yuyakojkunaqa p'enqaypi rikhurichunku, imaraykuchus qhasillamanta ch'atawanku, noqataj kamachisqasniykipi yuyasaj.

⁷⁹Noqawan ujchakuchunku qanta yupaychasojkuna, kamachisqasniykita yachajkunapis.

⁸⁰Kamachisqasniykipaj sonqoy cheqan kachun, ama imamantapis p'enqakunaypaj.

⁸¹Salvacionniykimanta jina lastashani; parlasqaykipi suyakuni.

⁸²Ñawi chharpuyayta palabraykita suyashani, mayk'ajllataj sonqochawanqari, nispa.

⁸³Qonqasqa achachi jina kaspapis, kamachisqasniykitaqa manapuni qonqapunichu.

⁸⁴Mayk'ajkamataj suyakusajri? Mayk'ajtaj qhatiykachawajkunataqa juchachankiri?

⁸⁵May kasqankuta yuyajkuna urmachinawankupaj t'oqosta allanku; paykunaqa mana kamachisqasniykiman jinachu ruwanku.

⁸⁶Yanapaway ari, qhasillamanta qhatiykachashawanku; tukuy kamachisqasniykeqa cheqampuni kanku.

⁸⁷Yaqhapuni kay jallp'amanta chinkachiwanku, chaywampis kamachisqasniykitaqa manapuni qonqanichu.

⁸⁸Khuyakuyniykiman jina kausayta qoway, simiykej nisqantataj junt'asaj.

⁸⁹Señor, parlasqaykeqa wiñaypaj, janaj pachapi sinch'i sayasqa kashan.

⁹⁰Cheqan kayniykeqa wiñaypaj kanqa, uj runa mitamanta uj runa mitakama. Qan kay jallp'ata sayacherqanki, kashallampunitaj.

⁹¹Qampa kamachisqasniykiman jina tukuy ima kunankama sayan, imaraykuchus tukuy ima kamachiykipaj kanku.

⁹²Manachus kamachiyniyki kusichiwanman karqa chayqa, llakiyniy tukuchiwanmanña karqa.

⁹³Kamachisqasniykimanta mana jayk'ajpis qonqasajchu, chaykunawanmin kausachiwarqanki.

⁹⁴Salvaway ari; qampata kani, kamachiwasqasniykita qhaterqani.

⁹⁵Sajra runasqa tukuchinawankupaj suyashallawanku, noqarí kamachisqasniykipi yuyashani.

⁹⁶Noqaqa rikuni tukuy imapis tukukapojlla kasqanta, kamachisqasniykirí mana tukukuyniyoj.

⁹⁷Maytapuni kamachisqasniykita munakuni; tukuy p'unchaynintin chayllapi yuyani.

⁹⁸Kamachisqasniykeqa aswan yachayniyojta ruwawan, imaraykuchus chaykunawanmin yachayniyojqa kani.

⁹⁹Tukuy yachachejkunasniymanta astawan entiendeni, imaraykuchus kamachisqasniykipi anchata unanchani.

¹⁰⁰Kurajkunamantapis astawan entiendeni, kamachisqasniykita qhatisqayrayku.

¹⁰¹Tukuy sajra puriymanta chakisniyta karunchani, palabraykita waqaychanaypaj.

¹⁰²Kamachisqasniykimanta mana karunchakunichu, imaraykuchus qanmin yachachiwanki.

¹⁰³Nisqasniykeqa may misk'imin simiypeqa; abeja misk'imantapis aswan misk'iraj.

¹⁰⁴Kamachisqasniykimanta yachayta orqhoni; chayrayku chejnikuni tukuy sajra puriyta.

¹⁰⁵Parlasqaykeqa purinaypi k'anchaymin; ñanniyta k'anchaykun.

¹⁰⁶Cheqan nisqaykita junt'asaj nispa jurarqani; kunanqa chayman jina junt'asaj.

¹⁰⁷Señor, ancha llakisqa kashani; kausachiway ari nisqaykiman jina.

¹⁰⁸Jap'ikuy, Señor, simiywan qanta yupaychasqasuyta, yachachiwaytaj kamachisqasniykita.

¹⁰⁹Wañoyqa qhatiykachallawampuni; chaywampis kamachiwasqasniykimanta mana qonqanichu.

¹¹⁰Sajra runasqa tojllata churawanku, noqataj kamachisqasniykimanta mana karunchakunichu.

¹¹¹Kamachisqasniykita chayaqeta jina wiñaypaj jap'ikapuni, kamachisqasniykeqa sonqoyta kusichinku.

¹¹²Tukuy sonqoywan kunanqa kamachisqasniykita junt'asaj nini, wiñaypa wiñayninkama.

¹¹³Puraj uya runastaqa chejnikuni, astawanqa kamachisqasniykita munakuni.

¹¹⁴Qan jark'awajniy waqaychawajniytaj kanki, parlasqaykipitaj atienekuni.

¹¹⁵Sajra runas, noqamanta karunchakuychej, noqaqa Diosniypa kamachisqasninta junt'ayta munani.

¹¹⁶Nisqaykiman jina kausasaj, kallpachaway; ama qhasitaqa suyachiwaychu!

¹¹⁷Yanapaway salvasqataj kasaj; jinapitaj kamachisqasniykita junt'asaj.

¹¹⁸Qanqa qhesachanki kamachisqasniykimanta pantajkunata, imaraykuchus sajra yuyasqankoqa qhasi mana-kajlla.

¹¹⁹Kay pachapi sajra runasta q'opata jina chinkachinki; chayrayku noqa kamachisqasniykita munakuni.

¹²⁰Qanta manchachikuspa tukuy ukhuy kharkatitin, kamachisqasniykitataj munakuywan kasuni.

¹²¹Cheqan kajllatapuni ruwarqani; ama enemigosniypa kamachisninmanqa saqewaychu.

¹²²Allinniypajqa qanlla qhawakuy; amataj may kasqankuta yuyakojkunaqa ñak'arichiwachunkuchu.

¹²³Ñawisneyqa k'arawanña salvanawaykita suyaspa, libranawaykita suyaspa, nisqaykiman jina.

¹²⁴Kay kamachisqaykitaqa khuyakusqaykiman jina ruway; kamachisqasniykita yachachiway!

¹²⁵Noqa kamachiyki kani. Yuyayta qoway. Noqa yachayta munani kamachisqasniykita.

¹²⁶Kunanqa ruwanayki tiempoña Señor, imaraykuchus kamachisqasniykita mana junt'ankuchu.

¹²⁷Chayrayku, noqa kamachisqasniykita munakuni, sumaj qorimanta astawanraj.

¹²⁸Chayrayku, kamachisqasniykita cheqampaj qhawani waj imasmanta astawan; tukuy llulla kausaykunata chejnini.

¹²⁹May t'ukunapuni kamachisqasniyqeqa; chayrayku noqaqa junt'ani.

¹³⁰Qampa parlayniykeqa k'anchay jina, llamp'u sonqoyojkunamantaj yachachin.

¹³¹Anchata munaspataj simiyta kicharini, imaraykuchus kamachisqasniykita munani.

¹³²Qhawariway, noqamanta khuyakuytaj, munakusojkunawan imaynatachus ruwanki ajinata.

¹³³Parlasqaykiman jina purichiway; ama saqeychu sajra kaj atipanawanta.

¹³⁴Sajra runaj phinakuyninmanta libraway; kamachisqasniykita junt'ayta munani.

¹³⁵Kay kamachiykitaqa k'acha ñawiwan qhawaway, kamachisqasniykita yachachiway.

¹³⁶Waqay mayus ñawisniymanta llojsin, kamachisqasniyki mana junt'akusqanrayku.

¹³⁷Señor, qan cheqan kanki, kamachisqasniykipis cheqan.

¹³⁸Tukuy kamachisqasniykeqa cheqan sut'i kanku.

¹³⁹Palabraykita sinch'ita munakusqay t'ukuchiwan, enemigosniy kamachisqasniykita qonqapusqankurayku.

¹⁴⁰Palabraykeqa allin ch'uwamin, chayrayku kay kamachiykeqa munakun.

¹⁴¹Wajcha, wijch'usqa jinataj kani, astawampis kamachisqasniykitaqa mana qonqanichu.

¹⁴²Cheqan kayniykeqa wiñaypaj cheqampuni, kamachisqasniykipis kikillantaj.

¹⁴³Llakisqa rikukuspa phutikuni chaypis, kamachisqasniykeqa kusichiwarqanku.

¹⁴⁴Kamachisqasniykeqa cheqampuni kanku, yachayta qoway kausayta atinaypaj!

¹⁴⁵Señor, tukuy sonqowan qhaparikuyki, uyarillaway ari; kamachisqasniykita junt'ayta munani.

¹⁴⁶Qanta qhaparikuyki, salvaway ari, kamachisqasniykita junt'anaypaj.

¹⁴⁷Manaraj sut'iyamushajtin sayarispa, yanapayniykita mañakuyki.

¹⁴⁸Manaraj sut'iyamushajtin ñawisniy qhawaykachashankuña, nisqaykipi yuyanaypaj.

¹⁴⁹Khuyakuwasqaykirayku, Señor, uyariway, nisqasniykiman jina kausayta qoway.

¹⁵⁰Sajra runas qhatiykachawajkuna muyuykuwanku; paykunaqa kamachisqasniykimanta karupi kashanku.

¹⁵¹Qanmin, Señor, qayllapi kashanki; tukuy kamachisqasniykitaj cheqan kanku.

¹⁵²Unaymantapachaña kamachisqasniykitaqa rejsini; wiñaypaj chaykunata churarqanki.

¹⁵³Qhaway ñak'arisqayta, librawaytaj, imaraykuchus kamachisqasniykita mana qonqanichu.

¹⁵⁴Qan noqamanta sayakuway, librawaytaj; nisqaykiman jinataj kausayta qoway!

¹⁵⁵Sajra runasqa yanapayniykimanta karupi kashanku, kamachisqasniykita mana junt'asqankurayku.

¹⁵⁶Señor, khuyakuyniykeqa may jatun, cheqan kasqaykiman jina kausayta qoway.

¹⁵⁷Enemigosniy ñak'arichiwajkunaqa ashkha kanku; noqaqa kamachisqasniykimanta mana karunchakunichu.

¹⁵⁸Wasanchakojkunataqa mana rikuyllatapis munanichu; paykunaqa kamachisqasniykita mana junt'ankuchu.

¹⁵⁹Señor, qhaway imaynatachus kamachisqasniykita munakuni; munakuyniykirayku kausachiway!

¹⁶⁰Parlasqaykipi tukuy ima sut'i kay, tukuy kamachisqasniykeqa wiñaypaj cheqapuni kanku.

¹⁶¹Atiyniyoj runas qhasillamanta qhatiykachawanku, sonqoyrí parlasqaykita allinta waqaychan.

¹⁶²Noqaqa nisqaykiwan kusikuni, pakasqa qolqetapis tarikuyman jina.

¹⁶³Llullakuytaqa chejnikuni, mana uyariyllatapis munanichu, yachachisqasniykita munakuni.

¹⁶⁴Sapa p'unchay qanchis kutita yupaychayki, cheqanta parlasqasniykimanta.

¹⁶⁵Yachachisqasniykita munakojkunaqa sonqo tiyasqallamin kanku, nitaj imapis misk'achiyta atinmanchu.

¹⁶⁶Señor, salvanawaykita suyani, kamachisqasniykita junt'ani.

¹⁶⁷Noqaqa kamachisqasniykita junt'ani, tukuy sonqotaj munakuni.

¹⁶⁸Noqaqa junt'ani nisqasniykita, kamachisqasniykitapis; qan rejsinki tukuy kausayniyta.

¹⁶⁹Qankama, Señor, qhaparikusqay chayamusuchun, parlasqaykiman jina yachayta qoway.

¹⁷⁰Mañakusqayqa qankama chayamusuchun; librawaytaj nisqaykiman jina.

¹⁷¹Qanta yupaychayqa simiymanta llojsichun, kamachisqasniykita yachachiwajtiyki.

¹⁷²Simeyqa nisqaykimanta parlanqa, imaraykuchus tukuy kamachisqasniyki cheqampuni.

¹⁷³Makiykeqa yanapanawampaj jina kachun, imaraykuchus kamachisqasniykita ajllakuni.

¹⁷⁴Señor salvanawaykita munani, yachachiwasqaykiwan kusisqa kani.

¹⁷⁵Yupaychanasuypaj kausayta munani, cheqan kayniyki yanapawachun.

¹⁷⁶Chinkasqa oveja jina purerqani; kamachiykita mask'away, imaraykuchus kamachisqasniykitaqa mana qonqanichu.