Read Quechua Bolivia DC Bible SALMO 145 Bible Online

SALMO 145 - Quechua Bolivia DC Bible bible

SALMO 145

¹Diosníy, reyníy, jatunchasqayki; wiñaypa wiñaynimpajtaj sutiykita yupaychasaj.

²Sapa p'unchay yupaychasqayki, wiñaypa wiñaynimpaj sutiykita yupaychasaj.

³Señorqa jatunmin, mayta yupaychanapaj jinapuni. Jatun kaynenqa mana yachay atina jina.

⁴Tukuy tiempo runa mitas ruwasqasniykirayku yupaychasonqanku, jatun ruwasqasniykitataj willanqanku.

⁵Tukuy atiyniykimanta parlakonqa, noqataj k'acha ruwasqasniykimanta parlallasajpuni.

⁶Kallpayoj manchachikuna ruwasqasniykimanta parlakonqa, noqataj jatun kayniykimanta parlasaj.

⁷K'acha munakuyniyoj kasqaykimanta yuyarikuspa parlanqanku. Cheqan kasqaykitataj willanqanku.

⁸Señorqa llamp'u sonqoyoj, khuyakuyniyojtaj, mana phiñakullanchu, jatun munakuyniyoj,

⁹Señorqa tukuypajmin k'acha, tukuy ruwasqasninta munakuywan qhawan.

¹⁰Tukuy ruwasqasniyki, Señor, yupaychasuchunku, qhatisojkuna yupaychasuchunku.

¹¹Rey kasqaykej atiyninmanta parlachunku, atiyniykimanta parlachunku.

¹²Atiyniykita runasman yachachichunku, jatun atiyniyoj rey kasqaykitawan.

¹³Rey kasqaykeqa wiñaypaj, kamachiyniykeqa tukuy runa mitaspaj.

¹⁴Señorqa tukuy urmajkunata oqharin, sayarichintaj llakiywan wañunayajkunata.

¹⁵Tukuypa ñawisnin qampi suyakunku, tiempompi mikhuchinaykita suyanku.

¹⁶Makiykita kicharispa, tukuy kausajkunata sajsachinki ashkhata qospa.

¹⁷Señorqa tukuy imatapis ashkhatapuni ruwan. Tukuy ima ruwasqasnimpi khuyakuyniyoj.

¹⁸Señorqa payta wajyakojkunaj qayllapi kashan, cheqan sonqowan wajyakojkunaj qayllampi.

¹⁹Payta yupaychajkunaj munayninta junt'an, yanapata mañakojtinkutaj uyarin, salvantaj.

²⁰Señorqa payta munakojkunata jark'an, sajra runastataj tukuchin.

²¹Simiy Señorta yupaychachun. Tukuypuni santo sutinta wiñaypajpuni yupaychachunku.